Ezekiel 40 — aymara-1997

1Nayrïr phaxsina, tunka uru saraqatarusti, uka urux machaq mara qallta urünwa, uka uruw Tatitux amparap nayxar luqxatitu, ukatsti mä unañchäwi tuqiw Israel uraqir irpitu. Babilonia uraqir apatäpkäyäta ukat aksarux niya pä tunka phisqan maräxänwa, Jerusalén markax katuntatäkän ukkhatsti tunka pusin maräxarakïnwa. Israel uraqinsti Tatitux mä jach'a qullu pataruw irpnuqitu, ukatpach aynach tuqin walja jach'a utanak uñjta, ukax mä markäkaspas ukhamänwa.

3Tatitusti ukaruw irpitu, ukansti mä jaqiruw uñjta broncet luratäkaspas ukhama. Uka jaqix punkun sayt'atäskänwa, amparaparusti linot lurat thuru wiska iqt'atänwa, tupuñ lawa ayt'atarakïnwa.

4Uka jaqisti sarakituwa: “Jichhax wal wali uñtam, sum ist'arakim; kunanaktix uñacht'aykäm ukanaksti sum amuyam, Tatituw jumarux akar irpantam nayan jumar taqi akanak uñacht'ayañaxataki. Ukanak uñjasinsti jank'ak Israel markar yatiyam” sasa.

5Tatitun utapasti mä pirqampi muyuntatänwa. Uka jaqix amparapan tupuñ lawa ayt'atänwa, uka lawasti kimsa metronïnwa, ukampiw uka pirqa tupt'äna. Uka pirqax iramarux kimsa metronïnwa, alayarusti uka kipkaraki.

6Ukatsti inti jalsu tuqinkkis uka punkuruw saräna, patillpatillnäm makhatawayasinsti ukankir punku umbralanak tupt'i, ukasti iramarux kimsa metronïnwa.

7Mantañawjansti utanakaw puraparux utjäna, ukanakasti iramarusa sayt'urusa kimsa metronkamakïnwa, mä utat mä utakamasti pä metro chikataniw utjarakïna. Ukxarusti mantañawja jak'an mä punkuw utjäna, ukasti Tatitun utap tuqir uñtatänwa, uka punkun umbralapasti kimsa metronïnwa.

8Uka jaqisti kawkïr punkutix Tatitun utapar mantki uk tupt'araki, ukax pusi metronïnwa. Ukxarusti pä pilaranakaw utjäna, ukanakasti thururux mä metronkamänwa.

10Inti jalsu tuqinkir mantañawjansti kimsa utanakaw purapäxan utjäna, uka utanakasti kimspachax ukch'akamakïnwa, purap tuqipan utjir pilaranakasti paypachax ukch'a purakïnwa.

11Ukatsti uka jaqix mantañ punku tupt'arakïna: ukasti iramarux phisqa metroni, mantañ tuqirusti suxta metro chikatanirakïnwa.

12Uka utanak uñkatasinsti mä jisk'a pirqaw utjäna, uka pirqasti taqi tuqit iramarux chikat metronkamänwa. Sapa utasti iramarusa, sayt'urusa kimsa metronkamänwa.

13Ukatsti uka mantañawja tupt'äna, maya uta manqhatpacha, uñkatasinkki uka uta manqhakama, mä punkut mä punku sarakipasa, taqi ukanakasti tunka payan metro chikatanïnwa.

14Ukxarusti mantañawja tupt'arakïna, ukasti tunka metronïnwa. Mantañ tuqinkkäna uka utasti, uta anqarux taqi tuqit muyuntäna.

15Uka mantañasti anqäxat manqhakamax pä tunka phisqan metronïnwa.

16Ukankir utanakan pirqanakapax manqhäxat rejanakani ventananakampi muytatänwa. Mantañ utasa manqha tuqit ventananakampi muytatarakïnwa. Uka pirqanakansti palmerar uñtasitanakampi qillqkatataw utjarakïna.

17Ukatsti uka jaqix uta anqäxaruw irpitu. Uka uta anqäxan thiyanakapasti qalanakampi suk'sutänwa, kimsa tunka utanakampi muytatarakïnwa.

18Qalanakampi suk'sutäki ukax uta anqa muytatänwa, qawqch'äkitix uka punku mantañax ukch'pach suk'sutänwa.

19Uka jaqisti uka punku uñkatasi manqhatpacha, punku anqäxkamaw tupt'äna, ukasti phisqa tunka metronïnwa.

20Ukatsti uka jaqix amsta tuqir mistuñ punku tupt'arakïna; saya tuqiru, irana tuqiru, jan ukax, uta anqäxa tuqiru.

21Puraparusti pilaranakani kimsa utanakanïnwa, mantañawjapasti inti jalsu tuqit mantañäkis ukch'arakikïnwa, sayt'urux pä tunka phisqan metroni, iramarusti tunka payan chikatan metronirakïnwa.

22Uta mantañanakasa, ventananakasa, palmeranakasa, inti jalsu tuqinkir mantañanjam ukch'akamakirakïnwa. Aka punkurusti paqallqu patillpatillanakat makhatañarakïnwa, ukat ukankir uta mantañasti manqha tuqinkarakïnwa.

23Inti jalsu tuqitsa, amsta tuqitsa, anqäx tuqit mantaniñawjansti, mä yaqha mantañaw utjäna, ukasti manqhankir uta anqäx tuqiruw sararakïna. Uka jaqisti, mä mantañat mä mantañkamaw tupt'äna, ukasti phisqa tunka metrow tupt'asïna.

24Ukatsti uka jaqix aynach tuqiruw irparakitu, kawkhantix mä mantañax utjkän uka chiqaru, ukansti pilaranaka, utar mantañawjanak tupt'arakïna, ukanakasti maya mantañanakjam ukch'anakarakikïnwa.

25Uka utar mantañäki ukasti, mayanakjam ventananakampi muytatarakïnwa. Taqpachasti sayt'urux pä tunka phisqan metroni, iramarusti tunka payan metro chikatanirakïnwa.

26Ukansti paqallqu patillpatillanakapaw utjarakïna, utar mantañawjapasti manqha tuqinkarakïnwa. Ukankir pilaranakansti palmera alinak qillqt'ataw utjarakïna, maya purapäxana.

27Manqhankir uta anqäxasti aynach tuqirux mä punkunïnwa. Ukat uka jaqix aynach tuqinkir pä punkutxa, mä punkut mä punkukam tupt'arakïna, ukasti phisqa tunka metronïnwa.

28Ukatsti jank'akiw aynach tuqinkir mantañäkis ukawjar irpitu, manqhankir uta anqäxaru. Ukatsti jupax aynach tuqinkir punku tupt'äna, uka punkusti maya punkunak ukch'arakïnwa.

29Utanakapasa, ukar mantañanakapasa, pilaranakapasa, mayanakjam ukch'arakikïnwa. Uka utar mantañäki ukasti, mayanakjam ventananakampi muytatarakïnwa. Taqpachasti sayt'urux pä tunka phisqan metroni, iramarusti tunka payan metro chikatanirakïnwa.

31Uka utar mantañawjapasti anqäx tuqir uñtatänwa. Pilaranakasa palmera alinakar uñtat qillqt'atänwa. Uka punkurusti kimsaqallqu patillpatillanakanjam makhatañänwa.

32Ukatsti manqha tuqinkir uta anqäxaruw inti jalsu tuqinjam irpitu, ukatsti uka mantañ tupt'arakïna, ukasti maynïrinakjam ukch'arakikïnwa.

33Utanakapasa, ukar mantañanakapasa, pilaranakapasa, mayanakjam ukch'arakikïnwa. Uka utar mantañäki ukasti, mayanakjam ventananakampi muytatarakïnwa. Taqpachasti sayt'urux pä tunka phisqan metroni, iramarusti tunka payan metro chikatanirakïnwa.

34Uka utar mantañawjapasti anqäx tuqir uñtatänwa. Pilaranakasa palmera alinakar uñtat qillqt'atänwa. Uka punkurusti kimsaqallqu patillpatillanakanjam makhatañänwa.

35Ukatsti uka jaqix amsta tuqit mantaniñ punkükis uksaruw irparakitu, uka mantañ tupt'arakïna, ukasti mayanakjam ukch'arakikïnwa,

36utanakapasa, ukar mantañanakapasa, pilaranakapasa, mayanakjam ukch'arakikïnwa. Uka utar mantañäki ukasti, mayanakjam ventananakampi muytatarakïnwa. Taqpachasti sayt'urux pä tunka phisqan metroni, iramarusti tunka payan metro chikatanirakïnwa.

37Uka utar mantañawjapasti anqäx tuqir uñtatänwa. Pilaranakasa palmera alinakar uñtat qillqt'atänwa. Uka punkurusti kimsaqallqu patillpatillanakanjam makhatañänwa.

38Mä utaw utjarakïna, uka utax mantaniñ tuqinkki ukampix mayakïnwa. Uka utan sacerdoten yanapirinakapax wilañcha luqtañatak uywanak jariqapxirïna.

39Mantañ tuqinkir utansti pusi mesanakaw utjäna, purapäxarux paya, uka patxan uywanak kharinukupxirïna, jucha luratata, pantjasitata nakt'at waxt'äwi, wilañcha luqtäwi katuyañataki.

40Uta anqansti yaqha pusi mesanakaw utjarakïna, purapäxan pä mesanak ucht'ata,

41taqpachasti kimsaqallqu mesanakaw utjäna, pusix uta manqhana, pusisti uta anqäxana. Uka mesanak patxan wilañcha luqtañ uywanakarux kharinukupxirïna.

42Ukhamarus yaqha pusi mesanakaw utjäna, suma qalat k'uthatänwa ukanakasti sayt'urusa, iramarusa paqallqu tunka phisqan centimetronkamänwa, alayarusti phisqa tunka centimetroniraki, uka mesanakxaruw nakt'ayat luqtäwinak uskupxirïna. Uka utan manqha tuqipansti, mä chiqaw taqi uta pirqpachan muytat utjäna, ukasti iramarux niya suxta centimetronjamänwa, ukxaruw jak'ut luqtañäki uka waxt'ax uskusïna, ukhamaraki wilañchataki uywanak khariñ cuchillonakampi.

44Manqha tuqinkir uta anqäxansti, pä utanakaw utjäna, uka utanakasti q'uchurinakatakïnwa, maynïr utax amsta tuqit mantaniñ punkunkänwa, aynach tuqi uñtata, maynïr utasti aynach tuqit mantañ punkunkarakïnwa, ukasti amsta tuqi uñtata.

45Uka jaqisti sarakituwa: “Aynach tuqi uñtatäki uka utax, Tatitun utapan irnaqapki uka sacerdotenakatakiwa,

46amsta tuqi uñtatäki uka utasti, altaran irnaqapki uka sacerdotenakatakirakiwa. Jupanakasti Sadoc chachan wawanakapawa, levitanakat jupanak sapakiw Tatitun altarapar jak'achasipxaspaxa” sasa.

47Uka jaqisti manqha tuqinkir uta anqäx tupt'arakïna, uka uta anqäxasti, taqi tuqit phisqa tunka metronkamänwa. Altarasti Tatitun utap nayräxankänwa.

48Ukatsti uka jaqix Tatitun utapar mantañawjaruw irpitu, ukar irpasinsti uka utanakan pilaranakap tupt'arakïna, sapa pilarasti thururux pä metro chikatankamänwa. Punkusti iramarux paqallqu metronïnwa, uka punku katxäsir pirqanakasti iramarux mä metro chikatanirakïnwa.

49Ukankir utasti iramarux tunka metronïnwa, manqharusti suxta metronirakïnwa, ukar makhatañatakisti tunka patillpatillanakaw utjäna. Sapa pilarampi chikasti mä jach'a thuru pilaraw utjarakïna.