Jeremiah 21

Ayamar Bible (Qullan Arunaca)

1Sedequías reyisti, Malquías jaken Pasur yokapampiru; Maasías jaken Sofonías sacerdote yokapampiruw Jeremiasan ucaru aqham sasa qhitäna: “Achict'asipjjsmawa, Tatituruy nanacjjata jisct'am, Babilonianquiri Nabucodonosor reyiw, nanacaru nuwantasipquitu. Inampis Tatitojj mä milagro lurañ munascaspa, uqhamat Nabucodonosor reyerojj aca chekata sarayjjaspa” sasa. Uqhamasti Tatitojj Jeremiasarojj parljjayaraquïnwa,

3Jeremiasasti Sedequías reyin qhitatanacaparuw aca arunacjja saraquïna, aqham sasa: “Sedequiasarojj aqham sapjjam:

4Israelan Tatitu Diosapajj aqham siwa: ‘Cawquïri tropanacampitejj jumanacajj nuwantasipcta ucanacjja kheparuw jittayä, Babilonianquir reyin tropanacaparu, caldeonacarusa, perkanacatjja jayaruw jittayä, ucatsti aca marca taypiruw tantacht'araquï.

5Naya quipcaw jumanacat nuwasiraquï, wali jach'a ch'amampi, jach'a akquiri colerasiñajjampi, uqhamaraqui jach'a colerasiñampi.

6Aca marcanquiri take jakenacarusti jiwarayaraquïwa; jakenacasa, animalanacasa mä jach'a usumpiw jiwarapjjani.

7Uca khepatsti, Judá orakenquiri Sedequías reyerojj Nabucodonosoran amparaparuw catuyaraquï, uqhamaraqui yakha uñisirinacapan amparaparusa, take jilïri oficialanacapampi soldadonacapampi chica, cawquïri jakenacatejj marcan jilt'asipcaquini; usunacatsa, guerranacatsa uqhamaraqui mach'anacatsa. Nayaw jupanacarojj espadampcama jiwarayayäjja jan arjjatasisa ni qhuyapt'ayasisa. Naya Tatituw ucjja arsta.’

8“Jakenacarojj saraquim, naya Tatituw sista: ‘Nayajj jumanacarojj pä thaqui ajllisipjjañamataqui uscurapipjjsma: Jacañ thaquimpi, jiwaña thaquimpi.

9Aca marcar kheparirejja, guerrana, mank'atjama, usumpiw jiwarani. Ucampisa, cawquïrinacatejj mistjjapjjani, jichha nuwantanqui uca caldeonacaru catuyasjjaraquini ucanacasti, janiw jiwapcaniti; uqhamat jacañanacapsa khespiyasipjjañapataqui.

10Nayasti aca marcjjarojj ñankha apaniñwa amtta, janiwa asqui apaniñti. Aca marcjja Babilonianquir reyiruw catuyä, jupasti ninampiw aca marcjja naqhantayaraquini.’ Naya Tatituw ucjja arsta.

11“Judá orakenquiri reyin utaparusti, David reyit jutirinacarusa, nayan sutejjaru aqham saraquim: Tatitun arunacapa ist'am: Sapa urusa cunatejj chekapäqui uca luraraquim; t'akhesiyatanacarusti t'akhesiyirinacapata khespiyaraquim, uqhamata, jan wali luratanacam laycu, colerasiñajjasti ninjama aktascaraquispa, ucatsti naqharaquispa jan qhitinsa jiwarayañjama.

13“Valle uñjjatata marca, pampanjja mä karkaru uñtataraquïtawa, naya Tatitusti, jumataquiw jichhajj sayt'ta. Jumanacasti sapjjtawa: ‘¿Qhitis nuwistaspa? ¿Qhitiraquisa imantasiñascamajja purt'anispa?’ sasa.

14Nayasti luratanacamarjamaw mutuyapjjäma; ch'uminacamarusti ninampiw wiycataraquëjja, uca ninasti take ucsa tokenacwa naqhantaraquini. Naya Tatituw ucjja arsta.’ ”

← Chapter 20 Chapter 22 →