Ezekiel 21

Ayamar Bible (Qullan Arunaca)

1Tatitusti nayan ucaru jutasinjja, saraquituwa:

2“Jumasti chacha, jichhasti Jerusalén marca tokeru uñtam, ucatsti ucanquiri templotaqui arunacam arsum. Nayan sutejjaru Israel marcataqui arsuraquim,

3aqham sasa: ‘Aqham siw Tatitojja: Nayajj jumanacan uñisirimaw tucuracta. Espadajj apsusisaw asqui jakerusa, ñankha jakerusa jiwarayäjja.

4Jïsa, nayajj espadajjampiw takenirus jiwarayäjja, juchanirusa jan juchanirusa, amstat kalltasina, aynach tokeru tucuyasa.

5Take jakenacaw yatipjjaraquini, naya Tatitun espad aytatajja, janiraquiw uca espadajj-jja imcäti.’

6“Jumasti, chacha, jichhajj walpun jacham, chuymamajj k'ala chhaktatäcaspas uqhama; take jakenac nayrakatan jacham.

7Ucattejj jumaru jisct'apjjätam: ‘¿Cunatsa jachta?’ sasajja, jupanacarojj saraquim: ‘Mä jan wali lurasïwin lurasiñapa yatta, ucatwa jachta’ sas saraquim. ‘Take jakenacasti jan ch'amanjamaw uñjasipjjani, jan cunsa lurirjamaraqui; janiw qhitinsa ch'amajj utjcaniti, takenis ajjsarañatjja konkorinacapa qhathatiyapjjaraquini. Horasajj niyaw purinjje, ucanacan kalltasiñapasti niya jac'ancjjewa’ Naya Tatituw ucjja arsta” sasa.

8Tatitusti nayan ucaru jutasinjja, saraquituwa:

9“Jumasti chacha, nayan sutejj-jjaru parlam, jupanacarojj saraquim, naya Tatitun jumaru uc parlañamataqui mayitajja, aqham sasa: “¡Espadawa, espadawa! Suma afilt'ata, llijquiriraquiwa.

10Jiwarayañataqui afilt'atawa, llijullijunaca sarayañataqui suma llijquir kaksutawa;

11maynin apjjaruñapataquiw uqham llijquir kaksuyapjje. Espadasti afilata, suma llijquir kaksutaraquiwa, jake jiwayir jaken amparaparu ayjjaruyañataqui.

12Jumasti chacha, ¡arnakasim, warariraquim, ucasti marcajjar jiwarayañataqui uchatawa, Israel marcan take marca apnakerinacaparu! Jupanacasti marcajjampi chica jiwarañataqui juchañchatäpjjewa, jichhajj uca aykoñat lek'esim.

13Naya Tatituw ucjja arsta.”

14“Jumasti, chacha, nayan sutejj-jjaru parlam, uca espadarusti juc'ampi waytaraquim, pä cuti jan ucajj quimsa cuti colerampi chhojjriñchjañapataqui, mä jiwayir espadawa, ajjsarcaña jiwarayiri espadawa, jakenacarusti take chekanwa ajjsarañampi phokhantaraqui, waljaniruw jiwarayaraquini.

15Take utanacaparuwa uca jiwarayir espadjja uscuracta, llijullijunac sarayañataqui suma llijquir kaksut espadawa, jiwarayañataqui afilata espadawa.

16¡Uqham afilatwa munsma ch'ekarusa, cupirusa, ucsarusa, acsarusa qharinokasquiri!

17Nayasti uca espadarojj juc'ampi waytaraquï, colerasiñajjajj samarañapcama. Naya Tatituw ucjja arsta”.

18Tatitusti nayan ucaru jutasinjja, saraquituwa:

19“Pä thaqui waquicham Babilonianquir reyejj espadapampi pasañapataqui. Uca pä thaquisti mä sapa marcatwa mistuniñaparaqui. Uca thaqui kalltarusti uscuñamaraquiwa mä chimpu, cawquirutejj uca thaquejj sarqui uca yatiñataqui.

20Cawqui thaquinjamtejj reyejj espadapampi pascani uca thacwa lurañamaraqui. Uca marcanacasti acanacawa: Rabá marca, ucasti amonitanacan orakepanquiwa, ucjjarusti Jerusalén marca, cawquïritejj Judá orakenjja suma perkanacampi perkantatäqui uca.

21Babilonianquiri reyisti cawqhantejj pä thaquejj kalltqui uca chekaruw sayt'asi, ucatsti suertenaca apsusiraqui; flechanacapsa walpun ucsat acsat uñaquipi, diosanacaparusa jisct'asiraquiwa, animalanacan q'iwchanacapsa uñjjataraqui.

22Cupi amparapa tokerusti Jerusalén marca tokeru uñtasaw flechajj misturaqui, ucasti sañ munaraqui, Jerusalén marcajj nuwjaña yänacampi nuwjatäñapawa, uqhamaraqui jiwarayañataqui arsutäñapawa, guerran arnakasiñanaca arnakasipjjañapawa, puncunacapasa nuwantatäñapawa, Jerusalén marca muytarusti suma perkanaca aptatäñapawa, k'ala muyuntayasa.

23Ucampisa Jerusalén marcan jaquir jakenacataquisti aca arunacajj mä c'ari profecía arunacäcaspas uqhamawa, cuna arust'äwinactejj lurapcän uca laycu. Ucampisa aca arunacajj juchanaca lurapjjatap laycu arsüwi arunacawa, cunjämatejj jupanacajj caturata uñjasipcani uca yatiyäwi arunacawa.

24Ucatpï Tatitojj sejja: ‘Jumanacan ñankha luratanacamajja, jake jiwayatanacamasa take chekana khanaw uñsti; take luräwinacana jucha luratanacamasti khanaquiwa take chekansa uñstaraqui. Ucatpï jichhajj caturata uñjasipjjätajja.’

25Jumarusti, Israel marcan ñankha reyipa, jake jiwayiri, jichhajj khepa mutuyäwi catokañama horasajj niyaw purinjje.

26Ucsti naya Tatituw arsta: ‘Ch'okasiñamjja aparapjjätamwa, coronamsa aparapjjaraquïtamwa; take cunasa mayjt'ataraquïniwa; cunatejj mankhancqui ucasti patancjjaniwa, patjjanquiristi mankhancaraquiniwa.

27Take cunsa mayjaru t'unthapitwa jaytawayaraquëjja, take cunas t'unthapitcama. Ucampisa take ucanacajj lurasiniwa, cunapachatejj nayajj siscä qhitirutejj take acanaca lurañapataqui ucaru, uqhamat cheka cancañajj utjañapataqui.’

28“Jumasti, chacha, nayan sutejj-jjaru parlam, Israel marcaru jisc'achiri amonita jakenacarusti saraquim: ‘Espadajj niya apsutawa jumanacar jiwarayañataqui, suma llijquiri kaksutaraquiwa llijullijunaca sarayañataqui, uqhamaraqui take cun t'unjañataquisa.

29Unañchäwi uñjatanacapasti c'ariwa, cunatejj acat kheparu pascani ucanacat parlatanacapas c'ariraquiwa. Espadasti uca ñankha jake jiwayiri jakenacjjaruw puriraquini. Khepa mutuyäwi catokaña horasapasti niya jac'ancjjewa.

30¡Espada, imañamaru cutintjjam! Nayaw jumarojj uñjäma, cawqhantejj jumarojj lurcsma uca chekana, cawqha orakentejj nascta uca orakena.

31Jumjjarusti colerasiñajj-jja mä naqhantiri ninjamwa warjjatanëjja; cawquïri jakenacatejj t'unjaña uqhamaraqui wali khorüña yatipjje uca jakenacaruw catuyäma.

32Naqhantataw uñjasïta, t'unjataraqui; wilamasti take aca orakpachanwa jalaraquini, janiraquiw qhitis jumatjja mayampi amtascjjaniti. Naya Tatituw ucjja arsta.’ ”

← Chapter 20 Chapter 22 →