Numbers 22

aymara-1997

1Israelitanakax thakhinjam sarasipkakïnwa, ukatsti Moab pampanakaruw purintapxäna, Jordán jawirat inti jalsu tuqiru, Jericó marka uñkatasiru.

2Sipor chachan Balac sat yuqapax Moab markan reyipänwa. Balac reyix kunjämtix israelitanakax amorreonakar lurkatayna ukanak yatïna.

3Israelitanakan waljanïpxatap uñjasax, Moab markankir jaqinakax axsarapxarakïnwa.

4Ukat Moab markankir jaqinakax, Madián markan jilïrinakapar jawsayasin sapxäna: “Israelitanakax kunatix utjkistu taqi ukanak tukjapxani, kunjämtix vacanakax pampanakan utjir ch'uxñanak tukuntki ukhama” sasa.

5Ukapachasti, Beor chachan Balaam sat yuqapax wila masinakapampiw Petor markan jakäna, uka markasti Éufrates jawir thiyankänwa. Balac reyisti markapan jilïrinakaparuw khithäna Balaamar akham sapxañapataki: “Egiptot jaltanxasin mä jach'a markax, nanakan uraqix jak'aruw purinti.

6Jichhpachay jutam, aka markar ñanqhachañataki, nanakat sipan juk'amp ch'amaniwa. Inampis ukhamat nayax jupanakar atipjirista, aka uraqitsa jupanakar alisnukurista. Nayax yattwa juman askinak arsutanakamasa, ñanqhachatamasa, phuqhasirïtapa” sasa.

7Ukatsti Moab, Madián markanakan jilïrinakapax qullqi apt'ataw sarapxäna, israelitanakar ñanqhachatat churañataki, Balaam jak'ar purisasti, Balac reyin arunakap yatiyapxäna.

8Balaamasti jupanakar sänwa: —Jichha arumax akar qhiparapxam, nayasti Tatitun arsutaparjamaw yatiyxapxäma. Moab markankir jilïrinakasti jupampiw qhiparapxäna.

9Uka arumasti Tatitux Balaam chachar uñstasin, jupar jiskt'äna: —¿Khitinakarak jumamp chikäki uka jaqinakasti? —sasa.

10Balaamasti sänwa: —Moab markat jutapxi; Balac reyin khithanakapawa.

11Reyiw jupanakarux akar khithanitayna, reyisti nayan sarañax muni, Egiptot jaltanir mä markxar nayan ñanqhachañaxataki. Uka markasti Moab marka jak'aruw purintatayna, reyisti uraqipat jupanakar jaqunukuñ muni —sasa.

12Tatitusti Balaamarux sänwa: —Jan jupanakamp chik saramti, janirak uka markar ñanqhachamsa, uka markarusti nayaw askinakamp phuqt'ta —sasa.

13Qhipärmanthisti Balaamax sartasisin, Balac reyin khithanit jilïrinakaparuw yatiyxäna: —Markamar kuttxapxam. Janiw Tatitux jumanakampi chika sarañax munkiti —sasa.

14Moab uraqit jutir jilïrinakasti Balac reyin ukaruw kuttawayxapxäna, juparusti sapxänwa: —Balaamax janiw nanakamp chik jutañ munkiti —sasa.

15Ukampis Balac reyix mayamp yaqha jilïrinak khithaskakïnwa, jichhasti waljaniru, nayrïrinakat sipan juk'amp yäqat jilïrinakaru.

16Jupanakasti Balaam thiyar purisinxa sapxänwa: —Sipor chachan Balac yuqapax jumar sistamwa: “Jutakimaya, janikiy ‘janiw’ sistati.

17Nayaw wali jach'añchäwinak churäma, maykität uksa nayax phuqhäwa; aka markar ñanqhachañatak jutakimaya” sasa.

18Ukampis, Balaamax jupanakar sänwa: —Balac reyix qullqini, qurini phuqhantat reyi utapsa churaskitaspa ukkhas nayax janiw jupan mayitap lurkiristti. Janiw nayax Diosaxan arsutapar ch'urkhiskiristti.

19Ukampis jumanakax akan jichhärmax qhiparapxam, kunxay Tatitux luram sischitani —sasa.

20Uka arumasti, Tatitux Balaamar uñstasin akham sarakïna: —Uka jaqinakatix jumar irptir jutapxchi ukaxa, jupanakamp chik saram, ukampis kuntix nayax siskäma ukak luräta —sasa.

21Qhipürusti, Balaamax willjtat sartasïna, ukatsti sarañatak qachu asnop karunt'asinxa moabita jilïrinakamp chikaw saräna.

22Balaamax qachu asnopar lat'xatataw saräna, pani uywatapaw jupamp chik sarapxarakïna. Ukampis Tatitux wal jupatakix q'apisïna, uka jilïrinakamp chik saratapata. Ukat Tatitun angelapax jupa nayraqatan thakhin sayantasïna jan saraskakiñapataki.

23Qachu asnosti Tatitun angelapar espadas ayt'asit chika thakhin sayt'at uñjasaxa, thakhit maysaruw saranuküna, yaqha tuqinjam sarasa; ukampis Balaamax wal asnorux jawq'jäna, thakhir kuttayaniñataki.

24Ukxarusti Tatitun angelapax mä k'ullk'u chiqaruw sayt'asïna, thakhix uva yapu taypinjam saräna, ukasti purap tuqit qalamp pirqantatänwa.

25Asnox Tatitun angelapar uñjasax, maysa pirqa tuqiruw liwkattäna, Balaaman kayup usuchjasa. Ukat Balaamax wasitat asnor jawq'jäna.

26Ukatsti Tatitun angelapax jupanakat nayrst'asinxa, mä k'ullk'u chiqaruw sayt'asïna, ukawjat janiw kawksarus saranukuñjamäkänti.

27Qachu asnosti Tatitun angelapar uñjasax, uraqiruw liwitattäna. Ukat Balaamax q'apisisin, asnorux mä lawampiw jawq'jäna.

28Ukapachaw Tatitux qachu asnor parlayäna, asnosti Balaamarux sänwa: —¿Kunarak jumar kamächsmasti? Akampix kimsa kutiw nayar jawq'jista —sasa.

29Balaamasti sänwa: —Jumax nayat phiskasiskistaxa, mä cuchillotix amparaxan utjitaspaxa, anchhitpachaw jiwayirisma —sasa.

30Ukampis asnox sänwa: —¡Taqi jakäwiman nayax jumar khumunaqsma, uksti sum yattaxa, janiw nayax kunapachas qallkatirïksmati! —sasa. Balaamax sarakïnwa. —Ukax chiqawa —sasa.

31Ukapachaw Tatitux Balaaman nayrap jist'ari, Balaamasti Tatitun angelapar espadas ayt'at thakhin uñjäna. Ukat jupax ajanup uraqir puriyañkam alt'äna.

32Tatitun angelapasti juparux sänwa: —¿Kunatarak qachu asnomar kimsa kuti jawq'jtasti? Nayaw jumar thakhit jark'antsma, Moab markar saratamax janiw nayatak walïkiti.

33Asnox nayar uñjituwa, ukat kimsa kuti thakhit saranuku. Janitix ukham maysar saranukkasapänxa, nayax niyaw jumarux jiwayiriskasamäna, ukampis asnorux janiw jiwaykiriskäyätti —sasa.

34Balaamasti Tatitun angelaparux sänwa: —Nayax juch lurta, janiw yatkäyätti juman uka chiqan thakhi jist'antaskatama. Jumatix Moab markar sarañax jan munkstaxa, jichhpachaw utaxar kuttawayxä —sasa.

35Tatitun angelapasti sänwa: —Uka jaqinakamp chik saraskakim, ukampis kuntix nayax siskäma ukak parlarakïta —sasa. Ukatsti Balaamax Balac reyin khithanit jilïrinakamp chikaw saräna,

36Balac reyisti Balaaman jutaskatap yatisinxa, Moab uraqinkir mä markaruw katuqir mistuwayäna, Arnón jawir thiyaru, marka qurpäkis uka chiqaru,

37Balac reyisti Balaamarux sänwa: —Nayax walja kutiw jutañamatak jawsaysma; ¿kunatarak jan juttasti? ¿Janit nayasti jumar wali yäqañampi uñjkirismasti? —sasa.

38Balaamasti sarakïnwa: —Akaxay, nayax akanktwa. Ukampis nayax kuntix Diosax siskitani ukak arsü —sasa.

39Ukatsti Balaamax Quiriat-husot tuqiruw Balac reyimp chik saräna.

40Ukansti Balac reyix urqu vacanakampi, ovejanakampi wilañcha luqtäna, ukatsti Balaamampitaki, uka jilïrinakampitakiw jach'a manq'äwi luräna.

41Qhipärmanthisti, Balac reyix Balaamaruw Bamot-baal sat qullur irpkatäna, ukawjat israelitanakan campamentopax maysa thiypachaw uñstäna.

← Chapter 21 Chapter 23 →