Joshua 20

aymara-1997

1Tatitux Josué chacharux sänwa:

2“Israelit jaqinakampi parlam, ukatsti imantasiñ markanak chhijllasipxam sarakim, kunjämatix nayax Moisés tuqi iwxawaykäyäta ukarjama.

3Maynitix masipar jan amtañampi jiwayaspa ukaxa, uka markanakaruw imantasiñatak jaltxaspa, ukhamat jiwatan wila masinakapan jan phuqsusiskañapataki.

4Khititix uka markanakat kawkïrirusa imantasiñ munkani ukaxa, marka mantañar purisax jilïr jaqinakan nayraqatapan arsusiñapa. Ukat jupanakax uka markar mantayapxani, jakañatakisti mä chiqawja churapxarakini.

5Jiwatan jak'a wila masipatix arktanini ukaxa, markan jilïr jaqinakapax janiw imantasiri jaqirux katuyapkaniti, jupan masipar jan amtañampi, janiraki uñisiñat jiwayatap layku.

6Ukampis imantasir jaqix markar qhiparañapax wakisiniwa, taqi markachir nayraqatan taripatäñkama, jan ukax, taripir jilïr sacerdoten jiwañapkama. Uka qhipat imantasir jaqix utaparu kuttawayxani, kawkha markattix jaltanki uka markaparusa” sasa.

7Ukhamasti israelitanakax imantasiñatakix aknïr markanak ajllipxäna: Quedes marka, Galilea uraqina, Neftalí ayllun qullunakapana. Siquem marka, Efraín ayllun qullunakapana. Hebrón marka, Judá ayllun qullunakapana.

8Béser marka, Rubén ayllun qullu pampanakapana, Jericó markat inti jalsu tuqina, Jordán jawira khurkatana. Ramot marka, Gad ayllun uraqipana, Galaad chiqana. Golán marka, Manasés ayllun uraqipana, Basán chiqana.

9Uka markanakaw ajllitäna taqi israelitanakan imantasiñapataki, ukhamarak yaqha markat jutir jaqinakatakisa. Uka markanakansti kawkïr jaqitix masiparux jan amtañampi jiwaykaspa jupanakan imantasiñapatakïnwa, ukhamat jiwirin jak'a wila masipax phuqsusiñ amtampi jan jiwayaskañapataki, markankir jaqinakan janïr taripatäkipana.

← Chapter 19 Chapter 21 →