Song of Solomon 5

aymara-1997

1Kullakitay, nayan munasitaxay, panqar yapuxarux mantxtwa. Mirraxampi, q'apkir qullanakaxamp apthapisxtwa, misk'xa tapatpach manq'antta, vinoxsa, lechexsa umt'araktwa. Munat jila masinaka, manq'apxam, umapxarakim, ¡qawqhtix munapkta uk umantapxam!

2Nayax ikiskäyätwa, ukampis chuymaxan janiw ikkäyätti. Ukatsti munasitaxan punkut jawsasinitap ist'ta: “Kullakita, nayan jan llamkt'at palomitaxay, jist'arita! ¡P'iqixax sullamp sullantatawa! ¡Arum sullaw ñik'utaxan jalaski!” sasa.

3Isirasxtwa, ¿kamisarak wasitat isthapisïsti? Kayunakaxsa jariqasxtwa, ¿kamisarak wasitat q'añuchasïsti?

4Nayan munasitaxax punku p'iyat amparap luqantani. ¡Ukaw nayarux walpun chuym ch'allxtayitu!

5Ukatsti munasitaxar punku jist'aririw sartawayta. Amparanakaxatsa, luk'ananakaxatsa mirra q'apkir qullaw punku katuñxar ch'aqaritu. ¡Jupar parlir ist'asax jiwt'irpachayätwa! Munasitaxarusti punku jist'aqta, ukampis jupax sarxataynawa. Jupar thaqhañaruw uchasta, ukampis janiw jikxatkti, jawsaraktwa, jupasti janiw jayskituti.

7Marka uñjirinakaw jikxatitu; jupanakasti nuwjapxituwa, chhuxriñchjapxarakituwa; ¡markar mantañ punku uñjirinakax ch'amampikiw velo isixsa aparapxitu!

8Jerusalenankir warminaka, achikt'asipxsmawa, munasitaxar uñjapxät ukkhax jupar sapxam: —Munasiñat jiwirjamäskiwa —sasa.

9¡Taqi warminakat sipansa wali munkaña! ¿Kunarak munataman utji mayninakat sipansti? ¿Kunarak munataman utji nanakar ukham mayiñamatakisti?

10Nayan munasitaxax janq'ullt'asitawa, walja jaqinak taypinsa uñt'kayawa.

11P'iqipasti suma qurir uñtatawa; ñik'utapax chhiriwa, cuervo jamach'jam ch'iyärarakiwa;

12nayranakapasti lecher sunt'suta pä palomar uñtatawa, jalir uma thiyan sayt'atäsipki;

13ajanupax suma q'apkir panqaranakani jach'a yapur uñtatawa. Laka ispillupasti rosa panqarar uñtatawa, ukat misk'ix jalaraski;

14amparanakapax qurikamakiwa topacio qalanakamp muyukipata; janchipasti suma llust'achsut marfilar uñtatawa, zafiro qalanakamp k'achachatawa;

15kayunakapax mármol qalat lurat sayirinakar uñtatawa, suma quri patxar utt'ayata; sayt'asitapasti wali sumawa, Libanonkir cedro quqar uñtata;

16parlatapax wali muxsawa. ¡Jupax sinti munkayawa! Jerusalenankir warminaka, ukhamaw nayan munasitaxaxa, ukhamaw nayar munasirixaxa.

← Chapter 4 Chapter 6 →