Isaiah 44

aymara-1997

1“Israel, Jacobun markapa, nayan luqtirixa, nayan ajllisit marka, jichhax ist'ita,

2Nayätwa jumar irnuqir Tatitumaxa, janïra taykaman purakapat yurkta ukkhatpach jumarux sayt'aysma, ukatsti yanapt'araksma. Jacobun markapa, jan axsaramti, jumätaw nayan luqtirixaxa, nayan ajllisita markaxa,

3nayax wasaran uma jalayä, waña uraqinsti jisk'a jawiranak jalayä. Wawanakamarusti mä machaq jakañ churä, jupanakxarux suma waxt'äwinak apayanï.

4Ukasti suma qarpat chhuxllar uñtataw jilani, jawira thiyan jilasir quqanakar uñtata.

5Maynisti: ‘Nayax Tatitunktwa’ saniwa, maynisti: ‘Jacobut saraqirïtwa’ sarakiniwa, maynïrix: ‘Tatitunktwa’ sasaw amparapar qillqt'asini, jupan sutipxarusti Israel sutimpiw yapt'asirakini.”

6Tatitu, jach'a reyi, Israelan qhispiyiripa, taqi ch'amani Tatitux siwa: “Nayätwa qalltasa, tukuyasa; nayat juk'ampix janiw yaqha diosax utjkiti.

7Utjchi ukapachasti, nayätwa sas uñstpan, sarakpan; kunäkanitix akat qhiparux uksa yatiyarakpan, kunanakatix luraskani uksa arsurakpan.

8Ukampis ¡ch'amañcht'asipxam, jan axsarapxamti! Kunatix nayratpach lurasiñapäki ukanak yatiyapxsma, jumanakasti taqi ukanak uñjapxtawa. Janiw yaqha diosax nayat sipan utjkiti, Janiw yaqha diosax nayjam imirix utjkiti; Utjkchi ukasa, janiw nayax uñt'kti.”

9Khitinakatix diosanak lurapki ukanakax janiw kunäpkisa, jaqin lurat uka diosanakar munasipki ukanakax janiw kunatakis askïkiti. Khitinakatix uka diosanakar yupaychapki ukanakasti luqhi juykhu jaqinakawa, ukatpï jichhax mä p'inqa uñjasipxanixa.

10Khititix yupaychañataki mä dios lurki chiqa diosäkaspas ukhama uka jaqixa, inamayaw urunaksa apt'asi.

11Uka diosanakar yupaychirinakasti p'inqachjataw uñjasipxani. Uka diosanak luriristi mä jaqikiwa. Taqi jupanakatix taripäwi urun uñstapxaspa ukaxa, jisk'achjata, khathatjayataw jikxatasipxaspa.

12Uñjañäni kunsa mä herrero jaqix luri uka: Cincelap katusinxa, nina k'illimaruw junt'uptayi, ukatsti martillompi liq'susaw kunjämarutix munki ukhamar apsu. Wali ch'amampiw ukham luraraki. Ukampisa, herrerotix jan manq'kaspaxa, ch'amapax tukusispawa, janitix umsa umkaspaxa, mäkiw qarjtarakispa.

13Jichhax diosanak luririru uñjañäni. Jupax kuntix lurañapäki uk sum tupt'asaw katuqi, kunayman qillqañ yänakampi sum lurt'asaw jaqir uñtat mä dios lursu, ukatsti mä temploruw uka jan jakañan diosarux ucharaki.

14Maynisti cedro quqanak ayrunti, jallux uka quqanakar purxatasaw jiltayi; ukatsti cedrox khuchhurañatakix utjaniwa. Jan ukax inas ciprés sata quqanaka, roble quqanaksa munchixa, suma thuru jilantañapkamaw pachpa ch'umin sum uñjaraki.

15Ukatsti jaqix uka quqanakan jisk'a lawanakapxa, nina phichhañataki, ukamp junt'uchasiñatakiw apasi, jan ukax horno junt'uchasin t'ant'a lurañatakiw apasi; mayninakasti uka lawanakatxa mä dios lurasiñatakiw apasipxi, ukhamat uka diosar killt'asis yupaychañataki.

16Yaqhipanakax chikat lawampix nina aqtayasaw aychanak kankapxi, ukatsti uka aychanak manq'antasax k'uchikiw qhiparapxi. Uka pachpa lawampirakiw junt'uchasipxi, ukatsti sapxarakiwa: “kunja sumas nina jak'ankañaxa, niyaw junt'uptasipktan” sasa.

17Uka jilt'ir lawatsti mä ídolo lursupxaraki, uka nayraqatan killt'asisaw yupaychapxi, ukatsti wali achikt'asisaw sapxaraki: “¡Qhispiyapxita, jumaw nanakan diosaxätaxa!” sasa.

18Uka jaqinakax janiw kuns yatipkiti, nayranakapas juykhuwa, janirakiw kuns uñjapkiti, amuyunakapas q'ala ch'amakt'atawa, janiw kuns amuyt'apkiti.

19Sum amuyt'asiñatakix yatiñ kankañapas janiw utjkiti, ukat sapxañapataki: “Chikat lawampix nina naktayapxta, ukampiw t'ant'a lurasipxta, aychsa kankasipxarakta ukhamat manq'atäpxañaxataki; ukat jilt'ki uka lawatsti mä axtaskañ dios lurapxarakta, ¡jichhax kunarutix yupaychasipkta ukax mä jisk'a lawakiwa!” sasa.

20Chiqpachansa, qhillsa manq'apkaspa ukhamawa. Uka lurañax k'ari amuyunakampi sallqjayasiñawa. Uka jaqinakasti janiw qhispiyasipkaniti. Kunatix amparanakapan utjki ukax k'arikamakïtapsa janiw amuyapkaniti.

21“Israel, Jacobun markapa, amtasimaya, jumaw nayan luqtirixätaxa; nayaw jumarux irnuqsma. Israel, nayat jan armasistati.

22Nayaw juchanakamsa, pantasitanakamsa chhaqtayta, kunjämatix qinayanakax chhaqtkix ukhama. Nayan ukar kuttanxam, nayaw jumarux qhispiysma.”

23¡Alaxpacha, kuntix Tatitux lurki ukat kusisiñat arnaqasim! ¡Uraq manqhanaka, kusisiñat arnaqasipxam! ¡Qullunaka, ch'uminakan utji uka quqanaka, kusisiñat arnaqasipxam! Tatitux jach'a kankañap uñacht'ayi, Israelaru, Jacobun markaparus qhispiyarakiwa.

24Jumar qhispiyir Tatitumaxa, khititix janïra yurktas ukkhatpach irnuqtam ukax siwa: “Taqi kun luriri Tatitux nayätwa, nayaw alaxpachsa janatatta, aka uraqsa sayt'ayarakta jan khitin yanapapampi.

25Kuntix k'ari profetanakax parlapki ukanakxa janiw phuqhasiykti; uka yatiri jaqinakan amuyt'anakapsa chhaqtaytwa. Nayaw amuyt'ani jaqinakarux jupanakkam ch'axwayta, jupanakan yatiñanakapsa mä luqhi kankañar tukuyarakta.

26Ukampisa khitinakatix nayan luqtirixäpki ukanakan arunakap phuqhayapuntwa, khithatanakaxan amtatanakapsa suma mistuyarakta. Nayaw Jerusalenan wasitat jaqinïxañapatak arsta, Judá uraqinkir markanakas wasitat sayt'ayatäxañapataki: Aynacht'atanakapatsti nayaw jupanakarux sartayä.

27Nayax jach'a qutan umanakaparus ‘wañt'am’ siristwa, jawiranakapas jan umani tukpan sarakiristwa.

28Ciro reyiruw sista: ‘Jumaw awatirixätaxa, kuntix nayax munkä uk jumax luräta’; Jerusalenarusti saraktwa: ‘Jumax wasitat sayt'ayatäxätawa’; Tatitun utaparusti saraktwa: ‘Wasitat qalltatpach sayt'ayatäxätawa’ sasa.”

← Chapter 43 Chapter 45 →