Isaiah 41

aymara-1997

1“Quta tuqinkir markanaka, nayan nayraqataxan amukt'apxam; markanaka, wal ch'am katxatapxam. Kunatix jichhax parlañasäki uka tuqit parlir jutapxam, uka tuqit parlir tantacht'asipxañani.

2Nayaw Israelan Diosapätxa; nayarakiw inti jalsu tuqita atipt'ir Ciro reyirux jutayarakta. Uka reyin ejercitopax niyaw jutanti, ukkañkamax reyinakarux niyaw jisk'achjta, markanakapsa katuntayaraktwa. Ciro reyix espadapampiw q'al tukji, mä wichhu t'unar uñtata willitati.

3Uka markanak katurañatakis jank'akiw jali kayupampix janis uraqir takt'kaspa ukhama.

4¿Khitis taqi ukanak ukham luri? ¿Khitis qalltatpach taqi kunsa ukham sarayi, kunjämarutix sarañapäki ukhamaru? Naya sapa Tatitu Diosakiw ukham lurta, nayarakïtwa qalltasa, tukuyasa.

5Quta tuqinkir markanakax axsarayasipxänwa, kunapachatix Ciro reyirux ejercitopampi jutaskir uñjapkäna ukkhaxa; uraqis maysat maysakamaw khathatirakïna.

6Sapa mayni irnaqiriw yanapasi, masiparus ch'amañcht'araki.

7Yaqha diosanak luriristi qurita, qullqit lurir jaqiruw ch'amañchi, martillompi liq'iristi yunquer liq'iriruw ch'amañchi, luratapas walikïskiw sarakiwa, ukatsti uka dios luratapxa jan liwisiñapatakix clavonakampiw sum sayt'ayi.

8“Israel, Jacobun markapa, nayan munata Abrahaman wawanakapat saraqir marka, sum ist'ita:

9Nayaw jumarux uraqi tukuyapatpach irpsunsma, wali jaya uraqitpach jawsansma, saraksmawa: ‘Jumaw nayan luqtirixätaxa.’ Nayaw jumarux ajllissma, janiw jisk'achkaraksmati.

10Jan axsaramti, nayaw jumampïskta, jan axsaramti, juman Diosamax nayäsktwa. Nayaw ch'amañchaskäma, nayarakiw yanapaskäma, atipjiri amparaxampiw uywaskäma.

11Taqi khitinakatix uñisipktam ukanakaxa, p'inqachata, jisk'achjataw uñjasipxani; jumampi nuwasirinakasti q'ala tukjataw uñjasipxani.

12Uñisirinakamarux thaqaskätawa, ukampis janiw jikxatkätati; jumampi nuwasirinakasa, janis utjapkaspa ukhamaw tukusipxani.

13Naya, juman Tatitu Diosamaw jumarux amparat wayxarus irpsma; saraksmawa: ‘Jan axsaramti, nayaw yanapaskäma’ ” sasa.

14Tatitusti sarakiwa: “Israel, Jacobun markapa, jisk'äskamsa, pisi ch'amäskamsa, jan axsaramti, nayaw yanapaskäma. Naya, Israelan Qullan Diosapa, nayaw qhispiyirimätxa.

15Nayaw jumarux trigo jawq'añar uñtat tukuyaskäma, machaqa, suma ari lakanakani kuna; qullunak jawq'thapïta, laq'aruw tukuyäta, jisk'a qullunaksti jipiruw tukuyäta.

16Ukatsti thayan apasxañapatakiw khuyt'äta, tutuka thayaw apasxani. Ukapachaw jumax Tatitunkasax kusisïta, Israelan Qullan Diosapatsti kusisirakïtawa.

17“Jan yänakani jaqinakax uma thaqapxi, janiw jikxatapkiti. Laxranakapas umatjamaxa, q'ala wañantataw uñjasi; ukampis naya Tatituw jupanakarux uñjaskä, naya, Israelan Diosapasti janiw jupanakarux antutkäti.

18Nayaw wasara qullunakana jawir umanak sartayä, qhirwanakansti uma jalsunak utjayä; wasara uraqinakasti wali umani uraqinakaruw tukuyä, waña uraqinakatsti uma jalsuyarakï.

19Wasaransti cedro quqanaka ayruntä, acacianaka, arrayanes, ukhamaraki olivos quqanaka; waña uraqinsti pinonaka, cipreses sata quqanak jilayarakï.

20Ukhamat taqinis uñjapxani, yatipxarakini, taqi ch'amaxampi taqi ukanak lurataxata. Ukapachaw yatipxarakini nayax Israelan Qullan Diosapätaxa.”

21Jacobun Tatitu reyipasti siwa: “Jaqin lurat k'ari diosanaka, jutapxam, jumanakat arsusipxam.

22Kunatix akat qhiparux luraskani ukanak yatiyapxita, kunatix luraskäna ukanaksa amuyt'ayapxita.

23Kunatix niya lurasiñapäki uksa yatiyapxam; jumanakan diosäpxatamsti uñacht'ayapxam. Walïpasa jan walïpasa, kunsa lurasipkakim, kunatix axsarayapkitaspa, khathatiyapkitaspa ukanaksa uñacht'ayapxita.

24¡Ukampis jumanakax janiw kunäpktasa, janirakiw kun lurañsa yatipktati! Jumanakar yaqhachirix mä jisk'achkañawa.

25Tatitux saskakiwa: “Persia markat mä reyiw juti, nayax sutipat jawsarakta, jupax marka apnaqirinakaruw takxatani. Amsta tuqit purintanini, sañu lurir jaqix ñiq'i taksux ukham taksuni.

26¿Khitis taqi akanak qalltatpach yatiyixa, ukhamat yatiñasatakixa? ¿Khitis nayratpach yatiyixa, ukhamat jiwasan chiqätap yatiñasatakixa? Janiw khitis jumanakat yatiykiti, janiw khitis mä arsa ist'kiti.

27Nayaw qalltatpach Jerusalén markarux yatiyta, uka markarux mä khitha khithaniraktxa, jaqinakapan mäki kuttanxañapat yatiyañataki.

28Uñatatastwa, ukatsti janiw yaqha diosanakax utjkiti, janiw khitis iwxa arunak churirjamäkiti, janirakiw maynis jiskt'anakaxarux arusxatañatak ch'amanïkiti.

29¡Taqi jupanakasti janiw kunäpkisa! Janiw kun lurañsa yatipkiti; jan ukasti, ina ch'usa k'ari diosanakakiwa.

← Chapter 40 Chapter 42 →