Psalms 58

aymara-1997

1Marka apnaqirinaka, ¿chiqaparut taqi kunsa uñjapxta?, ¿chiqaparut jaqinakar uñjapxta?

2Janiw ukham lurapktati; jan walinak lurañ amtapxtaxa, jaqinak taypinsti, nuwasiñanak utjayapxtaxa.

3Ñanqha luririnakax taykapan purakapatpach ukham ñanqha lurirïpxi; k'arinakasti janïr yurkasaw k'arinak arsxapxi.

4Katarinakjam jiwayir mich'inïpxiwa, jiwayir mich'in katarir uñtataw jinchunakapsa llupantasipxi, uqaraw tukupxi,

5ukhamat amulljayirin arup jan ist'añataki, layqirin arsutap jan yäqañataki.

6Diosaxay, ¡laka ch'akhanakap t'unaram! Tatay, ¡uka leonanakan kiwunakap t'unsum!

7Ch'umarir umar uñtat chhaqtapxpan; takisit qurar uñtat pharsupxpan;

8ch'urur uñtat phusak tukupxpan, ¡inti jan uñjir wawa sullur uñtat tukusipxpan!,

9janïr amuyasipkipan ch'aphinakjam nakhantapxpan; ch'uxña qurar uñtat qhurutasiñamp jik'inukutäpxpan.

10Aski jaqisti, phuqsur uñjasax kusispan; ¡ñanqha luririn wilapamp kayunakap wilachsuspan!

11Ukapachaw sapxani: “¡Aski jaqix walirukis puriskixä! ¡Diosax chiqapar uñjirïskapunisä!” sasa.

← Chapter 57 Chapter 59 →