Psalms 86

aymara-1997

1Tatay, ist'akitaya, llakimp atipjatätwa, jan kunanirakïtwa;

2arxatt'akitaya, juman aski arkirimätwa. Jumaw Diosaxätaxa; ¡jumar iyawsir uywatamarux qhispiyakimaya!

3Tatay, nayat khuyapt'ayasita, jumaruw sapür art'asinsma.

4Tatay, uywataman chuymaparux kusisiyakimaya, jumaruw mayisinsma.

5Tatay, jumax munasiñanïtawa, juch pampachirirakïtawa; jumar art'asirinakatakix munasirïtawa.

6Tatay, mayisitaxarux ist'akimaya, ¡achikt'asitaxarux jaysakimaya!

7Llakisiñaxan jumar art'asinsma, juman ist'asirïtam laykuw mayisinsma.

8¡Tatay, janiw khiti diosas jumjamax utjkiti! ¡Janirakiw luratanakamjamax utjkiti!

9Tatay, jumaw taqpach markanak utjaytaxa, jupanakasti jumar yupaychiri, sutim jach'añchiriw jutapxani.

10Juma sapakiw jach'a Diosätaxa; muspharkañanak lurtaxa.

11Tatay, thakhimay uñacht'ayita, jan saraqtas arkañaxataki. Chuymaxasti sutim waqaychirïpan.

12Diosaxay, Tatituxay, taqpach chuymaxampiw yupaychäma, sutimsti wiñayatakiw jach'añchä.

13¡Munasiñamax nayatak jan tupt'kayawa! ¡Wiñay mik'ayar jalantañat qhispiyista!

14Diosaxay, jach'a jach'a tukurinakaw nayatak sartapxi, qhuru jaqinakaw nayar jiwayañatak thaqhapxitu, janiw jumarus axsarapktamti.

15Jumasti, Tatay, khuyapayasir Diosätawa, llamp'u chuymani, munasiñani, aski Diosätawa.

16Uñtanikitaya, ¡nayat khuyapt'ayasita! ¡Aka uywatamar qhispiyam! ¡Ch'amam churam!

17Qhanpun munasiñam uñacht'ayita, uñisirinakaxasti uk uñjapxpan, p'inqa tukupxarakpan. ¡Tatay, jumaw yanapista, chuymacharakista!

← Chapter 85 Chapter 87 →