2 Kings 25

aymara-1997

1Sedequías reyix llätunka mara marka apnaqkäna, tunkïri phaxsita tunka uru saraqataruw, Babiloniankir Nabucodonosor reyix taqpach ejercitopamp sarantasin Jerusalén markar muyuntäna. Ukatsti marka uñkatasiruw utjnuqtäna, marka muytarusti makhatañanak luräna, markar katuntañataki.

2Jerusalén markasti Sedequías reyix tunka mayan mara marka apnaqkän ukkhakamaw muyuntat uñjasïna.

3Uka pachpa marana, pusïr phaxsina, llätunka uru saraqataruw manq'at t'aqhisiñax Jerusalén markan jilxattäna, jaqinakanxa janiw kuna manq'añapas utjkxänti.

4Ukat Sedequías reyix soldadonakapampi markar muyuntki uka pirqa p'iysupxäna. Jupanakasti uka chiqaw arumpacha jaltxapxäna, pä pirqa taypin utjkäna uka mantañ chiqanjama, reyin panqar uyup jak'a sarakipasa, ukatsti Jordán qhirwar sarir thakhinjam jalapxäna. Ukchañkamasti, Babiloniankir soldadonakax markar muyuntatäsipkänwa.

5Ukampis Babiloniankir soldadonakax Sedequías reyirux arktapxänwa, ukatsti juparux Jericó pampan jikxatapxäna. Sedequiasan ejercitopasti taqpachaniw jupar apanukusin jaltxapxäna.

6Babilonio soldadonakasti Sedequías reyir katuntasin, Babiloniankir reyin nayraqataparuw apapxäna, jupasti Hamat uraqinkir Riblá chiqankaskänwa. Uka chiqan Nabucodonosor reyix, Sedequías reyitak juchañchäwip arsüna,

7ukatsti jupan nayraqatapan wawanakaparux kharinukuyäna. Sedequiasarusti nayranakap irsuyäna, cadenanakampi ñach'antataw Babiloniar apxaruyäna.

8Babiloniankir Nabucodonosor reyin marka apnaqatapax, tunka llätunkan maränwa, phisqïr phaxsin paqallq uru saraqatarusti, uka reyin ejercitopan Nebuzaradán sat capitanapax Jerusalenaruw purinïna

9jupasti ninampiw Tatitun utap nakhantayäna, ukhamaraki reyin utapampi, markan utjir utanakampi, juk'ampisa wali aytat jaqinakan taqpach utanakapampi,

10ukatsti jupamp chika jutkatayna uka babilonio ejercitox, Jerusalén markar muyuntki uka pirqanak tinkurayäna.

11Ukatsti Nebuzaradán capitanax, khitinakatix Jerusalén markan qhiparkatayna, ukhamaraki Babiloniankir reyir jaqkattapkatayna ukanakaru, amparampi suma yänak lurir jaqinakampiruw Babiloniar katuntat apasxäna.

12Ukampis pisin jakasiri jaqinakat mä qawqhanirukiw jaytanukuwayäna, uva yapuchañapataki, yapunak lurañapataki.

13Babilonio jaqinakasti Tatitun utapan utjkatayna uka broncet lurat yänakxa, jisk'a jisk'a tukjapxäna: sayirinaka, katxäsirinaka, uma uchañ jach'a lamana, ukatsti broncenak taqpach Babiloniar apasxapxäna.

14Ukhamaraki qhilla uchañanaka, k'istuñanaka, nina jawriñanaka, jach'a wisllanaka, kunatix Tatitun utapan luqtäwitaki wakiski taqi uka bronce yänak apasxapxäna.

15Ukhamarusa, Nebuzaradán capitanax qurita, qullqit lurat taqi yänaka, incienso nakhayañanaka, jach'a qirunaka apasirakïna.

16Salomón reyix Tatitun utapatak luraykatayna uka broncet lurat pä sayirinakana, uma uchañ jach'a lamanana, takxäsirinakapan tupupax janiw yatiñjamäkänti.

17Uka pä sayirinakax kipkakïnwa, sapa mayasti alayarux kimsaqallqu metroni, uka patäxapansti broncet lurat capitel sat k'achachañaw utjäna, ukasti alayarux pä metronïnwa; ukan muytaparusti broncet lurat mä rejillanïnwa, granada achunakampi k'achachata.

18Ukhamarusa, Nebuzaradán capitanax Seraías jilïr sacerdoteruw katuntäna, ukhamarak Sofonías ukxankir sacerdoteru, Tatitun utap uñjir kimsa chachampiru.

19Markankir jaqinakatsti, soldado tamanak apnaqir jilïriru, reyir luqtiri phisqa jaqinakaparu, ejercitotak chachanak jawsthapiyir oficialaru, aytat jaqinakat suxta tunkaniruw katuntäna.

20Jupanakar katuntasinsti, Nebuzaradán capitanax, taqpachaniruw Babiloniankir reyin nayraqatapar apäna; jupasti Hamat uraqina, Riblá chiqankaskänwa. Ukan Babiloniankir reyix jupanakar jiwarayäna. Judá markankir jaqinakax ukhamaw uraqipat jayar apanukut uñjasipxäna.

22Babiloniankir Nabucodonosor reyix, Ahicam chachan Guedalías yuqaparuw apnaqirit utt'ayäna, Safán chachan allchhiparu, kawkïr jaqinaktix jupax Judá uraqin jaytawaykatayna ukanakar apnaqañapataki.

23Ukatsti kunapachatix Judá ejercitonkir jilïrinakasa, jaqinakapas uk yatipxäna ukkhaxa, jupanakax Guedalías chachampi parliriw Mispá chiqar sarapxäna. Jupanak taypinsti aka chachanakänwa: Netanías chachan Ismael yuqapa; Caréah chachan Johanán yuqapa; Netofá chiqankir Tanhúmet chachan Serahías yuqapa; Maacá markankir mä chachan Jaazanías yuqapa.

24Guedalías chachasti jupanakaru, jaqinakapampirux juramentompiw arsüna, akham sasa: “Babilonio oficialanakar jan axsarapxamti. Jumanakatix uka uraqin qhiparapxäta, ukatsti Babiloniankir reyir luqtapxäta ukkhaxa, jumanakatakix taqi kunas walikïskaniwa” sasa.

25Ukampis kunapachatix Guedaliasax paqallqu phaxsi marka apnaqañ phuqkän ukapachaxa, Judá markankir reyinakat saraqir Ismael chachaw tunka jaqinakamp chikt'at Mispá chiqar purinïna, ukatsti jupax Guedalías chacharux jiwayänwa, jupar yanapiri judionakarusa, babilonio jaqinakarusa jiwayarakïna.

26Ukatsti jaqinakax babilonio jaqinakar axsarapxatap laykusti jisk'asa jach'asa, ejerciton jilïrinakapasa taqiniw Egiptor jaltxapxäna.

27Kunapachatix Judá markan Joaquín reyipax Babilonia markan kimsa tunka paqallqun mara, tunka payan phaxsi, pä tunka paqallqun uru apanukuta jakaskän ukkhaw, Evil-merodac sat reyix, Babilonia markan reyïña qalltäna; jupasti Joaquín chachat khuyapt'ayasisin carcelat apsxäna,

28juparusti sum uñjäna, yäqarakïna, jupamp chika Babilonia markankapkän uka reyinakat sipana.

29Ukhamat Joaquín chachax carcelan uchasiñ isipa apsusxäna, ukat uksar jakäwipansti reyimp chikaw manq'asïna.

30Ukhamarus Joaquín chachan jakañapkamasti, Babiloniankir reyit sapüruw manq'asiñapatak qullqi katuqäna.