Isaiah 64

aymara-1997

1Alaxpach jist'arasma, ukat saraqanisma, juman ukankatamampix qullunaksa khathatiyarakisma,

2kunjämtix ninax ch'aphi alinak nakhantki, jan ukax umsa wallxtayki ukhama. Ukapachaw uñisirinakamax sutim uñt'apxaspa, markanakasti juma nayraqatan khathatipxaspa.

3Kunapachatix uka axsarkañanaka, kuntix nanakax jan suyapkäyätsa ukanak lurkta ukkha, kunapachatix jumax saraqankta ukapachaxa, qullunakax juma nayraqatan khathatipxäna.

4Janipuniw kunapachas ist'askiti, janirakiw jumat sipana yaqha diosan utjatapsa uñjaskiti, khititix muspharkañanak lurkaspa, khitinakatix jupar iyawski ukanakatakixa.

5Jumasti khititix kusisiñampi askinak lurki ukanakaruw katuqtaxa, kuntix jumax munkta uk lurki ukanakaru. Nanakan jucha lurapxatax laykuw jumax nanakatakix phiñasitätaxa; nayratpacharak jumarux chuymam usuyapxsma.

6Taqi nanakasti mä q'añu lurir jaqir uñtatäpxtwa, taqi aski luräwinakaxasti q'añu isinakar uñtatarakiwa. Taqiniw ankuntat laphinakar uñtat willirtapxta, nanakan jucha luratanakaxasti thayar uñtataw apapxarakitu.

7Janiw khitis jumar mayisirix utjkiti, janirakiw khitis jumar alkatirix utjkiti; ukatpï nanakat imantasxtaxa, jucha luratanakaxat apanukupxistaxa.

8Ukampis Tatay, jumaw nanakan awkixätaxa; nanakax ñiq'ikïpxtwa, jumasti sañu lurirïtawa; ¡taqi nanakasti juman uchatäpxaraktwa!

9Tatay, janikiy juk'ampi phiñasxamti, jucha luratanakaxatsa janikiy amtasxamti. ¡Uñtanipxitaya, nanakax markamäpxtwa!

10Qullana markanakamax ch'usa wasarar tukuyatawa, Jerusalenasti laqayar tukuyata, q'ala tukjatarakiwa.

11Nanakan suma qullan utaxasti, kawkhantix awkinakaxax yupaychapkäyätam uka chiqanakax ninampi q'ala tukjatawa. ¡Kuntix wal munasipkäyät ukanakasti laqayar tukuyatawa!

12“Jichhasti Tatay, janikiy kunsa jan luras qhiparamti, janikiy amukis qhiparamti, janirakiy juk'ampi jisk'achjapxistati.”

← Chapter 63 Chapter 65 →