Esther 9

aymara-1997

1Adar sat tunka payan phaxsita, tunka kimsan uru saraqataruw reyin arsutapax phuqhasiñapäna, judionakan uñisirinakapasti jupanakar tukjañatakix uka uruw suyantasipkäna. Ukampis janiw ukhamäkxänti, jan ukasti, judionakakiw jupanakarux tukjxäna.

2Asuero reyin taqpach suyunakapanxa, judionakax kawkïr markanakantix jakapkäna uka markanakan tantachasipxäna, khitinakatix jupanakar jiwarayañatak amtapkatayna ukanakar nuwantañataki. Ukampis judionakar axsarapxatap laykuxa, janiw khitis jupanakar saykatirix utjkänti.

3Ukhamarus Mardoqueor axsarañat taqpach suyunakankir jilïr apnaqirinakapax judionakaruw yanapapxäna.

4Mardoqueosti reyin utapan mä jach'a jilïrïxänwa, ukhamätapsti taqi suyunakan yatipxäna, jupan ch'amani, munañan kankañapasti, urut ururuw jilxattäna.

5Judionakax espadampkamaw uñisirinakaparux jiwarayas tukjapxäna, q'ala chhaqtayapxarakïna, ukatsti jupanakampix kunjämarutix munapkäna ukhamaruw lurapxäna.

6Susa markansti phisqa patak jaqinak jiwarayapxäna;

7ukxarusti Parsandata, Dalfón, Aspata,

8Porata, Adalías, Aridata,

9Parmasta, Arisai, Aridai, Vaizata sat jaqinakaruw jiwarayapxäna,

10jupanakasti judionakar uñisir Amán chachan tunka yuqapänwa; ukampis janiw yänakap katuntasipkänti.

11Reyisti, qawqha jiwarayatanakatix Susa markan utjkatayna uk yatisinxa,

12ukürpachaw Ester reinarux säna: —Judionakax Susa markan phisqa patak jaqinaka, ukhamarak Amán chachan tunka yuqanakap jiwarayapxi. ¡Yaqha suyunakansti ukhamarak lurapxpacha! Ukhamasti, ¿kunampsa munta? Saskakita, nayax jaysaskakïmawa! —sasa.

13Ukxaruw Ester reinax sarakïna: —Juma, reyitaki walikïchi ukaxa, Susa markankir judionakax kamachirjam qharürux lurapxpan, Amán chachan tunka yuqapan amayanakapax warkkatatäpan —sasa.

14Reyisti ukham lurasiñapatakiw arsüna. Uka arsut kamachi qillqatax Susa markan yatiyasïna, ukatsti Amán chachan tunka yuqapan amayanakap warkkatapxäna.

15Susa markan jakir judionakasti wasitat tantachasipxäna, Adar sat phaxsita, tunka pusin uru saraqataru, ukansti kimsa patak jaqinakampi jiwarayapxäna, ukampis janiw yänakap llamkt'apkänti.

16Yaqha suyunakan jakir judionakasti, pachpa phaxsita, tunka kimsan uru saraqataruw jakañanakap qhispiyasiñataki, ukhamarak uñisirinakapar tukjañatak tantachasipxäna, ukürusti jupanakax paqallq tunka phisqan waranqa jaqinak jiwarayapxäna, ukampis janiw yänakap llamkt'apkänti. Tunka pusin uru saraqatarusti, jupanakax samarxapxänwa, wali kusisitaw manq'äwinakamp uruyapxäna.

18Ukampis Susa markankir judionakax tunka kimsani, tunka pusini uru saraqataruw sayt'asiñatak tantachasipxäna, ukatsti tunka phisqan uru saraqatarux samarxapxänwa, wali kusisiñampi, manq'äwinakampi uruyasa.

19Ukat suyunakan utjir judionakax uruyañ uru ajllisipxäna, Adar phaxsita tunka pusin uru saraqataru, jupanakasti maynit maynikamaw ukürux churäwinak churasipxarakïna.

20Mardoqueox taqi kunatix luraskäna ukanak qillqäna, ukatsti Asuero reyin suyunakapan utjir judionakaruw qillqatanak apayäna, jak'an jakiriru, jayan jakiriru,

21jupasti sapa maran uruyapxañapatakiw mayirakïna, Adar phaxsita, tunka pusini uru saraqatampi, tunka phisqani uru saraqatampi jupanak taypin amtasipxañapataki,

22kunjämtix uka phaxsina, uka urunakan judionakax uñisirinakapat qhispiyat uñjasipkatayna ukanak amtañataki; ukhamaraki, kunjämatix llakisiñampi, t'aqhisiñat ayquñampixa, kusisiñaru, phunchhäwi lurañanakar kipstkatayna uk amtañatakiraki. Ukat uka urunakax kusisisa, jach'a manq'äwinakampi amtatäñapataki, ukatsti maynit maynikam waxt'anak churasisa, jan kunan jaqinakarus khuyapt'ayasaraki.

23Judionakasti, Mardoqueon qillqataparjamaw phuqhapxäna, uka amtasiñ urunakasti jupanak taypin yatitaxänwa.

24Judionakan uñisiripa Amán chachax, suerte jaqtasaw judionakar jiwarayas tukjañatak amtatayna;

25ukampis Ester reinaw reyin ukaru uñstäna, reyisti mä qillqat tuqiw arsüna Amán chachan mutuyatäñapataki, judionakar ukham jan wali lurañ amtatapata. Ukhamat Amán chachampi, yuqanakapampix jaychkatat uñjasipxäna.

26Ukat uka urunakax Purim sutimpi uchatänxa, uka arusti “suerte” sañ muni. Ukhamasti, Mardoqueon qillqataparjamaxa, ukat kunanaktix jupanakax uñjapkatayna, ukhamarak kunjämtix jupanakaru jakañax wakt'katayna ukarjamasti,

27judionakax aka luräwinakxa saranakapjam utt'ayasipxäna, jupanakataki, wawanakapan wawanakapataki, ukhamarak judionakan sarapar kutikipstir jaqinakatakisa; sapa marasa, kunjämatix qillqatan arsutäki ukhamarjam uka pä uruna jan armt'asisa uruyañataki;

28ukatsti wawanakapan wawanakapansa, sapa wila masi taypinakansa, suyunakansa, markanakansa, janipun uka urunakat armasiñataki, uka luräwinakax judionak taypinsa, wawanakap taypinsa janipun chhaqtañapataki.

29Ukat Ester reinampi, Mardoqueo judiompixa, payïr qillqat taqi jilïr kankañampi qillqapxäna, Purim sat uru uruyañxata, kawkïr qillqattix nayraqat qillqapkäna ukaru ch'amañchañataki,

30ukatsti uka qillqatxa, Asuero reyin patak pä tunka paqallqun suyunakapan utjir judionakaruw sumankañ arunakampi apayapxäna.

31Uka qillqatansti, Esterampi, Mardoqueompix arsupxänwa, judionakax taqini, ukhamarak wawanakapasa, kuna urutix Purim sat uru uruyañatak amtatäki uka urunakan uruyatäñapataki, kunjämtix jupanakax lurapxirïki ukhamarjam phuqhapxañapataki. Ukatsti qillqatanxa, kunjämsa ayunonaka, llakinakat jachañanak lurapxañapäki taqi ukanakxat iwxapxarakïna.

32Ester reinaw kunjämtix Purim sat urux uruyañäki ukanak sum qhanañchäna. Taqi ukanakasti qillqantatänwa.

← Chapter 8 Chapter 10 →