Numbers 21

aymara-1997

1Négueb wasarankir Arad markan cananeo reyix jakäna, jupasti israelitanakan Atarim thakhinjam jutasipkatapat ist'asinxa, jupanakamp nuwasiriw mistüna, ukatsti jupanakar nuwantasin yaqhipanakar katuntawayäna.

2Ukat israelitanakax Tatitur mayisipxäna, arsutap phuqhañatakiw jupar arsupxarakïna akham sasa: “Jumatix uka reyimpiru, markapampir atipjañ yanapapxitätaxa, nanakax taqpach markanakap q'alpun tukjapxä” sasa.

3Tatitusti kuntix israelitanakax mayipkatayna ukarux ist'änwa, ukatsti uñisirinakapar atipjañ yanapt'äna. Israelitanakasti cananeonakarux taqinirupuniw jiwarayapxäna, markanakapsa taqpach t'unjapxäna. Ukat uka chiqarux Hormá sas sutichapxäna.

4Israelitanakax Hor sat qullut mistuwayasax, Mar Rojo tuqiruw sarapxäna, Edom reyin uraqip muyt'asa, uka chiqa jan sarakipaskañataki. Thakhinsti jaqinakax ch'am thayjtayasipxäna,

5ukat jupanakax Tatitutak arusiñ qalltapxäna, Moisesarusti sapxänwa: —¿Kunatakirak Egiptot irpsunipxistasti? ¿Wasaran jiwarayañatakit irpsunipxistasti? Janiw umasa, manq'as utjapkituti. ¡Aka jan sist'ayasir manq'ampix amjatäxapxtwa! —sasa.

6Ukat Tatitux mich'isir katarinak apayanïna, ukanakasti jupanakarux mich'intänwa; walja israelitanakaw jiwararakïna.

7Ukat jaqinakax Moisesan ukar sarasin jupar sapxäna: —¡Tatitumpitaki jumampitak arusisax jucha lurapxta! ¡Jumay Tatitur mayim aka katarinak apanukuñapataki! —sasa. Moisesasti israelitanakar juchapat pampachañapatakiw Tatitur mayïna,

8Tatitusti jupar sänwa: —Uka katarinak kipka mä katari lurasim, ukatsti mä wiphalan lawapar uk warkkatam. Maynitix katarin mich'intat uñjasinixa, uka warkkatat katarir uñtpan, ukatsti janiw jiwkaniti —sasa.

9Ukatsti Moisesax broncet mä katari luräna, ukatsti mä wiphalan lawaparuw warkkatäna, katarimpi mich'intayasiristi, broncet lurat katariruw uñtäna, ukat jan jiwkänti.

10Israelitanakax thakhinjam sarasipkakïnwa, ukatsti Obot sat chiqaruw puripxäna.

11Obot chiqat sartawayasinxa, Moab uraqit inti jalsu tuqiruw sarapxäna, ukatsti wasarankir Iié-abarim chiqan utjnuqtapxarakïna.

12Uka chiqat sartawayasinsti, Zéred sat uma jalsuruw utjnuqtapxäna.

13Uka chiqat sartawayasin Arnón jawir khurkataruw utjnuqtapxarakïna. Uka jawirax, wasarankiwa, Moab uraqimpi amorreonakan uraqipampi jaljaraki.

14Tatitun nuwasïwinakapa sat qillqatan ukxat saraki: “Vaheb chiqaw sarakipapxta, Sufá uraqi chiqa, Arnón jawiran jisk'a jawiranakapanjam sarapxta.

15Ar sat uraqir purki uka jisk'a jawiranak muytawayapxta, kawkïritix Moab uraqin qurpapkam purki ukakama” sasa.

16Arnón jawiratsti, israelitanakax kawkhankäntix phuch'ux ukkharuw puripxäna, kawkhantix Tatitux Moisesar siskatayna: “Markar tantachthapim, ukatsti nayaw uma churä” sasa.

17Ukürun israelitanakax akham jayllipxäna: “¡Phuch'ut umax jalspan! ¡Phuch'ur jayllipxam!

18¡Jilïrinakan allit phuch'u, markan yäqat jilïrinakan thujrunakapamp jist'arat phuch'u!” sasa. Wasarat sartawayxasasti, israelitanakax Mataná chiqaw sarakipawayapxäna,

19Mataná chiqatxa, Nahaliel chiqaruw puripxäna, Nahaliel chiqatsti Bamot chiqaruw puripxäna,

20Bamot chiqatsti, Moab uraqinkir qhirwa chiqa sarakipapxäna, Pisgá sat qullu patar puriñkama, kawkhattix wasarax uñstki ukkharu.

21Israelitanakax jaqinak khithäna amorreonakan Sehón reyipar akham sañapataki:

22“Uraqim chiqa sarakipt'ayapxita. Janiw yapuchat yapunakamar mantapkäti, uva yapunakamsa taksupkäti, janirakiw umsa phuch'unakamat umt'apkäti. Thakhinjamak uraqim sarakipawayapxä” sasa.

23Ukampis Sehón reyix janiw israelitanakarux uraqipanjam sarakipayañ munkänti, jan ukasti, taqpach jaqinakapar tantacht'asin, wasararuw israelitanakar jikxatir mistunïna, Jahas chiqar purisinsti jupanakaruw nuwantäna.

24Ukampis israelitanakax sayt'asipxänwa, jupanakarux atipjapxarakïnwa, ukatsti uraqinakap katuntasipxäna, Arnón jawirata Jaboc sat jawirkama, amonitanakan uraqipampi qurpaski uka chiqkama, uka uraqisti suma uyuchrantatänwa.

25Ukhamaw israelitanakax amorreonakan taqi uka markanakap katuntasipxäna, uka markanakan utjantasipxarakïna, Hesbón markampina ukankir jisk'a markanakapampina.

26Amorreonakan Sihón sat reyipax Hesbón markan jakäna. Sihón reyix Moab uraqinkir nayrïr reyipampix nuwasiñankataynawa; ukatsti taqpach uka uraqi aparatayna, Arnón sat jawirkama.

27Ukat jayllirinakax sapxi: “¡Hesbón markar jutapxam, Sihón reyin markaparu! ¡Wasitat sayt'ayapxam, sum uyuchrantapxam!

28Hesbón markatpacha, Sihón reyin markapatpacha, nakhantir ninax lawrsunïna, Moab uraqinkir Ar markar t'unjasa, Arnón jawiran qullunakap t'unjasa.

29¡Moab marka, jachkañätawa! ¡Quemós diosan markapa, aynacht'atätawa! Jupax jaqinakamsa jaltayakiwa, warminakamsa Sihón reyin amparaparuw jalt'ayi.

30Hesbón markan ch'amapax t'unjatawa; Dibón uraqit Nófah uraqkamax laqayar tukutawa, Medebá chiqakamaw ninax purïna.”

31Ukhamat israelitanakax amorreonakan uraqinakap katuntasipxäna.

32Moisesax Jazer marka uñaqayir khitharakïnwa. Israelitanakasti uka marka katuntasipxäna, uka jak'anakankir markanakampi, ukatsti ukan jakir amorreo jaqinakarux jaqunukupxänwa.

33Uka qhipatsti Basán uraqiruw sarxapxäna, ukampis Basán markan Og reyipax taqpach ejercitopampiw Edrei chiqar saräna jupanakamp nuwasiri.

34Ukapachaw Tatitux Moisesar säna: “Og reyir jan axsaramti, nayaw amparamar jupar katuyäma, taqpach ejercitoparu, markapamppacharu, jumasti kunjämtix Hesbón markan jakir amorreo Sihón reyir lurktaxa, uka pachparak luräta” sasa.

35Israelitanakax ukham Og reyimpiru, wawanakapampiru, ejercitopampiru, taqpach jaqinakapampiruw jiwarayäna. Janiw maynirus jakayapkänti, ukatsti uraqinakap katuntasipxäna.

← Chapter 20 Chapter 22 →