Ezekiel 10

aymara-1997

1Ukatsti uñjaraktwa: Querubines sat chhiqhaninakan p'iqinakapat alay chiqanxa, mä qunuñäkaspas ukhamaw uñstäna, ukasti zafiro qalat luratjamänwa.

2Tatitusti lino isimpi isthapit jaqirux sarakïnwa: “Chhiqhaninakan kayüxapan utjki, uka carron jach'a muyuri muruq'unak taypir mantam; ukatsti mä juk'a nina sank'anak aptanim, uka chhiqhaninak taypin nakhaski ukata, ukatsti uka nina sank'anak markpachar willitatarakim” sasa. Ukatsti kunjämsa uka jaqix uka taypiru mantäna uk uñjarakta.

3Ukapachasti uka querubines sat chhiqhaninakax Tatitun utapat aynach tuqinkasipkänwa, mä qinayaw manqhankir uta anqäxarux phuqhantäna.

4Tatitun qhapaq kankañapasti uka querubines sat chhiqhaninakan patan unxtäna, ukatsti Tatitun utapar mantañäkis uka punku tuqiruw saräna; qinayasti Tatitun utaparuw phuqhantäna, uta anqäxasti Tatitun qhapaq kankañapampiw phuqhantasirakïna.

5Uka chhiqhaninakan chhiqha jawq'alitapasti uta anqäxkamaw ist'asïna, taqi ch'aman Tatitus parlkaspa ukhamänwa.

6Ukatsti Tatitux lino isimpi isthapita jaqiruw nina sank'a apsuniñapatak mayïna, uka nina sank'asti uka chhiqhaninak jak'ana, uka muyuri muruq'unak taypinkänwa. Jaqisti sarasin uka taypiruw sayt'asïna.

7Uka querubines sat chhiqhap manqhansti mä jaqin amparapäkaspas ukhamaw uñstäna. Maynïr angelasti ampar luqtasin mä juk'a nina sank'a aptäna, ukatsti lino isimpi isthapita jaqin amparapxaruw uchäna, ukat uka jaqix uka nina sank'a apt'asitaw sarxäna.

9Uka chhiqhaninak jak'ansti pusi muyuri muruq'unak uñjta, sapa mayas sapaqat mayni jak'ana. Ukanakasti topacio sat qalanakjamaw walpun k'ajäna.

10Uka pusi muyurinakasti puspachax kipkakïnwa, mayakïkaspas ukhamänwa.

11Uka chhiqhaninakax sartapkän ukkhasti, pusi tuqirpachaw sarapxäna, janiw kutikipstanipkänti, kawksarutix nayrankirix uñtkäna uksaruw sarapxarakïna.

12Uka querubines satan janchinakapasa, jikhaninakapasa, amparanakapasa, chhiqhanakapasa, nayranakampi phuqhantatänwa, ukhamaraki uka muyuri muruq'unakasa.

13Naya kipkaw ist'ta uka muyuri muruq'unakaru “carronaka” sasaraki sutichiri.

14Uka chhiqhaninakasti sapa maynix pusi ajanunkamänwa: Nayrïr ajanux mä urqu vacan ajanupjamänwa; payïr ajanusti mä jaqin ajanupjamänwa; kimsïr ajanusti mä leonan ajanupjamänwa; pusïr ajanusti mä jach'a pakan ajanupjamarakïnwa.

15Uka querubines sat chhiqhaninakasti Quebar jawir thiyan uñjkäyäta uka pachpanakänwa. Ukatsti uka chhiqhaninakax sartawayxapxänwa,

16jupanakax sartapkän ukkhasti, uka muyuri muruq'unakax sartapxarakïnwa; thuqtapkän ukkhasti, uka muyurinakax thuqtapxarakïnwa;

17sayt'apkän ukkhasti, uka muyurinakax sayt'apxarakïnwa, sartapkän ukkhasti, sartapxarakïnwa, uka muyuri muruq'unakasti uka chhiqhaninakan jakäwipat jakäwinïpxatap laykuw ukham lurasïna.

18Tatitun qhapaq kankañapasti Tatitun utapat alayaruw mistüna, ukatsti querubines sat chhiqhaninak patxaruw purïna.

19Uka chhiqhaninakasti, chhiqhanakapampiw thuqtawayapxäna, nayasti kunjämtix thuqtapkän uk uñjarakta, uka muyurinakasti jupanak chikarakiw sartawayäna, ukatsti Tatitun utapan inti jalsu tuqin utjir punku jak'aruw utjnuqtapxäna. Israelan Tatitu Diosapan k'ajkir kankañapasti jupanak patankarakïnwa.

20Uka chhiqhaninakasti Quebar jawir thiyana, Israelan Diosapan manqhäxapan uñjkäyäta uka pachpanakänwa. Ukapachaw nayax kunäkäntix ukanakax uk amuyta.

21Sapa maynis pusi chhiqhani, pusi ajanuni ukhamäpxänwa, uka chhiqhanakap manqhansti jaqi amparäkaspas ukhamaw uñstarakïna.

22Ajanunakapan uñnaqapasti, Quebar jawir thiyan nayax uñjkäyäta uka kipkakïnwa. Sapa mayniw nayrar sarantäna.

← Chapter 9 Chapter 11 →