Psalms 53

aymara-1997

1Pisi amuyt'an jaqix siwa: “Janiw Diosax utjkiti” sasa, taqiniw ñanqhanak lurasax aynacht'apxi; ¡janiw aski luririx maynis utjkiti!

2Diosax alaxpachatpach jaqinakarux uñtani: “Inach khitis amuyt'asirix utjaspa, inach khitis Diosar thaqhirix utjaspa” sasa.

3Ukampis taqiniw jan walir saranukupxi, taqiniw ñanqhanak lurapxi. ¡Janiw aski luririx khitis utjkiti! ¡Janiw maynis utjkiti!

4Ñanqha luririnakax jan amuyunïpxiwa, markaxar t'ant'jam manq'antirinakax jan amuyt'anïpxiwa, Diosar jan art'asirinakax jan amuyt'asirïpxiwa.

5Janis kunat khathatiñas utjkpan, jupanakax axsarañat wal khathatipxani, uñisirin ch'akhanakap Diosan willitatatap layku. Jupanakasti mä p'inqaw uñjasipxani, jupanakar Diosan jan katuqatap layku.

6¡Israel markan qhispiyasiñapax Jerusalén markat jutakispa! Diosax markapar wasitat kusisiykan ukapachaxa, Jacobun wawanakapax kusisiniwa, taqpach Israel markax k'uchirt'asiniwa.

← Chapter 52 Chapter 54 →