Isaiah 17

aymara-1997

1Damasco markataki profecía arunaka: Damascox janiw juk'ampi markäkxaniti, mä t'unjat marka mayjar allthapitakïxaniwa.

2Wiñayatak apanukutaw uñjasini, chhuxllanakakiw ukan jilxani; uywanakasti jan khitin kamsataw uka chhuxllanak manq'arapxani.

3Efrainax Israelan jach'achasiñap markawa, jichhax pirqamp jan muyuntataw uñjasini; Siria markat qhiparir Damasco markas q'ala chhaqtayatäniwa. Ukham siw taqi ch'aman Tatituxa.

4Uka urunxa Jacobun jach'achasiñap Samaria markax jan ch'amaniw uñjasini, qamir kankañapas chhaqtayatäniwa.

5Israel markachirinakax q'ala tukjatäpxaniwa; kunjämatix trigo apthapitat mä trigo yapux q'alaki uñjasixa ukhamäpxaniwa. Mä juk'a jilt'irinakasa trigo puyanakar uñtataw uka yapun jaqtat uñjasipxani,

6jan ukax kunjämtix olivo quqax thalsutaxa, mä qawqha achunakapak pachpa quqan jilt'kixa, ukhamäpxaniwa. Ukham siw Israelan Tatitu Diosapaxa.

7Uka urunxa, israelit jaqinakax jupar uskt'ir Tatituruw kuttanxapxani, Israelan Qullan Diosapäki ukaru.

8Janiw mayampis Baal diosarux luqtäwinak churaskxapxaniti, janirakiw Astarté sat diosarus yupaychkxapxaniti, uka diosanakax jupanakan luratätap layku.

9Uka urunxa, ch'aman markanakamax apanukutäniwa, kunjämtix heveonakana, amorreonakan markanakapax israelitanakar axsaratapat apanukutäkänxa ukhama. Ch'usa wasarar tukuyatäpxaniwa,

10qhispiyktam uka Diosar armatamata, jupax juman arxatirimätamxa, janiw amtasktati. Jumax suma panqar yapunak yapuchtaxa, jan uñt'at diosatakiw uka panqaranak ayrustaxa,

11uka yapunak sum uñjañaruw uchastaxa, qhipürpachaw uka alinakax panqarsu. Ukampis jan qullkañ usu jutkani ukkhaxa, janiw kuna achunaksa apthapkätati.

12¡Ist'apxam, walja jaqinakan ch'axwatapax jach'a qutan qhuthutitapjamawa! Markanakax jach'at uxupxi jach'a jawiran qhuthutitapjama.

13Ukampis Tatitux jupanakar tuqintki ukkhax jayaruw jaltxapxi, kunjämtix thayax wichhunakar apaskix ukhama, jan ukax kunjämtix tutuka thayax ch'aphinak apaskix ukhama.

14Jayp'u tuqirusti axsarkañjamäpxiwa, ukampis qhantatirux janiw kunas utjkxiti. Ukhamaw jiwasar lunthatjirinakax tukusipxi, jiwasar jan walt'ayirinakas ukham tukusipxi.

← Chapter 16 Chapter 18 →