Ezekiel 20 — Ayamar Bible (Qullan Arunaca)

1Pheskëri phajjsina, tunca uru sarakatarusti, pakallköri maranjja, Israel marcatjja mä kawkha jilïri jakenacaw Tatitur jisct'iri sarapjjäna, ucatsti nayan nayrakatajjaruw kont'asipjjäna.

2Tatitusti nayaruw ucatjja aqham saraquitu:

3“Jumajj chacha, Israel marcanquir jilïri jakenacarojj parlam: ‘Aqham siw Tatitojja: ¿Jumanacajj nayar jisct'asiriti jutapjjta? Jichhasti nayaw jumanacaru sapjjsma, janiw jumanacajj cunsa nayarojj jisct'asipquitätati.’

4Jumajj uca jakenacarojj juchañcham; cuna ajjtascañ luräwinactejj awquinacapajj lurapcän ucanaca jupanacarojj yatiyaraquim.

5Israel marcarojj saraquim: ‘Aqham siw Tatitojja: Cunapachatejj jupanacaru ajlliscäyät ucapachajj wawanacapataquejj mä juramentwa lurtjja, jupanacarojj Egipto orakenwa uñstaracta. Ucansti aqham sasaw juramento luraracta: Nayätwa Tatitu Diosamajja, sasa.

6Uca urusti nayajj jupanacarojj arsuraquïyätwa, uca Egipto oraket apsjjañataqui, cawquïri marctejj nayajj jupanacataqui thakcäyät ucaru irpsjjañataqui, cawqui marcantejj leches misq'is umjam jalasqui ucaru. ¡Take marcanacat sipansa juc'ampi suma marcäquejj ucaru!

7Nayasti takpachaniruw saractjja uca ajjtascaña diosanacapjja apanucjjapjjañapa, uqhamaraqui Egiptonquir yakha diosanacampisa jani k'añuchasipjjañapa, naya Tatitojj Diosätajj laycu.

8“Ucampisa jupanacajj cutcatasipjjetuwa janiraquiw arunacajjsa ist'añsa munapcänti; uca ajjtascañ diosanacapatsa janiw jithektapcänti, janiraquiw Egiptonquir c'ari diosanacapsa apanucuñ munapcänti. Nayasti colerasiñajjsa jupanacjjaru wartaniña amtäyätjja, pachpa Egipto oraken mutuyaña colerajjajj apaktañapcama.

9Ucampisa sutejjan jach'añchäwip laycuw luraracta, uqhamat yakha marcanac nayrakatan jan mayjt'ascañataqui, cawquïri marcanac taypintejj jupanacajj jacapcän uca marcanac nayrakatana, uca marcanac nayräjjanracwa jupanacaru uñstäyätjja, uqhamaraqui Egiptot apsjjañataquis arsuraquïyätjja.

10Nayaw jupanacarojj Egiptot irpsunta, wasara tokeruw irparacta,

11ucanwa jupanacarojj leyinacajja, camachi arunacajj churaracta, qhititejj uca arunacajjarjam sarnakqui ucanacasti jacañwa catokapjjaraquini.

12Uqhamaraquiwa jupanacarojj yatiyta nayan samaraña urojj toketsa, ucasti mä unañchäwiñapänwa nayampi jupanacampi cuna arust'äwtejj lurapcta uca toketa, uqhamaraqui mä amtasïwiñapänwa naya Tatitojj jupanacaru nayataqui yakhachasitajjata.

13Ucampisa jupanacajj wasara tokenjja naya tokew sayt'asjjapjji, leyinacajjarusti janiraquiw jaysapquisa; cuna camachi arunactejj nayajj jupanacaru churcäyät ucanacsa apanucupjjaraquiwa, jupanacasti uca camachi arunacar phokhasajj jacañwa catokapjjasapänjja, uqhamaraqui samaraña urojjsa k'alwa taquisipjjaraqui. Ucatwa nayajj jupanacjjaru colerajj wartaniñ munayäta, pachpa wasaran jupanacar tucjañataqui.

14Ucampisa sutejjar munatajj laycuw jan ucjja lurcti, uqhamat yakha marcanac nayrakatan jan jisc'achata uñjasiscañajjataqui, uca marcanacasti nayarojj uñjapjjaraquitänwa Israelar Egiptot apsunirjja.

15“Wasaransti jupanacarojj juramentompiw arsta, cawquïri oraktejj jupanacaru churcta ucar jan mantayañataquejja; uca orakesti yakha orakenacat sipansa wali sumawa, leches, misq'is umjamaw jalascaraqui.

16Jupanacasti camachi arunacajj-jja apanucupjjewa, leyinacajjarus janiw ist'apcaraquiti, samarañ urunacajjsa ñankhachapjjaraquiwa, chuymanacapanjja yakha diosanacan khepap arcañacpun munasipqui.

17Ucampisa jupanacajj wasaranjja llaccañaw sarnakapjjaraquïna, ucatwa jan jupanacarojj k'ala tucjcaractti.

18Wawanacaparus mayiraquïyätwa, cuntejj awquinacapajj lurapcän ucanacjja jan lurapjjañapataqui, cuntejj awquinacapajj sapcän ucanacsa jan phokhapjjañapataqui, janiraqui yakha diosanacampis k'añuchasipjjañapataqui.

19Jupanacarusti saraquïyätwa: Nayätwa jumanacan Tatitu Diosamajja. Leyinacajjsa, arsutanacajjsa sum phokhapjjam,

20nayan samarañ urunacajjsti wali ajjsart'añampi uñjapjjam, uqhamat uca urunacajj mä unañchawïñapataqui cuna arust'äwinactejj nayajj jumanacampi lurcta uca tokenacatjja, uqhamatwa jumanacajj yatipjjäta nayajj jumanacan Tatitu Diosamätajja.

21“Ucampisa jupanacan wawanacapajj nayataquejj sayt'asipjjaraquiquïnwa. Leyinacajjsa, camachi arunacajjsa janiw phokhapcaraquïnti ni ucarjamas sarnakapcaraquïnti, uca arunacasti qhitinacatejj ucarjama sarnakapqui ucanacarojj jacaña churi, samaraña urunacajjsa taquisipjjaraquïnwa. Nayasti uca pachpa wasaranwa jupanacarojj colerasiñajj wartaniñ munäyäta, pachpa wasaran jupanacar tucjaña, uqhamat colerasiñajjajj samarañapataqui.

22Ucampisa, sutejjar munatajj laycuw nayajj jupanacat qhuyapt'ayasïyäta, jan jisc'achata uñjasiscañajjataqui cawquïri marcanacatejj jupanacaru Egipto marcat apsunir uñjquitu, ucanac nayrakatana.

23Wasaransti jupanacarojj juramentompiw arsuraquïyäta, take marcanac taypiru ananucuñataqui,

24jan camachi arunacajjar phokhapjjatap laycu, uqhamaraqui leyinacajjsa apanucupjjatapata, samarañ urunacajjsti taquisipjjaraquïnwa, awquinacapan c'ari diosanacap uñcatataquïsipcaraquïnwa.

25Ucatsti jupanacarojj cuna leyinacatejj jan asquïcän ucanacwa churaracta, cawquïri camachinacampitejj jan jacaña jicjjatapcasapän ucanacwa churaracta.

26Jupanacarusti yakha diosanacapampi k'añuchasipjjañanacapataquiw apanucuracta, jilïri yokall wawanacapsa uca yakha diosanacar sacrificiot loktapjjañanacapataquiw apanucuracta. Jupanacan ajjsartapjjañanacapataquiw luraracta, ucat nayan Tatitütajja yatipjjañapataqui.’

27“Jichhasti jumajj chacha, Israelita jakenacarojj saraquim: ‘Aqham siw Tatitojj: Awquinacamajj nayarojj ñankhachapjjaraquituwa, jan nayar take chuymampi arcasajja.

28Cunapachatejj nayajj jupanacarojj cuna oraktejj churapjjämaw sasa arscäyäta uca orakeru puriyanjjta ucapachasti, jupanacajj mä jisc'a kollu patansa jan ucajj mä walja laphinacani kokanac c'uchunacansa, sacrificionaca, ofrendanaca churapjjaraquïna, uca luratanacapasti nayarojj walwa colerayaraquitu, suma k'apquiri kollanacapwa uscupjjaraquïna, vino ofrendanacapwa wartapjjaraquïna.

29Nayasti jupanacarojj jisct'araquïyätwa: ¿Cuna yakha diosanacaru yupaychañ altarasa, cawqharutejj jumanacajj yupaychiri sarapcta ucajja? sasa. Ucasti jichhürcama: Yakha diosanacar yupaychaña altar, satapuniwa.’

30“Israel marcarojj saraquim: ‘Aqham siw Tatitojj: ¿Cunataraqui jumanacasti nayra awquinacamjamaraqui k'añuchasiñ munapjjta? ¿Cunataraqui nayarusti jan take chuymampi arcasa uca ajjtascañ yakha diosanacaru yupaychapjjtasti?

31Jumanacan wawanacama sacrificiot loktasa ninampi naqhantayasinjja, uqhamarac ofrendanac churasinsa jumanacajj uca yakha diosanacampejj k'añuchasisipcactawa. ¿Jichhasti israelitanaca, uqhamäcasinti nayar jisct'asiri jutapjjaracta? Naya Tatituw jacañajj laycu juramentompi arsta, janipuniw jumanacampejj jisct'ayascäti.

32Jumanacan p'ekenacamarojj, cawquïri yakha marcanacatejj lawanacaru, kalanacaru yupaychasipqui uqham tucuñamp phokhantatäpjjtawa, ucampis janiw ucajj uqhamäcaniti.

33Naya Tatituw jacañajj laycu juramentompi arsta, jach'a ch'amajjampi, jach'a colerasiñajjampiw jumanacarojj jichhajj apnakapjjäma.

34Nayaw jupanacarojj tantachthapiraquï cawquïri marcanac taypintejj ananucuta jicjjatasipqui ucatjja, jach'a ch'amajja uñacht'ayasa uqhamaraqui jach'a colerasiñajjsa mutuyaraquï.

35Wasara tokenacan marcaparuw irparaquëjja, ucanjja ajanuy ajanupuniw uñcatasipjjaraquëjja luratanacapat wayt'asa,

36cunjämtejj awquinacaparojj Egiptonquiri wasaran wayt'cäyätjja uqhamaraqui. Naya Tatituw ucjja arsta.

37Nayaw jumanacarojj cunjämatejj mä awatirejj tamaparojj suma uñaquipqui uqhama uñjapjjaraquïma, ucatsti sumwa jacthapipjjaraquïma, cuna arust'äwitejj utjcän uca phokhañaruw uchapjjaraquïma.

38Jumanac taypisti cawquïrinacatejj nayatac sayt'asipjje jan walt'añanacsa apanipjje ucanacarusti yakhacharaquïwa. Cawquïri yakha marcantejj jichhajj jacasipqui ucatsti jupanacarojj apsuniraquïwa, ucampis janiw Israel orakerojj mantapcaniti. Ucapachaw jumanacajj yatipjjäta nayan Tatitu Diosätajja.

39“Israel marca, acjja Tatituw arsu: ¡C'ari diosanacamar yupaychiri sarapjjam! Uca pasatatsti jumanacajj nayaruw jaysapjjetäta, janiraquiw nayan kollan sutejjsa taquiscjjapjjätati, uca c'ari diosanacamaru ofrendanac churasa uqhamaraqui ucanacaru yupaychasa.

40Take Israel marcaw nayan kollan kollojjan yupaychapjjetani, Israel oraken utjquis uca jach'a kolluna, ucasti nayan marcajjanquiwa. Naya Tatituw ucjja arsta. Ucanwa nayajj jumanacarojj take chuymampi catokapjjäma; wayt'apjjaraquïma nayaru ofrendanaca loktapjjañanacamataqui, ucanaracwa nayataquejj kallta achunaca apanipjjaraquïta, take cosechanacamatjja nayaru loktanipjjaraquitäta.

41Cunapachatejj nayajj uca yakha marcanacata, cawqhanacantejj ananucuta uñjasisipcta ucanacat tantachthapjjapjjäm ucqhasti, uqhamaraqui nayan k'oma cancañajjsa uñacht'ayapjjäma take marcanac nayrakatana, ucapachaw nayajj jumanacan suma k'apquiri ofrenda loktäwinacamjja catokapjjäma.

42“Cunapachatejj nayajj Israel orakeru puriyjjapjjäma, cawquïri oraktejj nayra awquinacamaru churañataqui arscäyät uca orakeru, ucapachaw jumanacajj yatipjjäta nayan Tatitütajja.

43Ucanwa jumanacajj amtasipjjäta cuna jan wali luräwinacamampitejj uca orakejj taquisitäcän ucjja, jumanacpachatwa ajjtasipjjaraquïta uqhama ñankhanaca lurapjjatamatjja.

44Israel marca, cunapachatejj nayajj jumanacaru uñjapjjäma, jani uca jan wali sarnakäwinacamarjama ni k'añu luräwinacamarjamasa, jan ucasti nayan jach'a sutejj laycuw sum uñjapjjäma, ucapachaw jumanacajj nayan Tatitütajja yatipjjäta. Naya Tatituw ucjja arsta.’ ”

45Tatitusti nayan ucaru jutasinjja, saraquituwa:

46“Jumasti chacha, jichhajj aynach tokeru uñtam, ucsaruraqui arunacamsa parlam; cawquïri ch'umitejj aynach token utjqui ucarusti nayan sutejjaru parlam,

47aqham sasa: ‘Naya Tatituw arsta: Nayasti mä nina nactayaraquï, uca ninasti take kokanacwa naqhantaraquini, kawkha jakenacatejj orakeman utjqui ucanacan ajanunacapsti k'alwa naqhantaraquini, amstat kalltasina aynacha toker tucuyasa.

48Take marcanacaw uñjapjjaraquini uca ninjja naya Tatitun nactayatajja. Uca ninasti janiw jiwarcaniti’ ” sasa.

49Nayasti ucjjarojj saractwa: “Tata, jakenacajj sapjjewa nayajj jan amuyt'caña arunacaqui parlascatajja” sasa.