Zechariah 5

aymara-1997

1Yaqha unañchäwimp uñjarakta. Mä qillqat llawu alayan tuyuskiri.

2Angelasti jiskt'ituwa: “¿Kuns uñjta?” sasa. Nayasti saraktwa: “Alayan tuyuskir mä qillqat llawu uñjta, ukax sayt'urux llätunka metroniwa, iramarusti pusi metro chikatanirakiwa” sasa.

3Ukat sarakitu: “Ukan taqi aka uraqpacharu purinkani uka ñanqhachäwinakaw qillqata. Purapäxan qillqatäki ukarjamaxa, khiti lunthatanakasa, k'ari juramento luririsa taqiniw mutuyatäpxani.

4Taqi ch'amani Tatituw arsu: ‘Nayaw aka ñanqhachäwi apayanta, lunthataskis ukan utaparu, ukhamaraki k'ari juramento nayan sutix aytasis lurki ukan utapampir mantañapataki. Uka ñanqhachäwisti ukankaniwa jan mä lawasa, mä qalas qhiparañapkama.’ ”

5Ukatsti nayamp parlkäna uka angelax mistxasin, sarakituwa: “¡Uñstanki uk uñtam!”

6Nayasti jiskt'araktwa: “¿Kunarakisti?” sasa. Jupasti sarakituwa: “Ukax mä tupuñawa. Markan jakapki uka jaqinakan juchap tupuñatakiwa” sasa.

7Uka tupuñasti plomot lurat qhuphiñampi qhuphintatänwa. Uka qhuphiña qhuphiratatsti mä warmiw uka tupuñ manqhan qunt'atäskäna.

8Angelasti sarakituwa: “Uka warmix ñanqhawa” sasa. Warmix mistuniñ munäna, ukampis angelaw tupuñ manqharu nukhuntäna, ukat plomot lurat qhuphiñamp qhuphintarakïna.

9Wasitat uñtasinsti, pä warmiruw uñstanir uñjarakta. Uka warminakasti waq'anan chhiqhanakapar uñtata chhiqhanakanïnwa, thayaw jupanakar jalayaskäna, alayanjam uka tupuñ apasxapxarakïna.

10Ukatsti nayamp parlkäna uka angelaruw jiskt'arakta: “¿Kawkirus uka tupuña apapxi?” sasa.

11Jupasti sarakituwa: “Babilonia markaruw apasipki. Uka markan mä uta utachapxani. Uka utax tukutäkani ukkhaw mä altar patxar uka tupuñ uchapxani” sasa.

← Chapter 4 Chapter 6 →