Isaiah 63

aymara-1997

1¿Khitis ukax Edom markan Bosrá qamañapat jutki ukaxa, wila samit isini, wali suma isthapt'ata, wali ch'amampi sartas jutki ukasti? Nayätwa, Israelan Diosapätwa, qhispiyañatakis ch'amanirakïtwa.

2¿Kunatarak wila isinïtasti, uvanaksa kayumpi takskasma ukhamasti?

3Jïsa, nayaw uñisirinakaxar tukjaniwayta; vino apsuñatak uvax taksutax ukham taksuniwayta; wali phiñasitaw uñisirinakaxarux taksuniwayta, ukat wilapax isixarux q'al ch'allsutu.

4Kutsuyasiñ uru wakichkta uka urux niya wakt'ayatäxiwa; markaxar qhispiyañ urus purinxarakiwa.

5Uñatatastwa, ukatsti janiw khiti yanapiris utjkänti; jan khitis nayar yanapt'añ munatapatxa, muspharataw uñjasta. Ukampis nayan ch'amaxaw atipt'ayitu, phiñasiñaxarakiw wayxäsitu.

6Wali q'apisiñaxampiw markanakarux t'unjta, wilanakapsti uraqinjam llumiyarakta.

7Nayax Tatitun munasiñapat parlañ munta, yupaychañ q'uchunakap q'uchuña, taqi kuntix jupax jiwasanakatak lurki ukanaka, Israelan wawanakapatak khuyapayasiñapan jach'ätapata, kuntix khuyapayasiñapana, jach'a munasiñapansa lurki taqi ukanakata.

8Tatitux siwa: “Jupanakax nayan markaxawa, aka wawanakaxax janiw ch'uxña lurapkitaniti” sasa.

9Juparakiw taqi llakinakapat qhispiyi. Janiw jupan khithanitapati qhispiykixa; jan ukasti kipka Tatituw qhispiyi. Khuyapayasiñap layku, munasiñap laykuw jupax qhispiyi, jupaw amparat katt'asin wayti. Ukhampun luri.

10Ukampis israelitanakax Tatitutakiw sayt'asipxi, q'uma kankañaparuw ñanqhachapxi; ukat jupanakatakix mä uñisirir tuku, nuwantañatakiw amtaraki.

11Jupanakasti nayra pachanakat amtasipxi, khititix markapar qhispiyki uka Moisesat amtasipxi, jiskt'asipxarakïnwa: “¿Kawkinkarak Nilo jawirat Moisesar qhispiyki uka Diosasti? Uka Moisesax israelitanakan jilïripächixaya. ¿Kawkinkarak khititix Moisesar Qullan Ajayupa churki uka Diosasti?

12¿Kawkinkarak khititix uka jach'a ch'amapsa Moisesar churki ukasti?, ¿kawkinkarak khititix markap nayraqatansa jach'a qutsa payar jaljki, wiñayatak aytatäñap munki ukasti?,

13¿kawkinkarak khititix quta manqhanjam jan llust'tasa makhatayki, caballonakas wasaranjam sarkaspa ukhama,

14uywanakas pampar saraqapkaspa ukham lurir Diosasti?” Pachpa Tatitun Ajayupaw jupanakarux irpäna. Ukham markaparux irpäna, ukatsti wali jach'a kankañ jikxatarakïna.

15Israelasti Tatiturux akham sasaw mayisïna: Tatay, alaxpachatpach uñtanipxita, kawkha qullana, k'ajkiri chiqantix utjkta ukkhatpacha. Munasiñama, ch'amamay uñacht'ayapxita; khuyapayasiñama, munart'asiñamay uñacht'ayapxita. Nanakan ayquñanakaxat janikiy maysar uñtamti.

16¡Jumätaw nanakan awkixaxa! Abrahamax janisay nanakar uñt'apkitpan, Israelax janisay nanakat amtasipkitpan, ukampis Tatay, jumaw nanakan awkixätaxa; nayratpacha jumaw nanakan qhispiyirixätaxa.

17Tatay, janiy jumat jithiqtat jakayapxistati, janirakiy chuymanakaxsa qalarayapxistati jumar jan jaysañatakixa. Luqtirinakamar munatam laykusay sum tukuyapxita, kawkïri ayllunakatix jumankki ukanak laykusay wasitat munasiñam uñacht'ayapxita.

18Markamax mä juk'a urunakatakikiw uka qullan utamankänxa, ukampis jichhax uñisirinakaxaw uka qullan utam takisipxi.

19Janis jumax kunapachas apnaqapkitasamän ukhamäpxtwa, janis kunapachas sutim apapkiriskäyät ukhamäpxtwa.

← Chapter 62 Chapter 64 →