Psalms 115

aymara-1997

1Tatay, qhapaq sutimarux jach'añchasikimaya, janis nanakarux jach'añchapkita; munasiñam layku, chiqapätam laykuy jach'añchasim.

2¿Kunatarak ñanqha lurir jaqinakast jiskhisipkitani: “Kawkinkarak Diosamasti” sasasti?

3Diosasax alaxpachankiwa; kuntix jupax munki uk luri.

4Diosar jan uñt'irin diosanakapax qurimpita, qullqimpit luratakiwa, jaqin amparapampi luratakiwa:

5lakanïkasas janiw arsupkiti; nayranïkasas janiw uñjapkiti;

6jinchunïkasas janiw ist'apkiti; nasanïkasas janiw mukt'apkiti;

7amparanïkasas janiw llamkt'apkiti; kayunïkasas janiw sarnaqapkiti; mallq'anïkasas janiw arsupkiti.

8Uka diosanakar luririnakax ukanak kipkakïpxiwa, iyawsirinakas pachpakïpxarakiwa.

9Israelitanaka, ¡Tatitur iyawsapxam! Jupaw yanapistu, arxatarakistu.

10Sacerdotenaka, ¡Tatitur iyawsapxam! Jupaw yanapistu, arxatarakistu.

11Tatitur iyawsirinaka, ¡jupar alkatapxam! Jupaw yanapistu, arxatarakistu.

12¡Tatitux jiwasanakat amtasistuwa, askinak churarakistani! Israel markarux askinak churani, sacerdotenakarux askinak churarakini,

13Tatitur iyawsirinakarux askinak churani, jisk'arusa, jach'arusa, taqiniruw churani.

14¡Tatitux wawanakamar waljaniptaypan, jumanakarusa, wawanakamarusa!

15¡Alaxpach akapach lurir Tatitux askinakapay jumanakar churpan!

16Alaxpachax Tatitunkiwa, jaqirusti uraq katuyi.

17Jiwatanakax janiw Tatitur yupaychapkaspati, janirakiw manqhapachankirinakas jach'ar aptapkaspati;

18jiwasanakasti Tatituruw yupaychapxañäni, jichhasa, wiñayan wiñayapataki. ¡Tatitux jach'añchatäpan!

← Chapter 114 Chapter 116 →