Judges 6

aymara-1997

1Israelitanakan luratanakapax Tatit nayraqatan janiw walïkänti, ukat Tatitux jupanakar paqallqu mara madianita jaqinakan amparapar katuyäna.

2Madianita jaqinakax wali ch'amampiw israelitanakar t'aqhisiyäna, israelitanakasti axsarañat qullunakaru, putunakaruw imantasiñanak lurasipxäna, jan uñjkay chiqanakaru, ukhamat jan jikxatayasiñataki.

3Israelitanakax yapuchapkän ukapachaxa, madianitanakampi, amalecitanakampi, inti jalsu tuqinkir jaqinakampiw jupanakar nuwantir juntantapxäna.

4Jupanakasti israelitanakan uraqiparu jutasinxa, ukan utjnuqtapxäna, ukatsti yapunak q'alpun tukjapxäna Gaza chiqakama, israelitanakaru jan kuna manq'añani, jan ovejanakani, jan vacanakani, jan asnonakani jaytasa.

5Jupanakax chhujlla utanakapampi, ukhamarak walja uywanakapampi jutasin taqi kunanak tukjayapxäna. Jupanakax t'iju t'ijunakar uñtataw walja camellonakapampi jutantapxäna.

6Madianitanakan ukham luratapatsti, israelitanakax wali pist'añan jakasipxäna, ukhamïpan Tatitur art'asipxäna, yanap mayisa.

7Kunapachatix israelitanakax madianitanakat qhispiyañapatak Tatitur art'asipkän ukkhaxa,

8Tatitux mä profeta khithanïna, jupanakaru akham sañapataki: “Israelan Tatitu Diosapax akham siwa: ‘Nayaw jumanakarux Egipto markat irpsunipxsma, kawkhantix jumanakax t'aqhisiyat jakapkäyät ukkhata,

9janiw egiptonkir jaqinakatakti qhispiyapksma, jan ukasti taqi khitinakatix jumanakar t'aqhisiyapkäyätam ukanakamppachat qhispiyapxsma. Jupanakarux jumanakan uñjkataw alisnukta, uraqinakapsa jumanakaruw churapxsma.

10Ukatsti sapxaraksmawa: Nayätwa jumanakan Tatitu Diosamaxa, jichha jakasipkta uka amorreonakan uraqipan utjir diosanakarux jan axsarapxamti, sasa; ukampis jumanakax janiw ist'apkistati’ ” sasa.

11Ukatsti Tatitun angelapaw jutäna, Ofrá chiqankir encina quqa thiyaruw qunt'asïna, uka quqasti Joás chachankänwa, jupasti Abiézer chachat saraqirïnwa. Joás chachan Gedeón yuqapasti, madianitanakampi jan uñjayasiñatakiw jamas chiqan trigo thalaskäna, kawkhantix vino lurañatak uva takipxirïkän ukawjana.

12Tatitun angelapasti jupar uñstasin säna: —¡Tatitux jumampïskiwa, ch'amani jan axsarir jaqi! —sasa.

13Gedeón chachasti sänwa: —Tatay, Diosatix nanakampïskchi ukasti, ¿kunatarak taqi akanakasti nanakatak utjisti? ¿Kawkinkarak awkinakaxax yatiyapkitu uka muspharkañ luräwinaka Egipto markat irpsunkistu ukapacha luratanakapasti? Tatitux armasipxituwa, madianitanakan amparaparuw katuyapxitu —sasa.

14Tatitusti jupar uñkatasin säna: —Qawqhatix ch'amamax utjki ukampi israelitanak qhispiyir saram, madianitanakan t'aqhisiyatäñata. Nayaw jumarux khithasksma —sasa.

15Gedeonasti saskakïnwa: —Tatay, ¿kunjämarak Israel markar qhispiyästi? Nayan wila masi tamaxax, Manasés ayllunkirinak taypin jan yäqañ tamakiwa, nayasti wila masi tamax taypin jan yäqatakïtwa —sasa.

16Tatitusti sänwa: —Nayaw jumampiskä, madianitanakarux atipjätawa, kunjämtix mä sapa jaqiruki atipjkasma ukhama —sasa.

17Ukatsti Gedeonax sänwa: —Nayatix jumatakjamästa ukaxa, mä uñacht'äwi churita, juman nayar parlaskatam yatiñataki.

18Tatay, nayan kutt'aniñaxkam janikiy akat sarkamti, nayasti mä waxt'äwi jumar luqtañ munsma —sasa. Tatitusti sänwa: —Nayasti juman kutt'aniñamkamaw akawjan suyäma —sasa.

19Gedeonasti utaparuw saräna, ukatsti mä cabrito wakicht'äna, pä tunka libra jak'utsti jan levaduran t'ant'anak lurt'äna; ukatsti mä walayaruw aycha uchäna, caldopsti mä phukhuruw ucharakïna, taqi ukanak encina quqa jak'aruw apäna.

20Diosan angelapasti jupar sänwa: —Aychampi, jan levaduran t'ant'anakampi jach'a qala patxar ucham, ukatsti caldompi warxatarakim —sasa. Gedeonasti kunjämtix angelax siskatayna ukham luräna,

21angelasti amparapankkän uka thujrumpiw aychampiru, t'ant'anakampirux junt'äna, ukatsti uka jach'a qalat ninaw mistsunïna, ukaw aychsa t'ant'anaksa q'al nakhantäna; ukatsti Tatitun angelapax Gedeón chachan nayraqatapat ukspachaw chhaqtawayxäna.

22Gedeonasti Tatitun angelapätap amuyasinsti, sänwa: —¡Tatit Diosay! ¡Tatitun angelaparux ajanuy ajanuw uñkatta! —sasa.

23Tatitusti sänwa: —Jan axsaramti, janiw jiwkätati, sumankañaxax jumampïpan —sasa.

24Gedeonasti ukawjan Tatitur jach'añchasaw mä altar sayt'ayäna, ukarusti “Tatituw samarañaxa” sasaw sutichäna. Uka altarasti Ofrá markankaskiwa, Abiézer wila masi taman markapana.

25Uka arumpachaw Tatitux Gedeonar säna: —Awkiman uywanakapat suma urqu vacäki uka katum, paqallq maranïki uka urqu vaca, ukatsti awkiman Baal diosapan altarap allthapim, ukatsti Baal diosan altarap jak'ankki uka quqa tinkuyarakim,

26qullu patansti, Tatitu Diosamatak mä altar sayt'ayam. Ukatsti uka urqu vaca katusin wilañchäkaspa ukham luqtita, tinkuykäta uka quqamp nakhantayasa —sasa.

27Gedeón chachasti uywatanakapat tunkaniruw ajllïna, ukatsti kunjämtix Tatitux siskatayna ukarjamaw luräna; jupasti janiw urux lurkänti, jan ukasti arumakiw luräna, awkipan wila masiparu, markankir jaqinakar axsarasina.

28Qhipür willjtasti, kunapachatix markankir jaqinakax sartxapxän ukkhaxa, Baal diosan altarap allthapita, uka altar jak'an utjkän uka quqasa tinkuyata jikxatapxäna, ukhamarus machaq altar patxan mä urqu vaca wilañcha luqtata uñjapxarakïna.

29Ukatsti maynit maynikamaw jiskt'asipxäna: “¿Khitirak uk lurpachasti?” sasa. Jupanakasti wali thaqhasa jiskxatasinxa, Joás chachan Gedeón yuqapan uk luratap yatxatapxäna, Joasarusti sapxänwa:

30—Yuqamar irpsunim, jiwayapxäwa. ¡Baal diosan altarap allinukutayna, altar jak'ankkän uka quqampach tinksuyatayna! —sasa.

31Ukampis Joás chachax uka jaqinakarux sänwa: —¿Baal diosatti jumanakax arxatasipxäta, jupar arxatasat nuwasipxäta? ¡Ukhamax Baal diosat arxatasirix janïr willjtankipan jiwpan! Baal diosatix chiqächi ukax jupa pachpay arxataspan, uka tukjat altarax jupankänwa —sasa.

32Uka urutsti Gedeonarux Jerubaal sasaw sutichapxäna, Joás chachaw satayna: “¡Baal diosax jupapach arxataspan! Uka tukjat altarax jupankänwa” sasa.

33Uka qhipatsti, taqpach madianitanakampi, amalecitanakampi, inti jalsu tuqinkir jaqinakampix mayar tukt'asaw Jordán jawir makhatapxäna, ukatsti Jezreel qhirwaruw utjnuqtapxäna.

34Ukampis Tatitun ajayupaw Gedeonxar jutäna, ukatsti jupax trompet phust'äna, Abiézer wila masi tamanakapan jupampi mayacht'asipxañapataki;

35Manasés ayllunkirinakar jawsayiriw yatiyirinak khithäna. Ukatsti Aser, Zabulón, Neftalí ayllunkirinakar jawsayiriw yatiyirinak khitharakïna, jupanakasti jupamp mayacht'asiñatakiw jutapxäna.

36Gedeonasti Tatiturux sänwa: “Nayarutix Israel markar qhispiyañatak jawsaschista, kunjämtix juma pachpa siskta ukarjamaxa,

37nayax wali t'arwan oveja lip'ichi uskt'ä, trigo jawq'añäki ukawjaru. Qhipür willjtatix t'arwax sullampi jurichjatäni, ukat uraqix wañakïskani ukkhaxa, chiqpachansa jumax nayar Israel markar qhispiyañatak jawsatam yatï, kunjämtix juma pachpa siskta ukarjama” sasa.

38Ukasti ukhamapuniw lurasïna. Qhipürux wali willjtaw Gedeonax sartasïna, ukat jawi t'arwatxa, mä qiru phuqha sulla um ch'irwsüna.

39Ukampis Gedeonax Tatitur saskakïnwa: “Tatay, janiw q'apisïtati, nayan wasitatampi yant'añ munataxata, mayampi sum yatiñaxataki. Jichha kutinsti jawi t'arwax wañakïskpan, uraqisti sullampi jurichjatarakïpan” sasa.

40Uka arumasti Diosax ukham luräna. Qhipür willjtasti, jawi t'arwax wañakiskänwa, taqpach uraqisti ch'aranänwa.

← Chapter 5 Chapter 7 →