2 Chronicles 35

aymara-1997

1Josías reyix Jerusalén markan Tatitur jach'añchasaw Pascua uru uruyäna: mara qallta phaxsita, tunka pusini uru saraqataruw, uruyañataki mä maran urqu oveja wilañcha luqtäna.

2Sacerdotenakarux lurañanakapan utt'ayäna, jupanakarusti Tatitun utapan luräwinakap phuqhapxañapatakiw ch'amañchäna.

3Levitanakarusti khitinakatix taqpach Israelar yatichirïpkäna, Tatitur luqtatäpkarakïna ukanakarux sänwa: “Qullan arcxa, Israelan reyipa, Davidan Salomón yuqapax Tatitun utap lurayki ukar uchapxam. Janiw kallachinakamxar apnaqkxapxätati. Jichhasti jumanakax Tatit Diosamatak irnaqapxam, Tatitun Israel markapar luqtapxarakim.

4Jumanakax wila masi tamatkam lurañanakam wakt'ayapxam, kunjämatix Israelan reyipa Davidampi, Salomón yuqapampi qillqata tuqi jaytkäna ukhamarjama.

5Qullan chiqawjansti levitanakat wila masi tamatkam qhiparapxam, mayni israelita jilanakaman wila masinakap lanti.

6Pascua uruyañataki mä maran urqu oveja jiwayasin luqtapxam, q'umachasipxam, ukatsti kunatix wakiski uk wakichapxam, ukhamat jilanakaman kuntix Tatitux Moisés tuqi iwxawayki uk phuqhapxañapataki” sasa.

7Josías reyisti jupan uywapatxa, ukankir jaqinakaruw Pascua uruyañatakix churäna: mä maran urqu ovejanaka, cabritonaka, taqpachax kimsa tunka waranqänwa, ukxarux kimsa waranqa vaca qallunakamp churäna.

8Reyin yanapirinakapax chuymapatjam churäwinaka markampiru, sacerdotenakampiru, levitanakampirux churapxarakïna. Ukhamarus Diosan utap uñjirinaka Hilquías, Zacarías, Jehiel ukanakax, Pascua uruyañatakix sacerdotenakar pä waranqa suxta patakani uywanak churapxäna, ukhamarak kimsa pataka vaca qallunakampi;

9ukatsti Conanías chachampi, Semaías, Natanael masinakapampi, ukhamarak levitanakan jilïrinakapa Hasabías, Jehiel, Jozabad jupanakax Pascua amtaña uruyañatakix, phisqa waranqa uywanak churapxäna, phisqa pataka vaca qallunakampi.

10Uruyañataki wakichatäxatapatsti, sacerdotenakax luräwinakapan jikxatasxapxäna, levitanakasti reyin arsutaparjamaw lurañanakap phuqhañatak wakichasipxäna.

11Ukatsti Pascua uruyañatakïki uka uywanak jiwayapxäna, levitanakan uywanak kharirapxañapkamasti, sacerdotenakax levitanakan amparapat wila katuqasin, ukampiw altarar ch'allakipapxäna.

12Ukatsti nakhantayatäxañapatakix lik'inak apaqapxäna, qawqhanitix markan wila masi tamanakax utjkäna ukhamarjam Tatitur luqtapxañapataki, Moisesan qillqatapan arsutäki ukhamarjama; uka pachparak vaca qallunakampix lurapxäna.

13Ukxarusti Pascua uruyañatakix uywanakan aychap kankantapxäna, kunjämatix qillqatäki ukhamaru; ukxar qullan waxt'äwinaksti phukhunakaru, calderonakaru, sartenanakaruw qhatiyapxäna, ukat ukanak mäkiw taqi jaqinakar lakirapxäna.

14Ukxarusti levitanakax kunatix jupanakampiru, sacerdotenakampir wakt'kän ukanak wakt'ayapxäna, Aarón chachat saraqir sacerdotenakax arumkamaw ukankapxäna, nakt'at waxt'äwinaka, lik'inak luqtasa. Ukat levitanakax kunatix jupanakarusa, Aarón chachat saraqir sacerdotenakarusa wakt'käna ukanak wakichapxäna.

15Asaf chachat saraqir q'uchurinakasti, lurañanakapan jikxatasipxarakïna, David, Asaf, Hemán, ukhamarak reyin profetapa Jedutún chachanakan arsutaparjama. Punku uñjirinakasti sapa mayniw punkunakapan jikxatasipxäna; janiw jupanakat khitisa lurañanakap apanukupkänti, jupanakatakix levita masinakapaw, kunatix jupanakar luqtäwita wakt'ki ukanakxa wakichasipkarakïna.

16Ukhamaw khä urun Tatitur taqi luqtañanakax wakt'ayasïna, Pascua uruyañataki, ukhamarak Tatitun altarapan nakt'at wilañchanak luqtañataki, Josías reyin arsutaparjama.

17Israelitanakax, paqallq uruwa Pascua urumpi, jan levaduran t'ant'a manq'aña urumpi uruyapxäna

18Janipuniw kunapachasa Israel markanxa, Samuel profetan urunakapat uksarux, Pascua uruyañax ukham luraskänti; janirakiw Israelan reyinakapat maynisa, Pascua phunchhäwi ukham uruyapkänti, kunjämtix Josías reyix sacerdotenakampi, levitanakampi, Judá, Israelankir jaqinakampi uruykäna ukhamxa.

19Uka Pascua uruyäwisti, kunapachatix Josías reyix tunka kimsaqallquni mara marka apnaqkäna ukkhaw lurasïna.

20Josías reyix Tatitun utap askichañ tukuyxäna uka jaya qhipatsti, Egiptonkir Necao sat reyipaw Éufrates jawir tuqir jutantäna, Carquemis chiqan nuwasiñataki. Josías reyisti jupar jikxatiriw saräna;

21ukampis Necao reyix khithanak khithäna, Josías reyir saniñapataki: “Judá uraqin reyipa, janiw nayax jumamp nuwasir jutkti, jan ukasti nayax nuwasiñan jikxataskta uka markampi nuwasiriw jutaskta. Diosax mäki lurañaxatakiw mayitu; ukhamasti juman askimataki, Diosan amtatanakapar jan jumax jark'amti, ukhamat jupax jan tukjkätamti” sasa.

22Josías reyisti janiw qhipar kuttkänti, jan ukasti nuwasiñ munapunïnwa, janiw jupax amuyaskänti Diosan Necao reyi tuqi jupar parlaskatapa. Ukhamasti jupax, Meguido qhirwan, nuwasïwiruw mantäna,

23mich'inak antutt'irinakasti Josías reyiruw wakt'ayapxäna. Ukapachaw reyix jilïr yanapirinakapar säna: “¡Akat apst'xapxita, sinti usuchjatätwa!” sasa.

24Jupan jilïr yanapirinakapasti nuwasiñ carrot apsxapxäna, ukatsti jupan yaqha carropar apakipasaw Jerusalenar apxapxäna, ukan jiwxarakïna. Juparusti nayra awkinakapan imäwiparuw imt'xapxäna. Ukatsti taqpacha Judá markampi, Jerusalén markankirinakampiw Josías reyin jiwxatapat jachapxäna.

25Jeremiasasti Josiasat amtasiñatak mä llakisiñ q'uchu qillqäna. Jichhürkamaw taqi q'uchurinakax Josías reyin imäwi q'uchunakapat amtasisipki. Aka q'uchunaksti Israel markan q'uchusipkakiwa, ukanakan arunakapax “Jachäwinaka” sat qillqatankiwa.

26Josías reyin ukat ukxar sarnaqäwipasa, Tatitun kamachi arunakapan qillqatäki ukarjam khuyapayasiñampi askinak luratapasa,

27luräwinakapasa qalltata tukuykamax Israel, Judá reyinakan qillqatapankiwa.

← Chapter 34 Chapter 36 →