2 Kings 24

aymara-1997

1Joacín reyix marka apnaqkän ukkhaw, Babiloniankir Nabucodonosor reyix Judá uraqir katuntir mantantäna, ukatsti Joacín reyix kimsa maraw uka reyin munañaparjam sarnaqäna. Ukatxa sum amuyt'asisin, janiw uka reyirux jaysañ munkxänti, jan ukasti jupatakiw sayt'asxäna.

2Ukat Tatitux Joacín reyitaki caldeo, sirio, moabita, amonita lunthata tamanak apayanïna Judá markar mantantasin tukjapxañapataki, kunjämtix Tatitux luqtir profetanakap tuqi yatiykatayna ukhamarjama.

3Tatitusti Judá uraqirux Manasés reyin taqi juchanakap laykuw mutuyäna, janiw markarux pampachañ munkänti, Manasés reyin jan juchan walja jaqinakaru Jerusalén markan jiwarayatap layku.

5Joacín reyin ukat ukxaru sarnaqäwipasa, taqi luratanakapasa, Judá markankir reyinakan luräwinakapa qillqatankiwa.

6Joacín reyix jiwxäna ukkhasti, Joaquín yuqapaw jupa lantix reyïxäna.

7Ukat uksarusti Egiptonkir reyix janiw mayampsa uraqipat mistunkxänti, Babiloniankir reyiw Egipto reyin taqpach uraqinakap katuntasxatayna, Egipton jisk'a jawirapat qalltasina, Éufrates jawirkama.

8Joaquín waynax tunka kimsaqallqun maranïkän ukkhaw, Judá marka apnaqañ qalltäna, jupasti kimsa phaxsiw Jerusalenan marka apnaqäna. Taykapax Nehustá sutinïnwa, jupasti Elnatán chachan phuchhapänwa, Jerusalén markankirirakïnwa.

9Joaquín reyin luratanakapax Tatit nayraqatan jan walinakänwa, kamisatix awkipax ñanqha lurkatayna uka kipkarak jupax luräna.

10Khä urunakansti Babiloniankir Nabucodonosor reyin ejercitopax sarasin Jerusalén markar katuntañatakiw muyuntäna.

11Kunapachatix soldadonakax markar nuwantasipkän ukkhaw Nabucodonosor reyix purinïna.

12Ukat Judá marka apnaqir Joaquín reyix, taykapampi, jilïrinakapampi, yanapirinakapampi, jupan suma uñt'at jaqinakampi Babiloniankir reyiru katuyasxapxäna, uka reyisti jupanakarux katuntayxänwa. Ukasti kunapachatix Nabucodonosor reyix kimsaqallqu mara Babilonia marka apnaqkän ukapachaw lurasïna.

13Ukatsti Nabucodonosor reyix Tatitun utapata, ukhamaraki reyi utat taqpach imat yänak apsuwayäna, ukatsti, kunjämtix Tatitux yatiykatayna ukhamarjamaw qurit lurat taqi yänak p'akiräna, kuna yänaktix Israelan Salomón reyipax Tatitun utapatak luraykatayna ukanaka.

14Ukatsti Nabucodonosor reyix, Jerusalenankir taqpach jaqinakaruw katuntat apasxäna, taqpach jilïrinakaru, suma nuwasir soldadonakaru, amparampi suma yänak lurir jaqinakaru, herreronakaru, tunka waranqanir phuqhachañkama. Janiw khitis Judá uraqin qhiparkxänti, jan ukasti wali pisin jakasir jaqinakakiw Jerusalenan qhiparxäna.

15Nabucodonosor reyisti Joaquín reyiru, taykaparu, warminakaparu, jilïrinakaparu, wali aytat jaqinakaruw katuntat apasxarakïna. Jerusalenat katuntat jaqinak Babilonia markaruw apasxäna.

16Babiloniankiri reyix wali aytat jaqinak katuntat apasxäna ukanakat taqpachanix, paqallq waranqanïnwa; ukatsti amparampi suma yänak lurir jaqinakata, herreronakatsa, suma nuwasiri wali ch'amani chachanakatsa waranqani apasxarakïna.

17Ukatsti Babiloniankir reyix Matanías chacharuw Joaquín sobrinop lantix, reyit utt'ayäna, sutipsa yaqha sutimpiw uchäna, Sedequías sasa.

18Sedequías chachax pä tunka mayan maranïkän ukkhaw marka apnaqañ qalltäna, jupasti Jerusalenan tunka mayan maraw marka apnaqäna. Taykapax Hamutal sutinïnwa, jupasti Jeremías chachan phuchhapänwa, Libná markankirirakïnwa.

19Sedequiasan luratanakapax Tatitun nayraqatapan jan walinakänwa, kunjämatix Joacín chachax jan walinak lurkatayna ukhama.

20Ukat Tatitux Jerusalén markampitaki, Judá markampitakix q'apisïna; ukatsti jupan nayraqatapat jupanakarux jaqunuküna.

← Chapter 23 Chapter 25 →