Psalms 38

aymara-1997

1Tatay, janiy q'apisiñamamp tuqintistati, janikiy phiñasiñamamp mutuyistati.

2Mich'inakamax nayaruw chhuqhuntitu; ¡amparamax walpun nayar t'aqhisiyitu!

3Jucha lurataxat q'apisitamatxa, taqpach janchixaw usuntata; ¡ch'akhanakaxas taqpach p'akiratawa!

4Juchanakaxax sintipuniw jatxattitu; janipuniw q'ipxäsirjamäkxti.

5Jan amuyt'asirïtax laykux chhuxrinakaxax thujsantaskiwa.

6Sapürus llakitakiw sarnaqta, p'iqixas alt'ata, q'ala aynacht'ata.

7Jikhanixax ninjamaw nakhitu; ¡janchixas q'ala usuntatawa!

8Jan akch'as ch'amani, q'ala tukjatätwa; ¡ayqutaxas chuymax manqhitpach mistu!

9Tatay, jumaw taqpach amtatanakax uñt'taxa, ¡chuymaxan llakisitapas jumatakix qhanäskiwa!

10Chuymaxax walipuniw putuqi, janiw ch'amas utjkxituti, ¡nayraxas juykt'xarakiwa!

11Uñt'at masinakaxasa, nayar uñt'irinakas jithiqtxapxituwa, wila masinakaxas jayatak uñch'ukipxitu.

12Nayar jiwayañ munirinakax sipitanak ucharapipxitu; aynacht'añax munirinakasti jiwayañ munapxitu, sapüruw nayar jan walt'ayañatak lup'ipxi.

13Janis ist'kiristxa ukham uqaraw tukta; amutükiristsa ukhamaw lakax jan jist'arkti.

14Jan ist'ir jaqir uñtatätwa, jan arsusir jaqjamarakïtwa.

15Dios Tatay, jumarukiw nayax suyt'sma, jumakiy jupanakarux saykatam.

16Nayat jan larusipxañapatakiw mayt'assma, liwiskä ukkha jan kusisipxañapatakiw achikt'assma.

17Chiqpachansa, niya tinkurjamätwa; llakixasti janipuniw apaqtkituti.

18¡Taqi juchanakax arsusxä, ukanakaw walpun t'aqhisiyitu!

19Uñisirinakaxax waljaniptiwa; waljanipuniw ina ch'usat uñisipxitu.

20Aski luratat jan walimpiw kutiyapxitu; aski lurañ munataxat nayatakiw thuqtasipxi.

21Tatay, ¡janikiy apanukt'asistati! Diosaxay, ¡janikiy nayat jayankamti!

22Qhispiyir Diosaxay, ¡jank'akiy yanapt'ir jutita!

← Chapter 37 Chapter 39 →