Isaiah 28

azerbaijan-2013

1وای اِفرایئمئن کِفلی‌لرئنئن کئبئر تاجینا! شؤوکتلی گؤزل‌لئیئنئن سولان گولونه! او کی، بَهَرلی دره‌نئن باشیندا یِرله‌شیب، وای بو شهره کی، شرابا دوشکون اولانلارین کئبئری‌دئر.

2باخ، ربّئن گوجلو و قووّتلی بئر آدامی وار. او، بَرک یاغان دولو کئمی، بلا گتئرن طوفان کئمی، هر شیی یولوندا محو ادن سل کئمی گلئر، اَلی ائله او شهری یِره چیرپاجاق.

3اِفرایئمئن کِفلی‌لرئنئن کئبئر تاجی آیاق آلتیندا تاپدالانیر.

4محصوللو دره‌نئن باشیندا یِرلَشَن شهر، اونون شؤوکتلی گؤزل‌لئیئنئن سولان گولو، یایدان قاباق عمله گلن کال انجئر کئمی اولاجاق کی، اونو گؤرَن تِز دَرئب یئیه‌جک.

5او گون قوشونلارین رَبّی، صاغ قالان خالقی اوچون، گؤزل بئر تاج، شؤوکتلی بئر چَلَنگ اولاجاق.

6حؤکم کورسوسونده اوتورانا عدالت روحو، شهر دروازالارینی مودافئعه ادنلره قودرت وره‌جک.

7بونلار دا شرابدان هِل‌له‌نئرلر، عَرَقدن آشا-آشا گِدئرلر: هم کاهئن، هم نبی عَرَقدن هِل‌له‌نئرلر، شراب اونلاری گئجَلدئب، عَرَق اونلاری آشیریر: رؤیالار گؤرَن زامان کِفلی‌دئرلر، حؤکم ادن زامان کِفلئلئکدن هِل‌له‌نئرلر.

8بوتون سوفره‌لر کثئف قوسماقلا دولودور، بولانمامیش بئر یِر یوخدور!

9«بو آدام کئمه معرئفت اؤیرَ‌دئر؟ پیامی کئمه آچیقلاییر؟ سوددن کَسئلمئش، آنا دؤشوندن آیریلمیش کؤرپه اوشاقلارا مگر؟

10چونکی رب دیئر: «امر اوستونه امر، امر اوستونه امر، قایدا اوستونه قایدا، قایدا اوستونه قایدا، بئر آز بورادا، بئر آز اورادا.»

11دوغرودان دا رب بو خالقلا دانیشاجاق؛ پلتک دوداقلارلا، یاد دئل‌له.

12او کی، اونلارا ددی: «راحاتلیق بودور، یورغونلارا دئنجلئک ورئن.» و «ائستئراحت ادئن.» آمّا اونلار اشئتمَک ائستمه‌دئلر.

13بونا گؤره ده، ربّئن سؤزو اونلار اوچون بو اولاجاق: «امر اوستونه امر، امر اوستونه امر، قایدا اوستونه قایدا، قایدا اوستونه قایدا، بئر آز بورادا، بئر آز اورادا.» کی، گتسئنلر و آرخاسی اوسته ییخیلسینلار، قیریلسینلار، تله‌یه دوشوب اسئر اولسونلار.

14بونا گؤره ده، ای رئشخندچئلر، اورشلئمده اولان بو خالقین رهبرلری، ربّئن سؤزونه قولاق آسین!

15مادام کی سئز دِدئنئز: «اؤلومله عهد باغلامیشیق، اؤلولر دئیاری ائله راضیلیغا گلمئشئک، اؤلکه‌یه بؤیوک بلا گلنده، بئزه ضرر ورمه‌یه‌جک، چونکی یالانی اؤزوموزه سیغیناجاق اتمئشئک، حئیله‌نئن آرخاسیندا گئزلَنمئشئک.»

16بونا گؤره ده پروردئگار رب دیئر: باخ، صحیوندا بونؤوره داشی، مؤحکم داش، قئیمتلی گوشه‌داشی قویورام. اونا ائنانان پرئشان اولمایاجاق.

17عدالتی اؤلچو، صالحلئیی شاقول اده‌جیم. یالان سیغیناجاغینی دولو محو اده‌جک، گئزلَندئیئنئز یِرلری سِللر یویوب آپاراجاق.

18اؤلومله باغلادیغینیز عهد لغو اولوناجاق، اؤلولر دئیاری ائله راضیلیغینیز قووّه‌دن دوشه‌جک. اؤلکه‌یه بؤیوک بلا گلنده، سئزی تاپدالایاجاق.

19بو بلا هر گلدئیئنده سئزی سوپوروب گؤتوره‌جک. او سحر به سحر، گجه گوندوزون هر واختی کچه‌جک. بو خبری آنلایان دهشته بورونه‌جک.

20یاتاق اوزانماق اوچون قیسا، یورغان بورونمک اوچون دار اولاجاق.

21چونکی رب پِراصئم داغیندا اتدئیی کئمی قالخاجاق، گئبعون دره‌سئنده‌کی کئمی قضبلَنه‌جک. او اؤز ائشئنی، قِیری-عادی ائشئنی یرئنه یتئره‌جک! اؤز عملئنی، نامعلوم عملئنی حیاتا کچئرده‌جک.

22بونا گؤره ده رئشخند اتمه‌یئن، یوخسا زنجئرلرئنئز داها دا آغیرلاشار. چونکی قوشونلارین ربّی پروردئگاردان اشئتمئشم کی، بوتون یِر اوزونون محو اولماسینا قطعی بئر شکئلده قرار ورئلئب.

23قولاق آسین، سَسئمی اِشئدئن، قولاق ورئن و دِدئیئمی اِشئدئن.

24مگر اَکئنچی، اَکئن اَکمک اوچون، دورمادان یری شوخوملاماز؟ مگر دورمادان تورپاقدا شیریم آچیب هامارلاماز؟

25مگر تورپاغی هامارلایاندان سونرا، شویود و زئره‌نی سَپمَز؟ مگر بوغدانی ردئفله، آرپانی آییردیغی یِره، قیرمیزی بوغدانی دا اونون یانینا اَکمَز؟

26چونکی تاریسی اونا نصئحت وِرَر، اونو یاخشی اؤیرَدَر.

27چونکی شویودو خرمنده وَل‌له دؤیمَزلر، زئره‌نئن اوستونه ده عارابا تَکَرلری ائله سورمَزلر. شویود دَیَنَکله، زئره ده آغاجلا دؤیولر.

28بوغدا چؤرک اوچون گرک خرمنده دؤیولسون؛ بونا گؤره ده اَکئنچی اونو ابده کئمی دؤیمَز. اگر عاراباسینین تَکَرلرئنی ده اوستوندن کچئرتسه، آتلاری بوغدانی اَزمَز.

29بو دا قوشونلارین ربّئندن گلئر. اونون مصلحتی عالی، حئکمتی بؤیوکدور.

← Chapter 27 Chapter 29 →