2 Chronicles 4

aymara-1997

1Salomonax broncet mä altar lurayarakïna, ukasti sayt'umpiru, iramampirux llätunka metronïnwa, amstarux pusi metro chikatanirakïnwa.

2Ukatsti uma uchañatakix bronceta mä jach'a lamana lurayäna. Ukasti muruq'ünwa, mä thiyata mä thiyakamax pusi metro chikatanïnwa. Amstarux pä metro pä tunka phisqani centimetronïnwa, muytarusti tunka kimsani metro chikatanirakïnwa.

3Uka uma uchañan aynach tuqipan muytaparux pä siqi urqu vacanakar uñtat lurataw utjäna, sapa pusi tunka phisqan centimetronakanxa tunka urqu vacanakar uñtataw utjäna, ukanakax uma uchañampix mayak luratänwa.

4Uka uma uchañ luratäki ukax broncet lurat tunka payan urqu vacanakxaru uchatänwa, uka urqu vacanak luratasti kimsax amsta tuqiru, kimsasti aynach tuqiru, kimsax inti jalanta tuqiru, kimsasti inti jalsu tuqir uñtatkamänwa. Qhipäx kayunakapax manqhäx tuqinkänwa, uka uma uchañax urqu vacanak luratxaru apxatatänwa.

5Uka uma uchañan pirqapax lankhurux kimsaqallqu centimetronïnwa; thiyanakapasti lirio panqarar uñtasitänwa, ukarusti umax suxta tunka suxtani waranqa litronakaw mantäna.

6Ukxarusti, jariñatakix broncet tunka lamananak lurayarakïna, ukatsti kupïxarux phisqa uchayäna, ch'iqäxarusti phisqarak uchayäna. Uka uma uchañanakansti kunatix nakt'at luqtäwinakan apnaqaskän ukanak jaripxirïna; ukampis jach'a uma uchañäki ukasti sacerdotenakan jarisipxañapatakïnwa.

7Ukxarusti kunjämtix lurañapäkän ukhamarux tunka candeleronak qurit lurayäna, ukanaksti Tatitun utaparuw uchayäna, kupïxarux phisqa, ch'iqäxarusti phisqaraki.

8Ukhamarus tunka mesanak lurayäna, ukanaksti Tatitun utaparuw uchayäna, kupïxarux phisqa, ch'iqäxarusti phisqaraki. Ukatsti pataka jach'a qirunak qurit lurayarakïna.

9Ukxarux sacerdotenakan uta anqapampi, jach'a uta anqampi, punkunakapamppach lurayäna, ukanakarusti broncempiw lip'ikipayäna.

10Uka jach'a uma uchañäki uksti Tatitun utapan kupïxaparuw uchayäna, aynacha tuqi inti jalanta tuqiru.

11Hiram chachasti ukxarux phukhunaka, lampanaka, jach'a qirunak luräna, ukhamawa Salomonatakix lurañanak Tatitun utapan tukt'ayäna.

12Uka luratanakax akanakänwa: pä piläranaka, piläranak patxankki uka muruq'u k'achachañanaka, uka k'achachañanakap imt'añ rejillanaka,

13paypach rejillatakix pusi patak granada achunaka, sapa rejillatakix pä siqi, ukampi uka pä piläranak patxankki uka paypach muruq'u k'achachañanakar imxatañataki;

14tunka katxäsirinakapa, ukanak patxaru uma uchañanaka,

15uma uchañ jach'a lamana, aynach tuqiru uchata tunka payan urqu vacanaka,

16ukhamarak phukhunakampi, lampanakampi, tenedoranakampi. Kuna yänaktix Hiram chachax Salomón reyin mayitaparjama, Tatitun utapatak lurkäna ukanakax suma broncet luratänwa.

17Jupasti taqi ukanakxa k'ink'u laq'at lurat moldenakaruw phichhsüna, Jordán uraqina, Sucot, Saretán chiqanak taypina.

18Salomonax taqi uka yänak broncet lurayäna, ukatsti qawqha broncetix mantkäna ukat janiw llakt'askänti.

19Salomonasti Diosan utapan utjkäna ukat ukxar taqi yänak lurayarakïna: qurit lurat altara, Tatitur luqtañ t'ant'anak uchañ mesanaka,

20Qullanansa Qullanapa uñkatasin utjki uka suma qurit lurat candeleronaka, nakhayañanakapamppacha, kunjämatix satäkän ukhamar naktayañataki;

21panqaranakar uñtata luratanaka, nakhayañ lamparanaka, tenazanaka, ukanakasti suma quritkamakïnwa;

22nakhat pabilonak khuchhuqañanaka, jach'a qirunaka, wisllanaka, incienso q'aphichañanaka, taqi ukanakax suma qurit luratkamakïnwa. Ukhamarak Tatitun utapar mantañanakasa, Qullanansa Qullanapa chiqar mantañ punkunakapasa, Tatitun utapar mantañ punkunakapas qurit luratkamakïnwa.

← Chapter 3 Chapter 5 →