Job 12

aymara-1997

1¡Jumanakax chiqpachaw jaqinakan sutipxar arsupxtaxa, jumanakax jiwarxapxät ukapachax janiw khiti yatiñan jaqis utjkxaniti!

3Ukampis nayax amuyt'asiñ yatiraktwa, janiw jumanakat pisïkti. ¿Khitirak taqi ukanak jan yatkisti?

4Mä urunakan, Diosar art'askäyät ukapachaxa, jupax mayisitaxar ist'apunitänwa; ukampis jichhax, masinakaxamppachaw nayat larusipxitu; nayax jan kuna juchanïkta ukasa, taqiniw nayat sawkasipxitu.

5Taqi kun yatir jaqixa, aynacht'at jaqirux jisk'achiwa; liwisirjamäki uka jaqirusa, juk'ampikiw nukt'xaraki.

6Lunthatanakax utanakapan k'uchikiw jakasipxi; Diosar ñanqhachirinakasti jan llakiniw jakasipxi, jupanakas Tatitur apnaqkaspa ukham amuyasipxaraki.

7Uywanakar jiskt'asim, ukanakasti yatichätamwa; alaxpach jamach'inakar jiskt'asim, ukanakasti yatiyätamwa;

8uraqimpi parlam, uraqisti yatichätamwa; jach'a qutankir chawllanakamp parlam, chawllanakasti yaticharakïtamwa.

9Ukanakax sum yatipxi Diosan taqi kun amparapamp luratapa.

10Taqi jakirinakan jakañapax jupan amparapankiwa.

11Jinchux arunak ist'i, laxrasti manq'an sumätap katjaraki.

12Ch'ama qarit jaqinakax, yatiñ kankañanïpxiwa, walja maranakanïtapaw jupanakar amuyt'a kankañ churi.

13Diosasti yatiñ kankañani, ch'amanirakiwa; jupax amtiwa, amtäwinakapsti phuqhiwa.

14Kuntix Diosax t'unjki ukxa, janiw khitis wasitat sayt'aykaspati; khitirutix Diosax katuntki ukarux, janiw khitis antutaykaspati.

15Jupatix jallun purxatañap jark'xäschi ukaxa, pampanakax taqpachaw wañsuwayxi; jallu apayanki ukkhasti, taqi uraqpachaw umampi phuqhantat uñjasi.

16Ch'amapax jupar atipjayapuniwa. Sallqjayasir jaqisa, sallqjir jaqisa, jupan amparapankiwa.

17Jupaw yatiñani jaqinakarux yatiñ kankañap apaqi taripirinakarus luqhirayaraki.

18Reyinakarusti munañanïñap apaqi, q'alala, katuntat yaqha markar apayxaraki.

19Sacerdotenakarus lurañanakap apaqi, munañan jaqinakarus marka apnaqäwit jaquqaraki.

20Amuyt'ayirinakarusti jan arun antuti, chuyman jaqinakatsa amuyt'a kankañap apaqi.

21Munañan jaqinakarus jisk'achjiwa, ch'amaninakarus jan ch'aman lurjaraki.

22Kunanakatix jan yatitäkän ukanak qhanar apsu, kunanakatix jamasan luratäkän ukanaksa qhanaruw apsuraki.

23Jupaw markanakar jach'añchi, tukjaraki, jupaw ananuku, ukatsti anthapiraki.

24Mä markan jilïr irpirinakapatsti yatiñ kankañap apaqi, ukatsti wasararuw jan kawksaru sarañani jupanakar antutaraki,

25ukan ch'amakanak taypin kumpunaqapxi, machantat jaqinakjamaw liwinaqtapxi.

← Chapter 11 Chapter 13 →