Isaiah 45

aymara-1997

1Tatituw Ciro chacharux Persia markan reyipat utt'ayi, markanakaruw atipjayi, reyinakaparusti jan nuwaskir antuti. Tatitusti taqi markanakarux Ciro reyir jan saykatkir luri. Ukat saraki:

2“Nayaw juman nayraqatam sarä, jach'a alay pirqanak tinkuyä, broncet lurat punkunak t'unjä, hierrot lurat jist'añanakap jisk'a jisk'a tukjä.

3Nayaw jumarux imantat yänak katuyäma, kuna qamir yänakatix jamasan imantatäki ukanaka. Ukhamat yatïta nayan Tatitütaxa, Israelan mä sapa Diosapätapa.

4Israelax nayan ajllisit markaxawa, nayan chiqa luqtirixärakiwa. Uka markar munasaw jumarux sutimat jawssma, janis jumax nayar uñt'kchiyästa ukasa, jichhax mä reyit utt'aysma.

5Nayätwa Tatituxa, nayat yaqha Diosax janiw utjkiti. Nayaw jumarux nuwasiñatak wakichsma, janis jumax nayar uñt'kchiyästa ukasa,

6taqi aka uraqpachan yatipxañapataki, nayat juk'ampix janipun yaqha Diosan utjatapa. Nayätwa Tatituxa, janiw yaqhax utjkiti.

7Nayaw qhansa ch'amaksa uskta, sumankañsa, chijinaksa nayaw apayanta. Naya Tatituw taqi ukanak lurta.

8“Nayaw atipjañxa alaxpachatpach apayanï, alaxpach sullar uñtata, jallur uñtat apayanï, aka uraqisti uk katuqaniwa; qhispiyasiñasti mä achur uñtataw achuni, jak'apanxa chiqa kankañax panqarar uñtataw panqarani.”

9Mä ñiq'it lurat sañuxa, khititix lurki ukampix janiw ch'axwkaspati. Ñiq'isti irnaqirirux janiw siskiti: “Kuns luraskta” sasa. Janirakiw kuna mä luratasa luririparux siskiti: “Jumax janiw lurañ yatktati” sasaxa.

10Mä wawas janiw awkiparusa, taykaparus aka uraqir apanitapat juchañchkaspati.

11Tatitu, Israelan Qullan Diosapa, khititix Israelar sayt'ayki ukax siwa: “¿Jumanakasti wawanakaxan luratanakapat wayt'apxitasmati? ¿Jan ukax jumanakach yatichapxitäta kunatix lurañaxäki ukxa?

12Nayaw akapachampiru, jaqinakampirux lurta, alaxpachsa amparaxampiw janatatta, taqi kunanakatix alaxpachan utjki uksa nayarakiw lurta.

13Nayaw Ciro reyirux atipjañapatak uchta, thakhinakapsti sumaruw tukuyta; jupaw Jerusalén marka wasitat sayt'ayxani, Babilonia markan katuntat israelitanakarusti qullqi jan mayisaw antutxarakini.” Taqi ch'amani Tatituw ukham arsu.

14Tatitusti Israelarux siwa: “Egiptonkir yapu lurir jaqinakasa, Etiopiankir alakipa lurir jaqinakasa, Jabá chiqankir jach'a jaqinakasa, jumatakiw alt'asipxani, juman t'aqhisiyat jaqinakamäniwa, juman qhipamarak cadenampi ñach'antat sarapxani, juma nayraqatar killt'asisinsti sapxaniwa: ‘Chiqpachapuniw Tatitux jumanak taypinkaski, janiw yaqha diosax utjkiti” sasa.

15Ukampisa jumax jan uñjkaya Diosätawa, Israel markan qhispiyir Diosapätawa.

16Taqi khitinakatix diosanak lurasipki ukanakaxa, p'inqachjata, jisk'achjataw uñjasipxani.

17Ukampis Israel markarux Tatituw qhispiyi, wiñayatakiw qhispiyi, janirakiw jupax p'inqachatasa, jisk'achatas uñjaskxaniti.

18Alaxpach luriri, khititix Diosäki, Tatitükaraki, khititix aka uraqi lurasax sayt'ayki, khititix aka uraqin jan ch'usäñapatak jaqinaksa lurkaraki ukaxa, siwa: “Nayätwa Tatituxa, janiw yaqhax utjkiti.

19Nayax janiw kunsa jamasat arskti, janirakiw ch'amak k'uchunakansa arskti. Janiw israelitanakarux siskti: ‘Kawkhantix jan kunas utjki uka chiqan thaqhapxita’ sasaxa. Naya Tatitux chiqakpun arsta, kunatix chiqapäki uk arsurakta.

20“Tantacht'asipxam, jutapxarakim, markanakat jilt'iri taqi jakirinaka, taqini jak'achasinipxam. Jan yatiñan jaqinakaw utji, uka diosanakapsti uksar aksar muyuyasaw apnaqapxi, uka jan qhispiyir diosaruw mayisipxi.

21Parlapxam, arsusipxarakim, munapxsta ukapachax jumanakpura jiskt'asipxam: ¿Khitis nayratpacha taqi akanak arsünxa? ¿Khitis nayra urunakatpach yatiyänxa? ¿Janit naya Tatitu ukanak lurktxa? Janiw yaqha Diosax nayat sipan utjkiti. Nayat sipan yaqha atipjiri, qhispiyiri Diosax janiw utjkiti.

22“Jaya chiqan utjir markanaka, nayan ukar jutapxam, nayaw qhispiyapxäma, nayakïtwa Diosaxa, janiw yaqhax utjkiti.

23Kuntix siskta ukax chiqapawa, uka arsutaxasti phuqhasipuniniwa. Naya nayraqatan taqi jaqinakax killt'asipxani, nayarukiw yupaychapxitani. Kuntix nayax arskta ukax ukhamapunïniwa.

24Ukat taqinis sapxani: ‘Tatitukiw ch'amsa, atipt'añsa churistaspa’ sasa. Taqi khitinakatix uñisipkitu ukanakaxa, jisk'achjataw uñjasipxani.

25Nayïpan taqi Israel markax atipjani, nayankatapatsti wal kusisirakini.”

← Chapter 44 Chapter 46 →