Esther 6

aymara-1997

1Uka arumasti reyix janiw ikthapkänti, ukat kawkïr qillqatantix markan taqi jach'a luräwinakapax qillqatäki uka qillqat aptayanïna, jupan nayraqatapan ullarapxañapataki.

2Uka qillqatan jikxatapxäna Mardoqueon aski luratapa, kunjämtix Bigtán, Teres sat reyi uta uñjir jaqinakax Asuero reyir jiwayañ amtapkatayna uk katjatapa.

3Ukat reyix jiskt'äna: —¿Kuna churäwsa, jan ukax, kuna jach'añchäwsa Mardoqueox uka aski luratapat katuqixa? —sasa. Yanapirinakapasti sapxarakïnwa: —Jupax janiw kuns katuqkiti —sasa.

4Ukapachaw Amán chachax reyin jach'a utap anqäxar mantanïna, luraykatayna ukaru Mardoqueon jaychkatatäñapatak reyir mayiri. Reyisti jiskt'änwa: —¿Khitis anqan sarnaqi? —sasa.

5Yanapirinakapasti —Amán chachawa —sasaw yatiyapxäna. Reyisti: —¡Mantayanipxam! —sarakïnwa.

6Amán chachasti mantanïnwa, ukat reyix jupar jiskt'äna: —Kawkïr jaqirutix jach'añchañ nayax munkta ukarux ¿kuns churirista? —sasa. Amán chachasti ukham ist'asin chuymapan säna: “¿Khitirurak reyisti nayat juk'ampi jach'ar aptañ munisti?” sasa.

7Ukat jupax reyir sarakïna: —Uka jaqitakixa,

8juma reyin suma isisiñam uywatanakamar aptayanim, caballomampi, ukhamarak p'iqimar uchasiñ pillumampi.

9Ukatsti juman jilïr yanapirimar khitham uka jaqir suma isimamp isthapiyañapataki, ukat caballomxat marka plazanjam muytaypan, akham arnaqt'asisa: “¡Khitirutix reyix jach'ar aptañ munki ukarux akham uñji!” —sasa.

10Ukat reyix Amán chachar säna: —Ukhamasti jichhpachay kunjämtix siskta ukhamarjam Mardoqueo judío jaqimpix luram. Isimpi, caballompi aptanim, ukatsti jupar thaqtanim. Taqi kuntix siskta ukarjampun jan kun armt'asis phuqham —sasa.

11Amán chachasti isi aptanisin Mardoqueorux isthapiyäna, ukatsti caballxaru kachxatayasin marka plazanjam muytayäna, arnaqasisaw nayräxap sararakïna: “¡Khitirutix reyix jach'añchañ munki ukarux akham uñji!” sasa.

12Uka qhipatsti, Mardoqueox reyin utap punkuruw kuttxäna, Amán chachasti wali llakt'ataw utapar jank'ak kuttxarakïna. Jupasti p'inqasiñatsa ajanup imantasïna.

13Utapar purisinsti Zeres warmipampiru, masinakapampiruw kunatix luraskatayna uk yatiyäna. Jupanakasti sapxänwa: —Uka Mardoqueotix judío jaqïchixa, janiw atipjkasmati, jan ukasti, jumakiw q'alpun aynacht'asmaxa —sasa.

14Jupanakax janïraw parlañ sum tukuyapkänti, ukhamaruw reyin uywatanakapax Ester reinan wakichayat manq'äwir Amán chachar ukspach irpañatak purinipxäna.

← Chapter 5 Chapter 7 →