Ezekiel 34

azerbaijan-2013

1منه ربّئن بو سؤزو نازئل اولدو:

2«ای بشر اوغلو، نبئلئک ات، ائسرایئلئن چوبانلارینین ضئدّئنه نبئلئک ادئب اونلارا دِه کی، پروردئگار رب بله دیئر: ”ائسرایئل چوبانلارینین وای حالینا کی، آنجاق اؤزلرئنی یِدئردئرلر! مگر چوبانلار گرک سورونو یِدئرتمه‌سئنلر؟

3سئز یاغی یِیئرسئنئز، یوندان پالتار گِیئنئرسئنئز، بَسلَنمئش قویون-کِچئنی کَسئرسئنئز، سورونو یِدئرتمه‌یئرسئنئز.

4ضعئفلره قووّت ورمه‌یئبسئنئز، ناخوش اولانی صاغالتماییبسینیز، سینانی باغلاماییبسینیز، آزانی گری قایتارماییبسینیز، ائته‌نی آختارماییبسینیز؛ آنجاق زور و قدّارلیقلا اونلارا آغالیق ادئبسئنئز.

5اونلار دا چوبان اولمادیغی اوچون داغیلیشدیلار و وحشی حیوانلارا یِم اولدولار، هر بئری بئر یِره قاچدی.

6منئم سوروم بوتون داغلاردا و اوجا تپه‌لرده سرگردان اولدو. منئم سوروم بوتون یِر اوزونه داغیلیشدی. بئر سوروشان، بئر آختاران دا یوخ ائدی.“

7بونا گؤره ده، ای چوبانلار، ربّئن سؤزونه قولاق آسین.

8پروردئگار رب بویورور: ”وارلیغیما آند اولسون، ائندی کی، چوبان اولمادیغی اوچون سوروم قارت ادئلئب، بوتون وحشی حیوانلارا یِم اولوب، چوبانلاریم دا سورومو آختارماییب اونلاری یِدئرتمه‌یئبلر، لاکئن اؤز-اؤزلرئنی یِدئردئبلر -

9بوتون بونلارا گؤره، ای چوبانلار، ربّئن سؤزونه قولاق آسین.

10پروردئگار رب بله دیئر: من بو چوبانلارین ضئدّئنه‌یَم. سوروم اوچون اونلاردان حساب ورمه‌لرئنی طلب اده‌جیم. سورونو اوتارماق ائشئنی بئر داها اونلارا ورمه‌یه‌جیم. بله‌جه چوبانلار آرتیق اؤزلرئنی کؤکَلتمیه‌جکلر. سورومو اونلارین دئشلرئندن قورتاراجاغام کی، بئر داها اونلارا یِم اولماسینلار.“

11چونکی پروردئگار رب بله دیئر: ”باخین، من اؤزوم سورومون دالینجا گدئب اونلاری آختاراجاغام.

12داغیلیشمیش قویونلارینین آراسیندا اولان بئر چوبان نجه سوروسونون قیدئنه قالار، من ده سورومون قیدئنه اِله قالاجاغام. بولودلو و قارانلیق بئر گونده اطرافا سَپه‌لَندئکلری هر یردن اونلاری قورتاراجاغام.

13اونلاری خالقلارین آراسیندان چیخارداجاغام، اؤلکه‌لردن ییغیب اؤز تورپاقلارینا گتئره‌جیم؛ ائسرایئل داغلاریندا، دره‌لرده، اؤلکه‌نئن بوتون مسکونی یِرلرئنده اونلاری یِدئرده‌جیم.

14اونلاری گؤزل بئر اوتلاقدا یِدئرده‌جیم. یایلاقلاری ائسرایئلئن اوجا داغلاری اوستونده اولاجاق. اورادا گؤزل بئر یایلاقدا یاتاجاقلار. ائسرایئل داغلاری اوستونده اولان بَهَرلی اوتلاقدا اوتلایاجاقلار.

15سورومو من اؤزوم اوتورداجاغام، اونلاری من اؤزوم یاتیرداجاغام.“ پروردئگار رب بویورور.

16”ائتمئشی آختاراجاغام، آزانی گری قایتاراجاغام، یارالی اولانی باغلایاجاغام، ناخوش اولانا قووّت وره‌جیم، آمّا بَسلَنمئش و گوجلو اولانی هلاک اده‌جیم. من قویونلاریمی عدالتله اوتاراجاغام.“

17سئزه گلئنجه، ای منئم سوروم، پروردئگار رب بله دیئر: ”باخ، قویونلا قویون آراسیندا، قوچلارلا کِچئلر آراسیندا من حؤکم اده‌جیم.

18گؤزل اوتلاقدا اوتلاماغینیز سئزه آز ائدی کی، اوتلاقلارینیزین قالانینی دا آیاقلارینیز آلتیندا تاپدالاییرسینیز؟ دورو سو ائچمه‌یئنئز سئزه آز ائدی کی، آرتیغینی دا آیاقلارینیزلا بولاندیریرسینیز؟

19منئم سورومه گلئنجه، سئزئن آیاقلارینیزلا تاپدالادیقلارینیزی اونلار گرک یِسئنلر، آیاقلارینیزلا بولاندیردیقلارینیزی اونلار گرک ائچسئنلر!“

20بونا گؤره ده پروردئگار رب اونلارا بله دیئر: ”باخین، من، بلی، من بَسلَنمئش قویونلا آریخ قویونون آراسیندا حؤکم اده‌جیم.

21سئز بوتون آریخ قویونلاری بؤیرونوزله، چئینئنئزله ائته‌له‌یئرسئنئز، اونلاری کنارا چیخارتماق اوچون بوینوزلارینیزلا وورورسونوز.

22بونا گؤره ده من سورومو خئلاص اده‌جیم. اونلار داها قارت مالی اولمایاجاقلار و قویونلا قویون آراسیندا من حؤکم اده‌جیم.

23او واخت باشلارینا تک بئر چوبان، قولوم داوودو قویاجاغام و او، اونلاری اوتاراجاق و اونلارین چوبانلاری اولاجاق.

24من رب اونلارین تاریسی اولاجاغام، قولوم داوود دا اونلارین ائچئنده رهبر اولاجاقدیر.“ من رب بونو ددئم.

25”اونلارلا بئر صولح عهدی باغلایاجاغام، اؤلکه‌دن ضررلی حیوانلاری قوواجاغام کی، اونلار چؤلده آسایئش ائچئنده یاشاییب مِشه‌لرده یاتسینلار.

26اونلارین اؤزلرئنه ده، تپه‌مئن اطرافینداکی یِرلره ده برکت وره‌جیم. یاغیشی واختیندا یاغدیراجاغام؛ برکتلی یاغیشلار اولاجاق.

27چؤلده‌کی آغاجلار میوه یتئره‌جکلر، تورپاق محصول وره‌جک. خالق اؤز اؤلکه‌سئنده آسایئش ائچئنده یاشایاجاق. یوغ ائپلرئنی قیریب اونلاری قول ادنلرئن اَلئندن قورتاردیغیم زامان بئله‌جکلر کی، رب منم.

28آرتیق مئلّتلرئن قارت مالی اولمایاجاقلار، وحشی حیوانلارین یِمی اولمایاجاقلار. آسایئش ائچئنده یاشایاجاقلار، اونلاری قورخودان دا اولمایاجاق.

29اونلار اوچون شؤهرتلی بئر باغئستان یِتئشدئره‌جیم. داها اؤلکه‌ده آجلیقدان تلف اولمایاجاقلار، مئلّتلرئن تحقئرلرئنه ده دؤزمه‌یه‌جکلر.

30او واخت بئله‌جکلر کی، من، اونلارین تاریسی رب، اونلارلایام و اونلار، ائسرایئل نسلی ده منئم خالقیمدیر.“ پروردئگار رب بویورور.

31”سئزه گلئنجه، منئم قویونلاریم، اوتلاغیمین قویونلاری، سئز ائنسانلارسینیز، من ده سئزئن تارینیزام.“ پروردئگار رب بله بویورور.»

← Chapter 33 Chapter 35 →