Deuteronomy 21

Ayamar Bible (Qullan Arunaca)

1“Cawquïri oraktejj Tatitu Diosamajj churcätam uca orakentejj mä jiwayat jakeru uñjapjjäta, janirac qhitin jiwayatapas yatiscaraquiniti,

2ucapachasti jilïri awquinaca, uqhamaraqui juezanacaw tupt'ir sarapjjani, jiwatas jakosqui uca chekat cawquïri marcanacatejj jac'ancqui ucacama.

3Ucatsti uca jac'anquir marcanacan jilïri jakenacapajj, mä vaca kallu catupjjani, cawquïri uywarutejj jan yugojj ayjjatatäqui.

4Uca vaca kalljja mä uma jalasquir jawiraruw irpakawayapjjani, cawqhantejj jan cuna yapus lurasqui ni cunas satatäcaraquiti, ucawjanwa uca vaca kallun cuncap p'acjapjjani.

5“Ucapachasti levita sacerdotenacaw ucar jac'achasipjjani, jupanacaw Tatitu Diosan ajllitäpjje jupar sirviñataqui, yupaychañataqui uqhamaraqui Diosan sutiparu bendiciñataquisa. Take ch'ajjwañanacansa, tokesiñanacansa jupanacan arsutanacaparjamaw t'akjasini.

6Ucatsti take uca marcan jilïri awquinacaw amparanacapjja jarekasipjjani, uca jiwat vaca kalljjaru.

7Ucapachasti aca arunacwa arsupjjani: ‘Janiw nanacajj aca jaquir jiwayapcti, janiraquiw cunjäma jiwatapsa uñjapcti.

8Dios Tata, perdonamay Israel marcamarojja, jumaraquiwa khespiytajja, janiraqui juchañchamti aca jan juchan jaken jiwatapampisa’ sasa. Uqhamatwa jan juchañchatäpcätati uca jaken jiwatapatjja.

9Ucatsti jumanacajj cunatejj Diosataquejj asquïqui ucanac lurapjjaraquïta, jumanaca taypitsa uca jiwayata juchañchatäñsa apanucusaraqui.

10“Cunapachatejj uñisirinacamampi nuwasir sarapjjäta, ucatsti Diosamajj prisioneronac amparamaru catuyapjjätam.

11Jumanacat cawquïrisa uca jakenac taypinjja mä suma warmiru uñjani, ucatsti munaraquini jupan warmipäñapataqui ucapachasti,

12jupajj utaparuw irpasini ñic'utanacap mururasiñapataqui, uqhamaraqui amparapan sillunacapsa qhuchhurasiñapataqui;

13uqhamaraqui prisionerot catutäqui uca isipsa apsusiñapataqui, ucatsti utapan jacañatac kheparjjaracpan, awquipata taycapata mä phajjsi jachasaraqui. Ucanac pasjjepanjja uca israelit jakejj puediw uca warmiru warmt'asjjañjja; jupasti chachapäjjaniwa, maynisti warmiparaqui.

14Ucattejj uca warmirojj jan muncjjani ucqhajj, jupajj jaytjjaniwa sarjjañapataqui, ucampis janiw kollker aljcaspati janiraquiw esclavat apnakcaraquispasa jupan uca warmir deshonratap laycu.

15“Ma jaketejj pani warminïni, mayni warmiparusti wal munaraquini, maynirusti janiraqui, ucatsti panpach warmiraqui jupataquejj wawanïpjjani, ucatsti tayna wawajj jan munat warmïquis ucancaraquini,

16uca jaken yänacapa wawanacapar jaljaña urojj purinini ucqhajj, janiw tayna wawäcaspas uqhamjja uñjcaspati munat warmin wawapäquis ucarojja, uqham lurasasti jan wali luraspa jan munat warmin wawaparojja, cawquïritejj chekpachansa tayna wawapäqui ucarojja.

17Jan ucasti uca uñisit warmin wawaparuwa tayna wawapatjja uñt'asiñapa, ucatjja take yänacapatjja mä ucqhampi churañaparaquiwa; jupaw nayrïri ch'amapan jathapajja, tayna wawjamajja take cunsa chekapa catokerejja.

18“Cawquïritejj jan ist'asiri ñankha wawanïchi, janiraqui awquiparus ist'caracchiti, kawkha jawk'catas awquinacaparojj janipun ist'cchiti,

19ucqhasti awquinacapajj uca wawaparojj marcanquir jilïrinacan tribunalaparuw apapjjani.

20Ucatsti aqham sapjjaniwa: ‘Aca nanacan wawajjajja jan ist'asiri kallasiriraquiwa; janiw cunansa ist'apquituti, jan ist'asisa sarnakeriwa uqhamarus machiriraquiwa’ sasa.

21Ucapachasti takpach marcan jakenacawa kalampi c'upjasin jiwayapjjani. Uqhamatwa jumanacajj marcaman uca ñankha luririnacjja tucjapjjäta, uca yatisinsti israelit jakenacajj wal ajjsarapjjani.

22“Cawquïri jaketejj mä kokar warccatata jiwayatäni mä jach'a jucha luratap laycu,

23ucatsti janchipajj janiw uca arumajj ucan warcusiñapäquiti, jan ucasti uca quipca urpachaw imantjjapjjañama; Diosansti maldicitaw cawquïri jaketejj kokar warccatata jiwqui ucajja, jumanacasti janiw ñankhachapjjañamäquiti cawquïri oraktejj Tatitu Diosamajj jumanacaru churapctam ucjja.

← Chapter 20 Chapter 22 →