Ezekiel 5

aymara-1997

1Tatitux sarakituwa: “Ezequiel, jaqin yuqapa, jumax mä ari cuchillo katum, sunkha khithurasiñ navajäkaspas ukhama, ukampisti ñik'utama, sunkhama khithurasim. Ukatsti uka ñik'utam mä balanzar apxatasin kimsar jaljam.

2Jerusalén markax katuntat uñjaskani ukkhasti, uka kimsar jaljat ñik'utxa, mayïrxa marka taypir sarasin ukan nakhantayam; mayïrsti, mä espadampi khuchhunuqas marka muytpachar willtanim, ukat jilt'äki uksti thayarurak willxaruyam. Nayasti markankir jaqinakan qhipap sarä, mä espadas ayt'ata.

3Uka ñik'utanakatsti, mä juk'a katusin isimar chinkatasirakim.

4Ukatsti uka ñik'utanakat mä juk'a katusin ninar phichhantam. Ukkhat mä ninax mistuni taqi Israel markan phichhantatäñapataki.

5“Naya, Tatituw uk arsta: Jerusalén markax ukäskiwa. Nayaw taqi markanaka, jach'a markanak taypir uskta.

6Ukampis Jerusalén markax nayan kamachi arunakaxatakiw sayt'asi, ukatsti jupa jak'ankir markanakat sipan juk'ampi jan waliw tukuraki, kamachi arunakaxarus janiw ist'kiti, janiw arkkarakisa.

7“Ukatpï naya, Tatitux sistxa: Jumanakax jumanak jak'an utjir markanakat sipan juk'ampi jan waliw tukupxtaxa, janiw arsutanakaxarjam sarnaqapktati; janirakiw jumanakan jak'amankir markanakan kamachinakapsa phuqhapktati.

8Ukatpï naya, Tatitux sistxa: Jerusalén marka, nayax jumar jan walt'ayañatakiw sayt'äxa; uksti taqi markanakan uñjkañaw phuqharakï,

9kuntix nayax jumampi lurkä uksti janipuniw kunapachas lurirïkti, janirakiw mayampsa ukham lurkxäti. Luratanakamax sinti axtaskañapuniwa.

10Jumanak taypinsti awkinakax pachpa wawanakaparuw manq'antasipxani, wawanakasti awkinakaparuw manq'antapxarakini. Jumar juchañchañatak arsutaxsti phuqhapunïwa, jilt'iri jaqinakarusti taqi tuqiruw ananukurakï.

11Naya, Tatituw jakañax layku juramentompi arsta: jumanakax nayan qullan utaxsa axtaskañ yaqha diosanakampi, q'añu luräwinakamampi q'añuchjapxtaxa, ukhamarakiw nayax jumanakar jan khuyapt'ayasis tukjapxäma, janipuniw khuyapt'ayasipkämati.

12Jaqinakamatsti mä chikatax usunakampi, manq'atjam jiwañampiw aka pachpa markan jiwarapxani, chikat jaqinakasti, markam jak'ankir uñisirinakan jiwarayataw uñjasipxani, ukat jilt'irinakarusti taqi tuqiruw ananukurakï. Jupanakan qhipapsti nayaw espadas ayt'at arktä.

13Ukapachaw nayax jach'a q'apisiñaxampi jupanakarux mutuyä, q'apisiñaxax malarkani ukkhaw yatipxani naya, Israelan Diosapa arsutaxa phuqhirïtaxa.

14Jerusalén marka, nayasti q'alpun t'unjäma; juma jak'ankir markanak taypin jumarux jisk'achjäma, ukhamat taqinis uñjapxañapataki.

15Nayax wali jach'a phiñasiñampi juma tuqi arsutanakax phuqkä, jan khuyapt'ayasis mutuykäma ukkhasti, taqiniw jan wali arunakampi arnaqapxätam, chuymamsa ust'ayapxarakïtam, juma jak'ankir markanakatakisti mä jach'a yatichäwïyätawa. Naya, Tatituw uk arsta.

16Nayaw jumanakxarux manq'at awtjayasiñ apayanï, ukasti axsarkañ t'unjir mich'inakar uñtatäniwa. Jïsa, jumanakxarux t'unjatäñampi, mach'ampi, manq'at pist'at sarnaqañampi apayanï.

17Jïsa, nayaw jumanakxarux mach'ampi, usunakampi, jiwañampi apayanï, monte animalanakaw wawanakamarux q'al manq'arani. Jumanakatsti, waljaniruw nuwasïwinakan jiwarayarakï. Naya, Tatituw uk arsta” sasa.

← Chapter 4 Chapter 6 →