Deuteronomy 17

azerbaijan-2013

1هر هانسی بئر عِیئب و یا شئکستی اولان اؤکوزو یا دا قویونو تارینیز ربّه قوربان اتمه‌یئن. بله اتمک تارینیز رب اوچون ائیرنجدئر.

2تارینیز ربّئن سئزه وره‌جیی شهرلرئن بئرئنده، اگر آرانیزدان هر هانسی بئر کئشی یا دا آرواد چیخسا کی، اونون عهدئنی پوزوب و تارینیز ربّئن گؤزونده پئس اولانی ادئب،

3و گدئب منئم امرئمئن ضئدّئنه آیری آللاهلارا، گونه، آیا و یا گؤی جئسئملرئندن هر هانسی بئرئنه قوللوق ادئب پرستئش اتسه،

4اگر بو حادئثه‌دن خبردار اولاسینیز، اشئتدئکلرئنئزی دئقّتله آراشدیرین. اگر بو خبر دوغرودور و بله ائیرنج شیئن ائسرایئلده باش وردئیی ثابئت اولسا،

5او واخت بله پئس حرکت ادن کئشئنی و یا آروادی شهرئن دروازاسینا گتئرئن و داشا باسیب اؤلدورون.

6اؤلومه محکوم اولان آدام ائکی و یا اوچ نفرئن شاهئدلئیی ائله اؤلدورولمه‌لی‌دئر. تک بئر نفرئن شاهئدلئیی ائله اؤلدورولمه‌سئن.

7او آدامی اوّلجه شاهئدلر، سونرا ده بوتون خالق داشا باسسین. بله‌جه، بو پئسلئک آرانیزدان آتیلسین.

8اگر شهرلرئنئزده آدام اؤلدورمک، موناقئشه و یا یوگوروب یارالاماق داعوالاری وار کی، محکمه‌لرئنئزده اونلار باره‌ده قرار چیخارتماقدا چتئنلئکلره راست گلئرسئنئز، اوندا قالخین و تارینیز ربّئن سچه‌جیی یره گدئن.

9او دؤورده خئدمت ادن لاوئلی کاهئنلرئن یا دا قاضینین یانینا گدئب اونلاردان بو باره‌ده نظر آلین. داعوانین قرارینی اونلار سئزه اعلان اده‌جکلر.

10ربّئن سچه‌جیی یردن سئزه دیئلن قرارا عمل ادئن. دئقّت ادئن کی، سئزه اؤیرتدئکلرئنئن هامیسینا عمل اده‌سئنئز.

11اؤیرَ‌دئلن قانونا و دیئلن قرارا موطابئق رفتار ادئن. امر ادئلنلردن نه صاغا، نه ده سولا دؤنون.

12هر کس کی، اهانت ادئب تارینیز ربّئن حوضوروندا دوران قاضییا و یا کاهئنه قولاق آسماسا، گرک اؤلدورولسون؛ بله‌جه بو پئسلئیی ائسرایئلدن سئلرسن.

13بوتون خالق بو خبری اشئدئب قورخار و بئر داها بو اهانت اولماز.

14تارینیز ربّئن سئزه وره‌جیی تورپاغا گئرنده، اورایا مالئک اولوب اورانی مسکن ادنده، اگر دئیه‌سئنئز: ”بوتون اطراف اؤلکه‌لرده‌کی کئمی بئر پادشاه تعیئن ادک.“

15آرخایین اولون کی، تارینیز ربّئن سچه‌جیی آدامی پادشاه قویاسینیز. پادشاه تعیئن اتدئیئنئز آدام اؤز هموطنلرئنئزدن اولمالی‌دیر. هموطنئنئز اولمایان یاد اِللی بئر آدامی پادشاه اده بئلمزسئنئز.

16قوی پادشاه اؤزو اوچون آت چوخالتماسین. آتلارینی آرتیرماق اوچون خالقی مئصئره دؤنمه‌یه چکمه‌سئن، چونکی رب سئزه بله دیئب: ”بئر ده بو یولدان گری قاییتمایین.“

17پادشاه چوخ آرواد آلماسین، یوخسا اوره‌یی آزار؛ اؤزو اوچون چوخلو قیزیل-گوموش ده ییغماسین.

18پادشاهلیق تختئنه چیخاندا، لاوئلی کاهئنلرئن نظارتی آلتیندا بو قانوندان بئر صورتئنی اؤزو اوچون طومارا یازسین.

19بو قانونون صورتی اونون یانیندا اولسون و عؤمرونون بوتون گونلرئنده اونو اوخوسون کی، بو قانونون بوتون سؤزلرئنه و بو قایدالارا عمل اتمکله تارینیز ربدن قورخماغی اؤیرنسئن.

20اله کی، اؤزونو هموطنلرئندن اوستون توتماسین و امردن نه صاغا، نه ده سولا دؤنسون. او واخت ائسرایئلده اؤزونون و نسلئنئن پادشاهلیغی اوزون اولار.

← Chapter 16 Chapter 18 →