Judges 7

aymara-1997

1Gedeón chachasti, khitirutix Jerubaal sapxarakïna, jupax, taqi jupampïkäna ukanakampi wali willjtat sartawayasinxa, Harod chiqan utjir uma jalsu jak'aruw utjnuqtir sarapxäna. Madianitanakan campamentopasti jupanakat amsta tuqin jikxatasïna, Moré qullu kayunkki uka qhirwana.

2Tatitusti Gedeonarux sänwa: “Jumamp chikäpki uka jaqinakax sinti waljaniwa, nayatix israelitanakar yanapasa madianitanakar atipjayäxa, naya nayraqatan jach'achasipxani, ukatsti jupanakas atipjapkaspa ukham amuyasipxani.

3Jichhasti jaqinakar yatiyam, khitinakatix llajllasipki ukanakax utanakapar sarxpan” sasa. Ukhamat Gedeonax uk yatiñataki jaqinakar yant'äna, ukatsti pä tunka payani waranqa jaqinakaw sarxapxäna, tunka waranqa jaqinakakiw qhiparapxäna.

4Ukampis Tatitux Gedeonar saskakïnwa: “Jaqinakax waljanikïskiwa. Uma umt'ir jupanakar irpam, nayan jupanakar yant'añataki, ukat nayax khitinakatix jumamp chika sarapkani, jan ukax janisa uk yatiyxäma” sasa.

5Gedeonasti jaqinakarux um umt'iriw irpäna, Tatitusti juparux sänwa: “Amparapar um phuxttasin anunakjam laxuntirirux yaqharuw uchäta, alxatasin umt'irirusti yaqharuw ucharakïta” sasa.

6Ukatsti amparapar um phuxttasin anunakjam laxuntirinakax kimsa patak jaqinakänwa, mayninakasti taqiniw umar alxatas umt'apxäna.

7Ukat Tatitux Gedeonar säna: “Aka kimsa patak jaqinakampiw jumanakarux qhispiyapxäma, madianitanakarusti atipt'äwa. Mayninakasti utanakapar sarxapxpan” sasa.

8Ukatsti Gedeonax mayninakarux chhujlla utanakaparuw khithanukxäna; janïr sarapkipansti wakullanakapa, oveja waxrat lurat pututunakap apthapïna. Kimsa patak ajllit jaqinakampikiw qhiparxäna, madianitanakan campamentopat qhirwata amsta tuqiru.

9Uka arumasti Tatitux Gedeonar sänwa: “Sartasim, madianitanakar katuntir saram, nayaw jupanakxa amparamaru katuyäma.

10Ukampis jumatix jupanakampi nuwasiñ axsarsta ukaxa, Purá uywatamampi campamentor nayraqat saram,

11ukat kuntix parlasipkani uk ist'äta. Ukatsti jan axsarasaw jupanakampi nuwasïta” sasa. Gedeonasti Purá uywatapampiw uñisirinakapan campamentopkama saraqäna.

12Madianitanaka, amalecitanaka, inti jalsu tuqinkir jaqinakax qhirwa chiqawjan t'iju t'ijunakjamaw ch'iqitatapxatayna, jupanakan camellonakapax quta thiyan utjir ch'allar uñtatänwa.

13Gedeonasti uñisirinakapan campamentopar jak'achaskasin ist'äna, mä soldadon mayni masiparu samkasitap yatiyaskiri. Juparux sänwa: —Nayax akham samkasta, cebadat lurat mä t'ant'aw campamentoskam quruminïna, ukatsti mä chhujlla utar jalkatasinsti uka chhujlla utaruw tinkuyäna —sasa.

14Ukat masipax säna: —Ukax Gedeón israelita chachan espadapäpachawa, Joasan yuqapana, Diosaw Gedeonan amparapar madianitanakaru, taqpach ejercitopampir katuyistani —sasa.

15Ukhama uka samka yatiyatap ist'asina, ukhamarak uka samkan qhanañchäwip ist'asinsa, Gedeonax Tatituruw yupaychäna. Ukatsti israelita campamentor kutt'asin säna: —¡Sartasipxam, Tatitux madianitanakan ejercitopxa amparasaruw katuyistani! —sasa.

16Ukatsti ukspachaw uka kimsa patak jaqinakapxa, kimsa tamaruw jaljäna, ukatsti taqpachaniruw oveja waxra pututunak churäna, ukhamaraki ch'usa wakullanaka, uka wakullanak manqharusti nina wiya uchasa.

17Ukat jupanakarux säna: —Kunapachatix nayax uñisirisan campamentop uñkatasir purkä ukkhaxa, uñch'ukipxitätawa, kuntix nayax lurkä uka pachparak jumanakax lurapxäta.

18Kunapachatix nayasa, nayamp chika sarapki ukanakampi pututunak pututt'apkä ukkhaxa, jumanakax campamentor muyuntasin pututt'apxarakïtawa, ukatsti jach'at art'asipxäta: “¡Tatit layku, Gedeón laykuraki!” sasa.

19Ukhamaw Gedeonampi patak jaqinakapampix campamento uñkatasir puripxäna, kunapachatix chika arumata uñch'ukir soldadonakax lurañap niya qalltapkäna ukapacha. Ukapachaw israelitanakax oveja waxrat lurat pututunakat pututt'apxäna, wayupkän uka wakullanaksa p'akirapxarakïna,

20uka kimsa tama jaqinakasti ukkharakiw oveja waxrat lurat pututunakat pututt'apxäna, wakullanaksa p'akirapxarakïna. Ch'iqa ampararux nina wiyanak apapxäna, kupi ampararusti oveja waxrat lurat pututunak apapxarakïna, ukatsti jach'at art'asipxäna: ¡Tatit layku, Gedeón layku! “¡Nuwasiñäni!” sasa.

21Israelitanakax janiw unxtapkänti, madianitanakan campamentopar muyuntasa. Arnaqasitanak ist'asinsti, madianitanakan ejercitopankirinakax warart'asisaw jaltxapxäna,

22ukchañkamasti uka kimsa patak israelitanakax pututunak pututt'asipkakïnwa, Tatitusti madianitanakarux jupanakpur nuwasiyäna, ukatsti jupanakax Bet-sitá chiqakamaw jaltxapxäna, Sererá thakhina, Abel-meholá qurpapkama, Tabat jak'ana.

23Ukatsti Neftalí, Aser, Manasés israelita ayllunkirinakax jawsthapitäpxänwa, madianitanakar arktapxañapataki.

24Ukatsti Gedeonax Efraín qullunkirinakaruw yatiyirinak khithäna, uka ayllunkir chachanakax madianitanakampi nuwasir saraqanipxañapataki, ukhamarak jupanakax Bet-bará jawira, Jordán jawira makhatañsa jark'antapxañapataki, madianitanakan uka chiqar janïr purinkipana. Efraín ayllunkirinakasti uka yatiyäwirux ist'apxänwa,

25ukhamarus madianitanakan pä jilïrip katuntapxäna Oreb, Zeeb sat jilïrinaka. Oreb chacharusti kawkïr qarqatix jichhax Oreb sutimpi uñt'atäki ukawjaruw jiwayapxäna, Zeeb chacharusti sutip apki uka chiqaruw jiwayapxäna, uka chiqasti vino apsuñataki uvanak takipxirïkän uka chiqänwa. Madianitanakar arktasasti, Oreb, Zeeb chachanakan p'iqinakap Gedeonar uñacht'ayir apapxäna, jupasti Jordán jawirat mayskatankaskänwa.

← Chapter 6 Chapter 8 →