Joshua 21

aymara-1997

1Levitanakan wila masinakapan jilïri irpirinakapax Canaán uraqinkir Siló chiqaruw sarapxäna, Eleazar sacerdotempi, Josué chachampi, Israelan ayllunakapankir jilïrinakapampi parlañataki. Ukansti jupanakarux sapxänwa: “Tatitux Moisés tuqiw arsüna, nanakan jakasiñanakaxatak markanak churañapataki, ukhamarak suma ch'iji uraqinaka uywanakaxa awatisiñataki” sasa.

3Ukat israelitanakax levitanakaru jupanakan markanakapa, ukhamarak uywanak awatisiñ uraqinak churapxäna, kunjämtix Tatitux siskäna ukhamar phuqhasa.

4Nayraqatax Quehat chachat saraqir levitanakaruw wakt'äna. Aarón sacerdotet saraqir quehatita wawanakapatakix tunka kimsan markanakaw, Judá, Simeón, Benjamín ayllun uraqinakap taypina wakt'äna.

5Maynïri quehatita jaqinakarusti tunka markanakaw wakt'äna, ukanakasti Efraín, Dan uraqinakap taypinkänwa, ukhamarak Manasés ayllunkir chikat jaqipan uraqinakapana.

6Ukxarusti, Guersón chachat saraqir wila masi tamanakarux, tunka kimsan markanakaw wakt'äna, ukanakasti: Isacar, Aser, Neftalí uraqinakap taypinkänwa, ukhamarak Manasés ayllunkir maynïr chikat jaqipan uraqipana, kawkïritix Basán chiqankki uka.

7Ukatsti Merarí chachat saraqir levitanakan wawanakapatakix tunka payan markanakaw wakt'äna, ukanakasti Rubén, Gad, Zabulón, ayllun uraqinakap taypinkänwa.

8Ukhamaw israelit jaqinakax suertetkam levitanakarux markanaka, ukhamarak uywa awatiñ uraqinak lakinuqapxäna, kunjämtix Tatitux Moisesar siskatayna ukarjama.

9Kawkïr markanakatix aytatäkani ukanakax Judá, Simeón ayllunakaw churapxäna,

10ukanakasti Aarón chachat saraqir Quehat wila masinkir levitanakaruw nayraqatax suertet wakt'äna.

11Judá uraqin qullunakapanxa Arbá marka churapxäna, Hebrón sutinïkaraki uka marka, Arbá chachax Anac jach'a tansa jaqin awkipänwa, jupanakarusti uywanak awatiñ uraqinakamp churapxarakïna.

12Ukampis Hebrón marka thiyanakan utjir uraqinakampi, jisk'a markanakampix janiw levitanakaru churatäkänti, ukanakasti Jefuné chachan Caleb yuqaparu churatäxatap layku.

13Hebrón markax imantasiñ markänwa, jan amtañampi jiwayapki uka jaqinakataki, uka markat yaqhanakampsti, aknïr markanakampi Aarón sacerdoten wawanakaparux churapxäna: Libná,

14Jatir, Estemoa,

15Holón, Debir,

16Ain, Jutá, Bet-semes uka markanaka. Uka llätunka markanakax uywa awatiñ uraqinakanïnwa.

17Benjamín ayllunkir uraqinakapansti pusi markanak churapxäna: Gabaón, Gueba,

18Anatot, Almón, uywa awatiñ uraqinakapamppacha,

19ukhamasti Aarón sacerdoten wawanakapan markanakapax, taqpachax tunka kimsanïnwa, uywa awatiñ uraqinakapamppacha.

20Quehat chachat saraqir mayni levitanakarux, pusi markanakaw wakt'äna, uka markanakasti Efraín ayllunkir uraqinakap taypinkänwa.

21Uka markanakat maynïrix Siquem markawa, ukasti Efraín qullunakankänwa, imantasiñ markarakïnwa, khititix maynir jiwaykaspa ukataki, maynïr markanakasti: Guézer,

22Quibsaim, Bet-horón markanakawa, uywa awatiñ uraqinakapamppacha.

23Dan ayllunkir uraqinakansti pusi markanakaw wakt'äna: Eltequé, Guibetón,

24Aialón, Gat-rimón markanaka, uywa awatiñ uraqinakapamppacha;

25Manasés ayllunkirit chikat jaqipan uraqipatsti pä markanakaw wakt'äna: Taanac, Gat-rimón markanaka, uywa awatiñ uraqinakapamppacha;

26ukhamasti uka quehatita sat wila masi tamanakan markanakapax, taqpachax tunkänwa, sapa markas uywa awatiñ uraqinakapamppacha.

27Guersón chachat saraqir levitanakarux pä marka churapxäna, uka markanakasti Manasés ayllunkirin chikat jaqipan uraqinakapankänwa, uywa awatiñ uraqinakapamppacha. Basán chiqanxa, Beeterá, Golán markanak katuqapxäna, ukanakasti imantasiñ markanakänwa.

28Isacar ayllunkir wila masi tamanakapan uraqinakapatsti, pusi markanak katuqapxäna: Quisión, Daberat,

29Jarmut, En-ganim uka markanaka, uywa awatiñ uraqinakapamppacha.

30Aser ayllunkir uraqinakapatsti pusi markanak katuqapxäna: Misael, Abdón,

31Helcat, Rehob markanaka, uywa awatiñ uraqinakapamppacha.

32Neftalí ayllunkir uraqinakapatsti kimsa markanaka katuqapxäna: Hamot-dor, Cartán markanaka, ukhamarak Galileankir Quedes markampi, uywa awatiñ uraqinakapamppacha;

33Guersón ayllunkir wila masi tamanakaru churat markanakax taqpachax, tunka kimsanïnwa, sapaqat markas uywa awatiñ uraqinakapamppacha.

34Kawkïri wila masi tamanakatix Leví ayllunkirit jilt'apkäna, uka Merarí chachat saraqir wawanakaparusti, Zabulón ayllun uraqinakap taypin pusi markanakaw wakt'äna: Jocneam, Carta,

35Dimná, Nahalal markanak, sapaqat markas uywa awatiñ uraqinakapamppacha.

36Rubén ayllunkir uraqinakapatsti, pusi markanakaw wakt'äna: Béser, Jahas,

37Cademot, Mefáat uka markanaka, uywa awatiñ uraqinakapamppacha.

38Gad ayllunkir uraqitsti pusi markanakaw wakt'arakïna: Mahanaim, Hesbón, Jazer markanaka, ukhamarak Galaad uraqinkir Ramot markampi, ukasti imantasiñ markänwa, sapaqat markas uywa awatiñ uraqinakapamppacha.

40Ukhamasti Merarí wila masi tamankiri levitanakarux, tunka payan markanakaw taqpachax wakt'äna.

41Israelitanakan uraqinakap taypin utjiri levita markanakax, taqpachax pusi tunka kimsaqallqunïnwa, sapaqat markas uywa awatiñ uraqinakapamppacha,

42uka uraqinakasti sapaqat marka muytpachankänwa.

43Ukhamawa Tatitux Israel markaru taqi uka uraqinak churäna, kunjämtix nayra awkinakapar juramentompi arskatayna ukhamar phuqhasa, jupanakasti uka uraqinakan utjnuqtasipxäna, ukan jakasipxarakïna.

44Tatitux arsutaparuw phuqhäna, ukatsti israelitanakaru taqi uka uraqpachan sumankañ churäna. Uñisirinakapax janiw jupanakarux saykatirjamäkänti, Tatituw uka uñisirinakarux atipjäna.

45Kuntix Tatitux israelitanakar arsuwaykäna uka arunakax taqipuniw phuqhasïna.

← Chapter 20 Chapter 22 →