Psalms 39

aymara-1997

1Nayax sum sarnaqañatakiw arsta, arsutaxampis juch jan lurañataki, uñisirixan nayraqatapansa lakaxsa llupt'asiñataki.

2Nayasti amutuw tuküyäta; janiw kuns arskäyätti. ¡Janiw askit kuna parlataxas utjkänti! T'aqhisiñaxasti juk'ampiw jilxatäna;

3¡chuymaxax ninjamaw nakhäna! Ukxat lup'kasasti, juk'ampiw nakhantitu, ukham uñjasisaw jach'at jupar art'asta:

4Tatay, kunjämarus purt'askä ukay yatiyita, qawqha pachampis jakaskä ukay yatiyita, kunja jisk'akis jakañaxax ukay yatiyita.

5Jakañaxatakix juk'a urunakak churistaxa; jakañaxax janiw nayraqataman kunäkisa. ¡Jaqin jakañapax mä samsuñampi sasikiwa!

6¡Jaqin jakañapax mä ch'iwjamakiwa! Inamayaw yänaksa arkuntaski, ukanak khitis katuntasini uksa janiw yatkiti.

7Jichhasti, Tatay, ¿kunsa suyt'iristxa? ¡Jumakiw nayan suyt'añaxätaxa!

8Taqi juchanakaxat qhispiyita; t'axmar jaqinakan nayat larusiñap jan munamti.

9Nayasti amutuw tukta, janiw lakax jist'arkti, jumaw taqi kuns luraskta.

10Janikiy nayarux juk'ampi t'aqhisiyistati; nuwantatanakamax q'alpun aynacht'ayitu.

11Jumaw jaqirux juchapat mutuyas chiqachtaxa, thuthar uñtataw yänakap tukjtaxa. ¡Jaqix mä samsuñampi sasikiwa!

12“Tatay, mayisitaxar ist'ita, ¡t'aqhisiñat jakhusitanakaxar ist'ita!, ¡janikiy jachataxatakix uqar tukumti! Nayax jumatakix jayat jutir jaqïtwa, nayrapach awkinakaxjam sarir jaqikïtwa.

13Janiy ukhamak uñch'ukistati, janïr nay jiwkipana, mä juk'a samart'ayita” sasa.

← Chapter 38 Chapter 40 →