Deuteronomy 25

azerbaijan-2013

1ائنسانلار آراسیندا موناقئشه اولسا، قوی اونلار محکمه‌یه گتسئنلر. حاکئملر بو ائشه باخیب حاقلی آداما برائت، آمّا حاقسیزا جزا ورسئنلر.

2اگر تقصئرکار آدام کؤتَکلَنمه‌یه لایئقدئر، قوی حاکئم اونو یره اوزاندیریب کؤته‌یی گوناهینین آغیرلیغینا گؤره ووردورسون.

3تقصئرکارا قیرخ ضربدن آرتیق وورولماسین. اگر قیرخدان چوخ ضربه ووراسینیز، هموطنئنئز گؤزونوز قاباغیندا ذلئل اولا بئلر.

4خرمن دؤیَن اؤکوزون آغزینی باغلامایین.

5قارداشلار بئر یرده یاشایان زامان، اگر اونلاردان بئری اؤلسه و اؤله‌نئن اوغلو اولماسا، دول آرواد آیری عایئله‌دن اولان بئر آداما اَره گتمه‌سئن. اَرئنئن قارداشی گلئب اونو آرواد آلسین و قایین-قَیّوملوق وظئفه‌سئنی یرئنه یتئرسئن.

6آروادین دوغاجاغی ائلک اوغول، اؤلَن قارداشینین آدینی یاشاتسین. قوی ائسرایئلده مرحومون آدی باتماسین.

7کئم مرحوم قارداشینین دول آروادینی آلماق ائستمه‌سه، دول آرواد دروازادا یِرلَشَن آغساقّاللارین یانینا گتسئن و بله دسئن: ”قاینیم ائمتئناع ادئر کی، ائسرایئلده قارداشینین آدینی یاشاتسین. ائسته‌مئر کی، منئم اوچون قایین-قَیّوملوق وظئفه‌سئنی ائجرا اتسئن.“

8او واخت شهر آغساقّاللاری اونون قاینینی چاغیریب دانیشاجاقلار. اگر او عئناد ادئب گئنه ده ”اونو آلمیرام“ دِسه،

9او زامان همئن آرواد آغساقّاللار قاباغیندا گلئب قاینینین چاریغینی آیاغیندان چیخارتسین و اوزونه توپوروب دسئن؛ ”قارداشینین نسلئنی یاشاتمایانا بله ادئلئر.“

10ائسرایئلده اونون نسلی ”چاریغی چیخاردیلانین نسلی“ آدلاناجاق.

11اگر ائکی کئشی بئربئری ائله ساواشیرلار و اونلارین بئرئنئن آروادی یاخین گلئر کی، اَرئنی دؤیَن کئشئنئن اَلئندن قورتارسین، و اَلئنی اوزادیب او بئری کئشئنئن جئنسئیّت عوضووندن یاپیشیر،

12بله آروادین اَلئنی کَسئن و رحم گؤرسدمه‌یئن.

13توربانیزدا ائکی جور چکی داشی، بئری آغیر، او بئری یونگول اولماسین.

14اِوئنئزده سئزئن اوچون ائکی جور اؤلچو، بئری بؤیوک، او بئری کئچئک اؤلچَن اولماسین.

15چکی داشینیز، اؤلچونوز دوز و دقئق اولسون کی، تارینیز ربّئن سئزه وره‌جیی تورپاقدا اوزون عؤمور سوره‌سئنئز.

16چونکی تارینیز رب بله پئس ائشلر گؤرن و حاقسیزلیق ادنلردن ائیره‌نئر.

17مئصئردن چیخاندان سونرا عَمالِقلی‌لرئن یولدا سئزه نه اتدئیئنی یادا سالین.

18سئز یورولوب اَلدن دوشَرکَن، اونلار یولدا سئزه هوجوم اتدئلر، آرخادا قالان بوتون گوجسوزلری قیردیلار؛ و تاریدان قورخمادیلار.

19تارینیز رب مولک اتمک اوچون ائرث اولاراق سئزه وره‌جیی تورپاقدا و اطرافینیزدا اولان دوشمنلرئن هامیسیندان راحاتلیق ورنده، گؤیلرئن آلتیندان عَمالِقلی‌لرئن خاطئره‌سئنی سئلئن؛ بونو گرک یاددان چیخارتمایاسینیز.

← Chapter 24 Chapter 26 →