Acts 24

azerbaijan-2013

1بش گوندن سونرا باش کاهئن حنانئیا، آغساقّاللار و تِرتولوس آدلی بئر وکئل‌له گلئب، پولوسون ضئدّئنه والئیه شئکایت اتدئلر.

2پولوسو احضار ادندن سونرا، تِرتولوس اونا ائتّئهام وورماغا باشلاییب ددی:

3«عالئجناب فِلئکس! بئز همئشه و هر زامان بوتون ممنونئیّتله ائقرار ادئرئک کی، سنئن ساینده صولح ائچئنده‌یئک و سنئن بصئرتئنله بو خالق اوچون هر یرده ائصلاحات باش ورئر.

4آمّا سنه داها آرتیق باش آغریسی ورمه‌مک اوچون، خاهئش ادئرم کی، اؤز مرحمتئنله بئزه قیسا بئر زامان قولاق آساسان.

5بئز بو آدامی دوغرودان دا موفسئد تاپمیشیق، بوتون یر اوزونده یاشایان یهودئلری عوصیانا قالدیریر و نَصرانی فئرقه‌نئن ده رهبری‌دئر.

6بو آدام حتّا چالیشدی کی، معبدی نجئس اتسئن. بئز اونو توتدوق (و ائسته‌دئک کی، اؤز شرئعتئمئزه گؤره اونو موحاکئمه ادک.

7لاکئن مئن‌باشی لئسئیاس گلئب، اونو زورلا الئمئزدن آلدی.

8و اوندان شئکایت اِدَنلره امر وردی کی، سنئن یانینا گلسئنلر.) سن اؤزون ده بوتون بو مطلبلر حاقّیندا اونو ائستئنطاق ادئب، ووردوغوموز ائتّئهاملارین دوغرو اولدوغونا یقئن تاپا بئلرسن.»

9یهودئلر ده بو ائتّئهام وورماغا قوشولوب، بو شیلرئن بله اولماسینی تصدئق اتدئلر.

10والی، پولوسا دانیشماق اوچون ائشاره اِدَنده، پولوس جاواب وردی: «سنئن چوخ ائللردن بری بو خالقا قاضی اولدوغونو بئلئرم، اونا گؤره ده، ممنونئیّتله حاقّیمدان دئفاع ادئرم.

11اؤیرنه بئلرسن کی، اورشلئمه عئبادت اتمک اوچون گلدئیئمدن، هچ اون‌ائکی گون کچمه‌یئب.

12منی نه معبدده، نه کنئسه‌ده، نه ده شهرده تاپماییبلار کی، بئری ائله موباحئثه اتمئش اولوم، یا دا عوصیان قالدیریم.

13سنئن حوضوروندا منه ووردوقلاری ائتّئهاملاری دا ثوبوت اده بئلمئرلر.

14لاکئن بونو سنئن حوضوروندا قبول ادئرم کی، اونلارین فئرقه ددئیی طرئقته اساسن، من آتالاریمیزین تاریسینا حقئقتن خئدمت ادئرم، شرئعتده و پیغمبرلرده یازیلان شیلرئن هامیسینا دا ائنانیرام.

15و اونلارین اؤزلرئنئن ائناندیقلاری کئمی، من ده تارییا اومئد ادئرم کی، هم صالح آداما، هم ده پئس آداما اؤلولرئن دئرئلمه‌سی اولاجاقدیر.

16بونا گؤره، دائم چالیشیرام کی، تاری و ائنسانلار قاباغیندا وئجدانیم پاک اولسون.

17چوخ ائللردن سونرا گلدئم کی، خالقیما صدقه‌لر گتئرئم و قوربان تقدئم ادئم.

18معبدده، طاهئر اولونموش حالدا، بونلارلا مشغول ائدئم، اطرافیمدا دا نه قالابالیق نه ده ولوله وار ائدی کی، منی تاپدیلار. آمّا بعضی آسئیالی یهودئلر ده منئمله وار ائدئلر کی،

19اونلارین دا بورادا اولماسی لازیمدیر کی، اگر منئم ضئدّئمه شئکایتلری وارسا، سنئن حوضورونا تقدئم اتسئنلر.

20و یا قوی اله اؤزلری دسئنلر کی، شورانین حوضورونا چیخدیغیم زامان، نه حاقسیزلیق منده تاپدیلار.

21مگر بو بئرجه سؤز اوچون کی، اونلارین آراسیندا اولان زامان قیشقیریب ددئم: ”من بو گون اؤلولرئن دئرئلمه‌سی اوچون سئزئن حوضورونوزدا موحاکئمه اولونورام.“»

22آمّا فِلئکس، طرئقت باره‌سئنده داها دقئق معلوماتی اولدوغونا گؤره، ائشی تأخئره سالیب ددی: «مئن‌باشی لئسئیاس گلدئکدن سونرا سئزئن ائشئنئزه یتئشه‌جه‌یم.»

23و یوزباشییا امر اتدی کی، پولوسو نظارت آلتیندا ساخلاسین، لاکئن اونا آزادلیق ورسئن و دوستلارینین هچ بئرئسئنئن اونا خئدمت اتمه‌سئنه مانع اولماسین.

24آمّا بئر نچه گوندن سونرا، فِلئکس یهودی آروادی دروسئلا ائله گلئب، پولوسو چاغیرتدی و اونون مسئح عئسایا اولان ائمان حاقّیندا دانیشدیغینی اشئتدی.

25پولوس صالحلئکدن، نفسه حاکئم اولماقدان، و گله‌جک موحاکئمه گونوندن بحث ادنده، فِلئکس قورخویا دوشوب ددی: «ائندی مورخّصسن، گت. واختیم اولاندا سنی چاغیرتدیرارام.»

26همن زاماندا اومئد ادئردی کی، پولوس اونا پول وره‌جک. بونا گؤره ده، اونو تز-تز چاغیرتدیریب اونونلا صؤحبت ادئردی.

27آمّا ائکی ائل کچئب گدندن سونرا، فِلئکسئن یرئنه پورکئیوس فِستوس گلدی. فِلئکس ده یهودئلرئن ریضاسینی قازانماق اوچون پولوسو حبسده ساخلادی.

← Chapter 23 Chapter 25 →