Ezekiel 4

aymara-1997

1“Ezequiel, jaqin yuqapa, chhuyu lurat mä adobe ittam, uka adoberusti kunjämäkitix Jerusalén markax ukhampach qillqsum.

2Ukatsti uka markarux walja ejercitompi, nuwasiñ yänakampi muyuntayam, jach'a pirqampi uyuchrantam, pirqa jak'ar jach'a makhatañ lurarakim markar mantañataki, ukhamat ejercitompi muyuntat markäkaspas ukham uñtasiñapataki.

3Ukatsti hierrot lurat mä jach'a lata katum; uka latampisti jumampi, markampi uka taypir mä pirqäkaspas ukham uskum, ukat uka marka uñkatasiru sayt'asim nuwantañatakjama. Ukasti israelitanakatakix mä unañchäwïniwa.

4“Ukatsti ch'iqäxat iknuqäta, jumxarusti Israelan juchap apxatasirakïta. Ukham ch'iqäxat iknuqatasti,

5kimsa patak llätunka tunka urunakaw ikïta, sapa uru ikitasti Israel markan mä mara jucha lurataparüniwa.

6Ukham ch'iqäxat ikiñ tukuyxäta ukkhasti, kupi tuqitarak ikt'äta, ukatsti Judá markan juchap jumxarux apxatasirakïta, pusi tunka ururakiw ukham ikïta. Sapa urusti mä mara jucha lurataparüniwa.

7Ukatsti uñisirinakapan muyuntat Jerusalén marka tuqiruw uñtarakïta, amparanakam luqtasaw nayan sutixar uka markatak arsüta.

8Nayasti juman jan maysat maysar unxtaskañamatakix ñach'antarakïmawa, uka t'aqhisiñ urunakam phuqhasiñapkama.

9“Ukatsti mä juk'a trigo aptarakim, cebada, mijo, avena, haba, lenteja ukanakampi; taqi ukanak mä llatakur warthapisin kittam, ukatsti ukanakat t'ant'a lurasim. Uka t'ant'a manqasïta, ch'iqäxat ikkäta uka kimsa patak llätunka tunka urunakana.

10Manq'amsti manq'añäki ukkhakiw manq'äta, sapa urusti chikat ukkhak manq'arakïta;

11umsti umt'añamäki ukkhak umt'äta, sapa urusti chikat litroki umarakïta.

12Manq'amasti cebadat lurat t'ant'äniwa, ukasti jaqi jamampi phayatäniwa, uksti jaqin uñjkataw wakichasirakïta” sasa.

13Ukxarusti Tatitux saskakïnwa: “Israelita jaqinakax ukham q'añu manq'a manq'apxani kawki markanakarutix apanukuykä uka markanakanxa” sasa.

14Nayasti ukxarux saraktwa: “Tatay, nayax janipuniw kunapachas kuna q'añunaksa llamkt'irïkti; janipuniw nayax jupapach jiwat uywanakan aychapsa manq'irïkti, janirakiw monte animalanakan jiwayat aychapsa, jan manq'añ animalanakan aychapsa manq'irïkti” sasa.

15Jupasti ukxarux sarakituwa: “Ukhamax jaqi jamampi phayasiñ lantxa, vaca phurumpiw manq'am phayasïta” sasa.

16Ukxarusti saskakituwa: “Jerusalén markansti manq'at pist'atäñ utjayä. Manq'sti juk'at juk'atak katuqapxani, umasa juk'at juk'atak churasini, jaqinakasti wali jach'a llakimpi, axsartañampiw manq'apxani, umt'apxarakini.

17Umas manq'as pist'akipuniniwa, jupanakkamasti wali axsarañampiw uñkatasipxani. Juchanak luratanakapatsti jakkirpacharakiw ñusantapxani” sasa.

← Chapter 3 Chapter 5 →