Deuteronomy 9

azerbaijan-2013

1ای ائسرایئللی‌لر، قولاق آسین! بو گون اوردون چایینی کچئرسئنئز کی، سئزدن داها بؤیوک، داها قودرتلی مئلّتلرئن تورپاقلارینا مالئک اولاسینیز. اونلارین شهرلری بؤیوک، قالالاری دا گؤیلره چاتیر.

2بو گوجلو، اوجابوی خالق عَناقلی‌لاردیر. اونلاری تانی‌ییرسینیز و حاقلاریندا بله اشئدئبسئنئز: ”عَناقلی‌لارین قاباغیندا کئم دایانا بئلر؟“

3اونا گؤره بو گون بئلئن کی، سئزئن قاباغینیزدا گدن تارینیز رب، هر شیی یاندیریب یاخان آلوودور. رب اونلاری قیراجاق، قاباغینیزدا بویون اَیدئره‌جک، اله کی، ربّئن سئزه ددئیی کئمی اونلاری قوووب تزلئکله محو اده‌سئنئز.

4تارینیز رب اونلاری قاباغینیزدان قوواندا اوره‌یئنئزده دمه‌یئن: ”رب بئزی بورایا صالحلئیئمئزه گؤره گتئردی کی، بو اؤلکه‌نی آلیب اونا صاحئب اولاق.“ رب بو مئلّتلری اونلارین شرارتلرئنه گؤره قاباغینیزدان قووور.

5تورپاقلارینا گئرئب اورایا مالئک اولماغینیز سئزئن صالحلئیئنئزه گؤره، اوره‌یئنئزئن دوزلویونه گؤره دیئل. آنجاق تارینیز رب بو مئلّتلری پئس عمل‌لرئنه گؤره سئزئن قاباغینیزدان قووور کی، آتالارینیز ائبراهئمه، ائسحاقا، و یعقوبا ائچدئیی آندی تصدئق اتسئن.

6بئلئن کی، تارینیز رب صالحلئیئنئزه گؤره بو گؤزل تورپاغی سئزه ورمئر کی، اونا مالئک اولاسیز. چونکی سئز دئکباش بئر خالقسینیز.

7خاطیرلایین و بونو یاددان چیخارتمایین کی، تارینیز ربّی صحرادا نجه قضبلَندئردئنئز؛ مئصئر تورپاغیندان چیخدیغینیز گوندن بو یره گلنه‌جک ربّئن ضئدّئنه نه قدر عوصیان اتدئنئز.

8سئز ربّی حتّا خورِبده قضبلَندئردئنئز و رب او قدر قضبلَنمئشدی کی، سئزی محو اده‌جک ائدی.

9او زامان کی، ربّئن سئزئنله اتدئیی عهدئن داش لؤوحه‌لرئنی آلماق اوچون داغا چیخدیم، اورادا قیرخ گون-قیرخ گجه قالدیم: نه چؤرک یدئم، نه ده سو ائچدئم.

10رب تاری منه اؤز بارماغی ائله یازدیغی ائکی داش لؤوحه وردی. ییغیلدیغینیز گون داغدا ربّئن سئزه آلووون ائچئندن بئلدئردئیی بوتون سؤزلر اونلارین اوستونده یازیلمیشدی.

11رب ائکی داش لؤوحه‌نی یعنی عهد لؤوحه‌لرئنی قیرخ گون-قیرخ گجه‌نئن آخیریندا منه وردی.

12سونرا رب منه ددی: ”قالخ، بورادان تز آشاغی اِن، چونکی مئصئردن چیخارتدیغین خالق عئفّتسئزلئک ادئر. اونلار بویوردوغوم یولدان یامان تز آزیبلار؛ اؤزلرئنه تؤکمه بوت یارادیبلار.“

13رب منه بونو دا ددی: ”گؤرورم کی، بو خالق حقئقتن دئکباش خالقدیر.

14قوی اونلاری محو ادئم. آدلارینی گؤیلرئن آلتیندان سئلئم. سندن اونلاردان داها گوجلو، داها بؤیوک مئلّت تؤرده‌رم.“

15داغ آلوولانیب یانارکَن، من دؤنوب آشاغی اِندئم. عهدئن یازیلدیغی ائکی لؤوحه الئمده ائدی.

16گؤردوم کی، حقئقتن تارینیز ربّئن ضئدّئنه گوناه ادئبسئنئز. اؤزونوز اوچون دانایا بَنزه‌ر بئر تؤکمه بوت دوزَ‌لدئبسئنئز و ربّئن سئزه بویوردوغو یولدان یامان تز آزیبسینیز.

17بونا گؤره ده الئمده توتدوغوم ائکی لؤوحه‌نی آتدیم و گؤزونوز قاباغیندا اونلاری پارچا-پارچا اتدئم.

18گئنه ربّئن حوضوروندا قیرخ گون-قیرخ گجه یره سَرئلئب قالدیم، نه چؤرک یدئم، نه ده سو ائچدئم؛ چونکی گوناه اتمئشدئنئز و ربّئن گؤزونده پئس ساییلان ائشلر گؤروب اونو قضبلَندئرمئشدئنئز.

19ربّئن آلوولانان قضبی قاباغیندا قورخدوم. قضبی او قدر آلوولانمیشدی کی، سئزی محو اتمک ائسته‌یئردی. آمّا رب گئنه ده یالواریشیمی اشئتدی.

20ربّئن قضبی هارونا دا قالخمیشدی. ائسته‌یئردی اونو دا محو اتسئن. او آن هارون اوچون ده یالواردیم.

21اتدئیئنئز گوناه اسبابینی یعنی او دانایا بَنزه‌ر تؤکمه بوتو گؤتوروب اودا آتدیم و سیندیردیم، اَزئب توزا دؤندَ‌ردئم. سونرا توزو داغدان آخان سویا تؤکدوم.

22سئز تَبعِرادا، مَسّادا، قئبروت‌هَتّعه‌وادا دا ربّی قضبلَندئردئنئز.

23رب سئزی قِدِش‌بَرنِعه‌دن یولا سالارکَن بله بویورموشدو: ”گدئن، سئزه وره‌جیئم تورپاغی اؤزونوز اوچون مولک ادئن.“ سئز آمّا تارینیز ربّئن امرئنه عاصی چیخدینیز؛ ربّه اعتئماد اتمه‌دئنئز، سؤزونه ده قولاق آسمادینیز.

24سئزی تانیدیغیم گوندن ربّه عاصی اولدونوز.

25رب سئزی محو اده‌جیئنی ددئیی اوچون، قیرخ گون-قیرخ گجه اونون حوضوروندا یره دؤشه‌نئب قالدیم.

26ربّه یالواریب ددئم: ”یا پروردئگار رب، خالقینی، اؤز ائرثئنی، عظمتئنله خئلاص اتدئیئن، قودرتلی اَلئنله مئصئردن چیخارتدیغینی محو اتمه.

27قوللارین ائبراهئمی، ائسحاقی، یعقوبو یادا سال. بو خالقین دئکباشلیغینا، پئسلئیئنه، گوناهینا نظر سالما.

28یوخسا بئزی چیخارتدیغین اؤلکه‌نئن خالقی دئیه‌جک کی، رب اونلاری وعده وردئیی تورپاغا آپارا بئلمه‌دی و بو خالقدان نئفرت اتدئیی اوچون اونلاری صحرادا محو اتمک مقصدی ائله مئصئردن چیخارتدی.

29حال بو کی، اونلار سنئن خالقین، سنئن ائرثئندئر. سن اونلاری بؤیوک قودرتله، اوزانان قولونلا مئصئردن چیخاردیبسان.“

← Chapter 8 Chapter 10 →