Deuteronomy 29

azerbaijan-2013

1رب ائسرایئل اؤولادلاری ائله خورِب داغیندا عهد باغلامیشدی. موآبدا دا موسایا امر اتدی کی، تزه‌دن عهد باغلاسین. عهدئن سؤزلری بونلاردیر:

2موسا بوتون ائسرایئللی‌لری بئر یره ییغیب اونلارا بله ددی: «گؤردونوز کی، ربّ مئصئرده گؤزلرئنئز قاباغیندا فئرعونا، بوتون اعیانلارینا و بوتون اؤلکه‌سئنه نه اتدی.

3بؤیوک ائمتاحانلاری، او بؤیوک علامتلری و مؤجوزه‌لری اؤز گؤزونوزله گؤردونوز.

4لاکئن رب بو گونه‌جک سئزه آنلاماق اوچون اورَک، گؤرمک اوچون ائکی گؤز، اشئتمک اوچون ائکی قولاق ورمه‌یئب.

5رب دیئر: ”سئزی قیرخ ائل صحرادا گزدئردئم. اَینئنئزده‌کی پالتار، آیاغینیزداکی چاریق ییرتیلمادی.

6چؤرک یِمه‌دئنئز، شراب یا دا کِفلَندئرن ائچکی ائچمه‌دئنئز. بونلاری اونا گؤره اتمئشم کی، منئم تارینیز رب اولدوغومو بئله‌سئنئز.“

7بورایا چاتاندا خِشبون پادشاهی سئخونلا باشان پادشاهی عوگ بئزئمله دؤیوشه باشلادیلار. آمّا اونلاری مغلوب اتدئک.

8تورپاقلارینی اَله کچئردئب ائرث اولاراق رِعوبئنلی‌لره، جادلی‌لارا، مِنَسّه قبئله‌سئنئن یاریسینا وردئک.

9اَله گؤتوردویونوز هر ائشده اوغور قازانماق اوچون بو عهدئن هر سؤزونه دئقّتله عمل ادئن.

10بو گون سئز هامینیز، قبئله باشچیلارینیز، آغساقّاللارینیز، مأمورلارینیز، ائسرایئللی‌لرئن هامیسی،

11اوشاقلارینیز، آروادلارینیز، اوردوگاهینیزدا یاشاییب اودونوزو دوغرایان و سویونوزو داشییان یاد اِللی‌لر تارینیز ربّئن قاباغیندا دایانیبسینیز کی،

12بو گون تارینیز ربّئن آند ائچه‌رک سئزئنله باغلادیغی بو عهدی حیاتا کچئرده‌سئنئز،

13اِله کی، بو گون او سئزی اؤز خالقی اولاراق برقرار اتسئن و سئزه سؤز وردئیی کئمی، آتالارینیز ائبراهئمه، ائسحاقا و یعقوبا ائچدئیی آندا گؤره سئزئن تارینیز اولسون.

14من بو عهدی و آندی فقط سئزئنله یوخ،

15تاریمیز ربّئن حوضوروندا بئزئمله برابر دورانلارلا و بو گون یانیمیزدا اولمایانلارلا دا باغلاییرام.

16مئصئرده نجه یاشادیغیمیز، او بئری مئلّتلرئن آراسیندان کچئب بورایا نجه گلدئیئمئزی اؤزونوز ده بئلئرسئنئز.

17اونلارین آراسیندا ائیرنج شیلری، آغاجدان، داشدان، قیزیلدان، و گوموشدن دوزَ‌لدئلَن بوتلری گؤردونوز.

18مبادا بو مئلّتلرئن آللاهلارینا گدئب سئتایئش اتمک اوچون بو گون آرانیزدا تارینیز ربدن اوره‌یی دؤنَن کئشی، آرواد، نسئل، و قبئله اولسون. مبادا آرانیزدا بله زَهَرلی و آجی کؤک اولسون.

19بو آندین سؤزلرئنی اشئدن زامان کئمسه اؤز-اؤزونه گؤز آیدینلیغی ورئب بله بئر فئکره دوشمه‌سئن: ”سالامات قالاجاغام، اوره‌یئمئن عئنادیندا یرئدئیئم حالدا یاشاییم.“ بو فئکئر سولو تورپاغا قورولوق گتئرَر.

20بله آدامی رب باغیشلاماق ائسته‌مز. او آدامین ضئدّئنه ربّئن قضبی قالخار و قیرتی او آدامین ضئدّئنه آلوولانار. بو کئتابدا یازیلان بوتون لعنتلر باشینا تؤکولر و رب اونون آدینی گؤیون آلتیندان سئلر.

21رب بوتون او لعنتلرئن موطابئقئنه کی، بو شرئعت کئتابیندا یازیلان عهدئن ائچئنده وار، اونو ائسرایئلئن بوتون قبئله‌لری ائچئندن چیخاردار کی، فلاکته دوشسون.

22گله‌جک نسئل، سئزدن سونرا گلن اؤولادلارینیز و اوزاق دئیاردان گلن یاد اِللی‌لر بو اؤلکه‌نئن بلالارینی، ربّئن اورایا گؤندَردئیی ناخوشلوقلاری گؤروب دئیه‌جکلر.

23بوتون اؤلکه یاناجاق، گوگورد و دوزلا اؤرتوله‌جک، توخوم اَکئلمیه‌جک، گؤیَرتی گؤرونمیه‌جک، اوت بئتمیه‌جک. اؤلکه ربّئن آلوولانان قضبی ائله وئران اولاجاق، نجه کی، سودوم، گومورا، اَدما و صِبوعئم یِرله بئر اولموشدو.

24بوتون مئلّتلر دئیه‌جکلر: ”رب بو اؤلکه‌یه نئیه بله اتدی؟ بو بؤیوک قضب نئیه آلوولاندی؟“

25او زامان جاواب وره‌جکلر: ”چونکی اونلار او عهدی آتدیلار کی، آتالارینین تاریسی رب اونلاری مئصئر دئیاریندان چیخارداندا اونلارلا باغلامیشدی.

26گدئب تانیمادیقلاری آللاهلارا، ربّئن اونلارا بخش اتمه‌دئیی باشقا آللاهلارا قوللوق و پرستئش اتدئلر.

27اونا گؤره ربّئن قضبی بو اؤلکه‌نئن ضئدّئنه آلوولاندی، اورانی بو کئتابدا یازیلان بوتون لعنتلره دوچار اتدی.

28رب قضب، حئرص و بؤیوک حئدّتله اونلاری اؤلکه‌لرئندن قوپارتدی و بو گون اولدوغو کئمی اونلاری آیری بئر تورپاغا آتدی.“

29سئرّلر تاریمیز ربّئندئر، لاکئن آشکار ادئلَن شیلر بئزه و اؤولادلاریمیزا ابدئلئک عاییددیر، اله کی، بو قانونون بوتون سؤزلرئنه عمل ادک.

← Chapter 28 Chapter 30 →