Ezekiel 41

aymara-1997

1Ukatsti uka jaqix Tatitun utap manqharuw irpitu, ukansti pilaranak tupt'arakïna, uka pilaranakasti thururux kimsa metronïnwa.

2Punkusti iramarux phisqa metronïnwa; uka punku apxäsir pirqanakasti sapa mayax iramarux pä metro chikatankamänwa. Ukatsti taypinkir jach'a uta tupt'arakïna, ukasti iramarux pä tunka metroni, sayt'urusti tunka metronïnwa.

3Ukatsti manqha tuqinkir uta tupt'iriw sararakïna, ukansti mantañawjankiri pilaranak tupt'i, sapa mayasti thururux kimsa metronkamänwa. Mantañäki ukasti iramarux kimsa metronïnwa, ukankir pilaranakasti paypachax thururux kimsa metro chikatankamänwa.

4Ukat uka manqhankir uta tupt'arakïna, ukasti taqi tuqirusa tunka metronkamänwa. Ukat nayarux sarakitu: “Akawjax Qullanan Qullanapawa” sasa.

5Ukatsti uka jaqix Tatitun utapan pirqap tupt'arakïna, ukasti thururux kimsa metronïnwa. Tatitun utap muytpachansti walja utanakaw siqicht'at utjarakïna, ukanakasti pä metroni utanakänwa.

6Uka jisk'a utanakasti mayax maya patxankänwa, ukhamat kimsa altusan utar tukusa, sapa altusansti kimsa tunka jisk'a utanakaw utjäna. Tatitun utap pirqa muytapansti, pirqat mistsuta katxäsir lawanakaw utjäna; uka katxäsir lawanakaw maysa tunqinkir jisk'a utanak thurxäsiyäna, templon pirqapar jan junukiptasa.

7Uka utanak anqäxansti, Tatitun utapar muytatäkän uka jak'an mä makhatañaw utjäna, ukasti amstakamaw purirakïna, uka chiqanjam makhatasinsti, sapa altusan utanakapax juk'ampi jach'anakaw uñstäna.

8Tatitun utapar muytatasti, alayarux kimsa metroni jach'a pirqampi muyuntatänwa, uka pirqxaru utacht'atänwa Tatitun utap jak'ankir utanakaxa.

9Uka utanakan anqäx pirqapasti pä metro chikatani thuru pirqänwa, uka utanakata, sacerdotenakan utanakapkama, Tatitun utap muytatäki ukan mä ch'usawjaw utjäna, ukasti iramarux tunka metronïnwa.

11Uka ch'usawjar mistuñatakisti pä punkunakaw utjäna, mayax amsta tuqina, mayasti aynach tuqina. Uka ch'usawjasti iramarux pä metro chikataniw tupt'asïna.

12Inti jalanta tuqitsti, uka jist'antata uta anqäx tuqir uñtat mä utaw utjarakïna, ukasti iramarux kimsa tunka phisqan metronïnwa, sayt'urusti pusi tunka phisqan metronirakïnwa, uka utan pirqapasti pä metro chikatani thuru pirqänwa.

13Uka jaqisti Tatitun utap tupt'arakïna, sayt'urusti taqpachax phisqa tunka metronïnwa. Taqpach uta anqäxanakasti, utasa, pirqanakapasa phisqa tunka metronirakïnwa.

14Uka templon pirqapasa, inti jalsu tuqin utjir uta anqäxanakapasa, phisqa tunka metrow tupt'asirakïna.

15Ukatsti Tatitun utap qhipäxankir jach'a utampi, muyuntat pirqa uñkatasimpi, purap tuqin utjir pirqanakampi tupt'arakïna, taqi ukanakasti phisqa tunka metronirakïnwa. Tatitun utap manqhankir utanakasa, ukar mantañawjanakapasa,

16lawampi suk'akipatänwa. Ventananakasa fierronakampi uchatänwa, marconakapas kimsa tuqitpach lawampi suk'akipatänwa. Aynachata ventananakkama, punkut amsta tuqirusa, suma lawanakampi suk'akipatänwa. Tatitun utapan pirqanakapasti anqäxatsa, manqhäxatsa,

18querubines sat chhiqhaninakar uñtasita, palmeranakar uñtasit qillqsutanakampi imsutänwa. Uka chhiqhaninakasti sapa maynix pä ajanunkamänwa;

19maysa tuqit mä jaqi ajanuw mä palmera alir uñch'ukiskäna, mayasti mä leonan ajanupaw yaqha palmera alir uñch'ukiskarakïna. Ukhamaw Tatitun utapa muytpachan utjäna

20chhiqhaninakaru, palmeranakar uñtatanakampi qillqsutanaka, pirqa aynachat qalltasina, punku amstakama. Taypinkir jach'a uta pirqansti,

21punku katxäsiripax pusi tuqitpach ukch'akam lawanakänwa. Qullanan Qullanapa chiqa uñkatasinsti, mayaw utjarakïna

22lawat lurat altarar uñtata, sayt'urusa, iramarusa mä metronkamänwa, amstarusti mä metro chikataniraki. Ukat uka jaqix sarakitu: “Akax Tatitun nayraqatapankir mesawa” sasa.

23Taypinkir jach'a utasa, Qullanan Qullanapa chiqawjasa pä punkunïnwa. Sapa punkusti payar jaljatänwa, ukatsti pirqa tuqiruw jist'artarakïna.

25Taypinkir jach'a utan punkunakapasti, chhiqhaninakaru, palmeranakar uñtatanakampi lurt'atänwa, kunjämatix pirqanakan utjkän ukhama. Mantañ tuqinkir uta anqäx pirqapasti, lawat luratampi utacht'atjamänwa.

26Uka mantaña tuqinkiri utansti purap tuqin suma rejanakampi uskuntat ventananakaw utjäna, palmeranakar uñtat lurt'ata. Tatitun utapar utachkatatäkäna ukanakasti lawat luratampi utachxatatarakïnwa.

← Chapter 40 Chapter 42 →