2 Chronicles 5

aymara-1997

1Ukatsti kunapachatix Tatitutak uta lurañax arsutarjam tukuyatäxän ukkhaxa, Salomonax David awkipan Tatitur luqtat qurita, qullqita lurat yänak aptayanïna, ukanaksti Diosan utapan imatäñapatakiw uchayxäna.

2Ukatsti Salomonax Jerusalén markan Israelankir jilïri jaqinakaru, ayllunakan jilïrinakaparu, israelita wila masi tamanakan jilïrinakaparuw tantacht'äna, Tatitun arust'äwi arcap Sión sata Davidan Markapat apxañataki.

3Salomón reyimpi taqi israelitanakampisti marata paqallqu phaxsi saraqataruw jach'a phunchhäwi urun tantachasipxäna.

4Israelankir taqi jilïri jaqinakaw purinipxäna, levitanakasti Tatitumpi arust'äwiru mantat arca apxarupxäna,

5ukatsti Diosampi Jikisiñ Carpampi, ukan utjkäna uka qullan yänakamppach apapxäna.

6Salomón reyimpi, tantachasipkatayna taqi uka israelit jaqinakampix arca nayraqatankapxänwa, jupanakasti jan jakt'kay ovejanaka, urqu vacanak wilañcha luqtasipkäna.

7Ukatsti sacerdotenakax Tatitun arust'äwi arcap Tatitun utap manqhäxaruw apapxäna, Qullanansa Qullanapa chiqakama, querubines chhiqhanakap manqharu,

8uka querubines satan chhiqhanakapasti arca patxakamaw purïna, arcasa, katxäsir lawanakapas chhiqhanakampi imxatatänwa.

9Ukampis uka katxäsir lawanakan jach'ätanakap laykux Qullana chiqat uñstaskakïnwa, Qullanansa Qullanapa nayräxatsa, anqäxatsa janis uñstkchïna ukasa; ukhamaw jichhürkamax qhiparawayi.

10Uka arcansti, Moisesax Horeb chiqan qalat lurat pä tablanak uskkäna ukakiw utjäna, kawkïr tablanakarutix Tatitux israelitanakampi arust'äwiru mantatapa lurkäna kunapachatix Egiptot mistunipkän ukapacha.

11Sacerdotenakax Qullana chiqat mistunipxänwa. Ukankapkän uka sacerdotenakasti taqiniw q'umachasipxäna, jupanakaru ukankañax jan wakt'kchïna ukasa.

12Q'uchuri levitanakasa, Asaf, Hemán, Jedutún jupanakax wawanakapamppacha, maynïr wila masinakapamppachax, lino isimpi isthapitaw altarat inti jalsu tuqin sayt'ata ukankapxäna. Jupanakanxa platillonaka, salterionaka, arpanakaw utjäna. Jupanakamp chikasti trompetanak phusiri pataka pä tunkani sacerdotenakaw utjäna.

13Ukatsti taqpachaniw mayar tukutaki trompetanak phust'apxäna, ukhamaraki mayacht'asisa q'uchupxäna, Tatitur jach'añchañataki, yuspagarañataki, trompetanaka, platillonaka, yaqha toct'añ yänakamp toct'asa, akham sasaw q'uchupxarakïna: “Tatitur jach'añchapxam, jupax askiwa, munasiñapasti wiñayatakiwa” sasa. Tatitun utapasti ukapachax mä qinayampiw phuqhantasïna,

14uka qinayan phuqhantatap laykusti, sacerdotenakax janiw Tatitur yupaychañatak qhiparirjamäpkänti, Tatitun jach'a kankañapan Tatitun utapar phuqhantatap layku.

← Chapter 4 Chapter 6 →