Esther 5

aymara-1997

1Kimsa urutsti Esterax reina kankañ isipamp isthapt'ataw reyin utapar mantäna. Ukatsti, reyin punku uñkatasi qunuñapan qunt'atäkäna uka nayraqataruw sayt'asïna.

2Reyisti, Ester reinar uñjasax kusisïnwa, amparapar katt'atäkäna uka quri thujrup jupa tuqir aytarakïna. Ester reinasti jak'achasisin quri thujrun k'achip llamkt'äna,

3reyisti juparux akham jiskt'arakïna: —Ester, ¿kunas kamächtam? ¿Kuns munta? ¡Jach'a markaxan uraqip chikatpach mayitäta uksa nayax churaskakïmawa! —sasa. Ester reinasti ukxaruw sarakïna:

4—Jach'a munañan rey, jichhürux nayax jumar jach'añchañatak mä manq'äwi wakichta. Chuymamar purkirïchi ukaxa, jutamaya, jumampi chiksti Amán chachar irpanirakim —sasa. Ukat reyix uywatanakapar sarakïna:

5—Jichhpach Amán chachar thaqtapxam, Ester reinan mayitapasti jaysatäpan —sasa. Ukhamaw reyimpi, Amán chachampix reinan wakicht'at manq'äwiparux sarapxäna.

6Uka manq'äwinkasasti, reyix Esterar akham säna: —Kuntix munkta uk mayita, jach'a markaxan uraqip chikatpach mayitäta uksa nayax churaskakïmawa —sasa.

7Ester reinasti ukxaruw sarakïna: —Mayakiw mayisiñaxaxa, ukakirak mayt'asïma:

8Juma reyitix nayar munaschista, nayan mayitaxsa ist'añ munarakchista ukaxa, qharürux Amán chachamp chikay jutam, jumar jach'añchañatak wakichat yaqha manq'äwiru. Ukan kuntix jumax maykista uk arsü —sasa.

9Amán chachax k'uchikiw uka manq'äwit mistuwayxäna; ukampis Mardoqueoru reyin utap punkun qunt'atäskir uñjasax walpun phiñasïna, Mardoqueon jupatak jan sartatapata, janirak unxtatapatsa.

10Ukampis jupar uñiskchïna ukasa, janiw kamskänsa, utapar purisinsti, masinakapampiru, Zeres sat warmipampir jawsiriw khithäna.

11Amán chachasti jupanakarux qamir kankañapat parläna, walja wawanïtapata, reyix taqinit sipan jupar jach'a jilïrit utt'ayatapata, ukhamarak markanak apnaqañatak munañ kankañ churkatayna ukxata.

12Ukxarusti saskakïnwa: —Ukhamarusa, Ester reinax naya saparukiw jawsayitu jichhür reyitaki manq'äwi wakichki ukaruxa; qharürusti yaqha jach'a manq'äwi reyitakix wakicharakini, ukarusti naya saparukiw jawsayarakitu.

13Ukampis uka Mardoqueo judío jaqir reyin utap punkun qunt'atäskir uñjasaxa, kusisiñaxas käwkst'iwa —sasa.

14Ukatsti warmipampi, masinakapampix akham amuyt'ayapxäna: —Jaychkatayañ lurayam, amstarux pä tunk payan metroni, ukatsti qharür willjtax reyir mayim, Mardoqueor ukan jaychkatayañapataki. Ukatxa jan kuna llakinikiw manq'äwirux reyimp chik saräta —sasa. Uka amuyux Amán chachar wal kusisiyäna, ukat jaychkatayañ wakichayäna.

← Chapter 4 Chapter 6 →