2 Chronicles 32

aymara-1997

1Taqi ukanak qhipatxa, Ezequiasan akham suma sarañata uñacht'äwipatsti, Asiriankir Senaquerib reyiw purinïna, Judá uraqir ch'amampi mantantasinxa, katuntasiñ amtampiw nuwasiñatak lurat markanakarux muyuntäna.

2Ezequiasasti, Senaquerib reyin Jerusalenar katuntir purinitap uñjasinxa,

3jupax markankir aytat jaqinakaru, soldadonakapan jilïrinakaparuw tantachäna, jupanakarusti markat anqäxankki uka uma jalsunak llupantañatakiw amtayäna, jupanakasti ukarux jaysapxänwa.

4Ukatsti walja jaqinakaw tantacht'asipxäna, jupanakax taqi uma jalsunak llupantapxäna, uraq manqhanjam jalir uma larqsa llupantapxarakïnwa, ukhamat Asiriankir reyinakax purinipkaspa ukkhax, umanak jan jikxatapxañapataki.

5Ezequiasasti ch'amañchasïnwa, ukatsti markan tukjata pirqapa askichayäna, uka pirqa patxarusti pukaranak lurayäna, ukatxa anqäxan yaqha pirqampi lurayarakïna. Ukxarusti Davidan Markap thiyankki uka q'awanaksa laq'ampiw phuqhantayäna, ukatsti lanzanaka, jark'aqasiñanak waljpun lurayäna.

6Ukatsti ejerciton jilïrinakap utt'ayäna, jupanakarux marka mantañan chiqaruw tantacht'äna, ukatsti aka arunakampiw jupanakar ch'amañcht'äna:

7“¡Ch'amañchasipxam, jan axsarapxamti! Asiriankir reyin nayraqatapan jan axsarapxamti, janirak mayjt'asipxamsa, jupamp chik jutki uka ejercitox jan jumanakar axsaraypati, jiwasanakax jupanakat sipan juk'amp ch'amanïtanwa.

8Asiriankir reyix jaqinakan ch'amaparukiw katuyasi, ukampis Tatitu Diosasaw jiwasampïski, nuwasïwinakasan jiwasar yanapt'añapataki” sasa. Ezequías reyin arunakap ist'asinsti, jaqinakax wal ch'amañchasipxäna.

9Ukchañkamasti Asiriankir Senaquerib reyix, Laquis markaruw taqpach ejercitopampi katuntaskäna, jupasti Jerusalén markar mä qawqha jilïrinakaparuw khithäna, Judá markankir Ezequías reyimpiru, Jerusalén markankapkän uka jaqinakampir akham yatiyapxañapataki:

10“Asiriankir Senaquerib reyix akham sapxtam: ‘¿Kunatsa jumanakax Jerusalén markan muyuntatäkasas uka pachpan qhiparañ jan axsarapktaxa?

11Ezequiasatix sapxstam: Tatit Diosasaw jupan amparapat qhispiyistani, sasaxa, jumanakarux k'arintasipktamwa, ukampix manq'ata, umata jiwarañatakiw nukt'asipktam.

12¿Janit Ezequiasasti qullu patanakan uka Diosar yupaychañ altaranak chhaqtayki, ukatxa Judá, Jerusalén uraqinkir jaqinakarusa mä sapa altaran Diosar yupaychapxañapataki, incienso luqtapxañapatak siskänsti?

13¿Janit jumanakax yatipkta kuntix nayasa, nayra awkinakaxasa aka uraqinkir yaqha markanakar lurapkta ukxa? ¿Uka markanakan diosanakapasti ch'amanïpxänti nayan amparaxat qhispiyañatakisti?

14¿Kawkïr diosaraki uka markanakan diosanakap taypita, nayra awkinakaxan t'unjat markanakata, amparaxat markap qhispiyisti? ¿Kunatsa amuyapxta Diosaman qhispiyatäñxa?

15Ukhamasti, Ezequiasampix jan sallqjayasipxamti; juparux jan jaysapxamti, janiw markanakan khiti diosapas markaparux amparaxan ch'amapata, nayra awkinakaxan ch'amapat qhispiykiti, ukatsa juk'ampiw jumanakan Diosamax ch'amaxat jan qhispiyapkiristamti’ ” sasa.

16Asiriankir reyin jilïrinakapax ukanakat juk'ampinak Tatit Diosar ñanqhachañataki, ukhamarak Ezequías luqtiripar ñanqhachañatak arsupxäna.

17Senaquerib reyix ukxarux qillqatanak qillqäna, Israelan Tatit Diosapar ñanqhachasa, uka qillqatanakansti jupar jisk'achasaw säna: “Kunjämatix aka uraqin utjir yaqha markanakan diosanakapax amparaxat markanakapar qhispiyañatak jan ch'amanïkänxa, ukhamarakiw Ezequiasan Diosapax nayan amparaxat markapar qhispiyañatak jan ch'amanïkaniti” sasa.

18Senaquerib reyin jilïrinakapax, pirqa patankapkän uka Jerusalenankir jaqinakarux hebreo arut arnaqapxäna mulljasin axsarayañataki, ukhamat uka marka katuntasiñataki.

19Jupanakax Jerusalenankir Diosat parlapxäna, aka uraqinkir yaqha markanakan jaqin lurat diosanakapäkaspa ukhama.

20Ukhamïpan, Ezequías reyimpi, Amós chachan Isaías yuqap profetampix alaxpachar yanap mayisin art'asipxäna.

21Tatitusti mä angelaruw khithanïna, ukaw asiriankir reyin taqpach soldadonakaparu, ejercitopan jilïrinakapar tukjäna. Senaquerib reyisti p'inqapuniw uraqipar kutt'awayxäna. Ukatsti diosapan utapar mantkäna ukkhaxa, jupan pachpa yuqanakapaw ukan jupar jiwayapxäna.

22Ukhamawa Tatitux Ezequiasampiru, Jerusalenankir jaqinakampirux, Asiriankir Senaquerib reyin amparapat qhispiyäna, ukhamarak taqi uñisirinakan amparapatsa, ukatsti jak'ankir markanakampix sumankañan jakayäna.

23Ukatsti jupanakat waljaniw Jerusalenar waxt'äwinak apanipxäna Tatitur luqtañataki, Judá marka apnaqir Ezequías reyitakisti jila alan churäwinak apanipxarakïna. Uka urut uksarusti, jupan aytat kankañapax yaqha markanakan nayraqatapan juk'ampiw jilxatäna.

24Khä urunakansti Ezequiasax wali usuntataw jikxatasïna; ukampis Tatituruw mayisïna, jupasti mayitaparux mä muspharkañ luräwi tuqiw ist'äna.

25Ezequías reyisti aski katuqkasas janiw yuspagarañ chuymanïkänti, jan ukasti jach'a jach'aw tuküna, ukat Tatitux jupatak q'apisïna, ukhamarak Judá, Jerusalén uka markanakatakisa.

26Ukampis jach'a jach'a tukkasinsa, Ezequiasax Dios nayraqatan jisk'aruw tuküna, Jerusalenankir jaqinakax uka pachparak lurapxäna, Tatitusti Ezequiasan jakañapkamax janiw jupanakxaru q'apisiñap samaraskänti.

27Ezequiasax wali qamiri, wali yäqatarakïnwa, jupasti walja qullqi, quri, munkañ qalanaka, q'apkir qullanaka, jark'aqasiñanaka, kunayman jila alan yänak imkatäna.

28Ukxarusti grano, vino, aceite imañatakix imañ utanak lurayäna, uywanakatakix uywa uyunaka, tama uywa uchañanak lurayäna.

29Ukhamarus markanak lurayäna, jupansti jach'a, jisk'a uywapaw utjäna, Diosaw juparux walja yänaka apayäna.

30Ezequiasarakiw Guihón chiqankir uma jalsüki ukxa alay tuqit llupantayäna, ukatsti jupaw aynach tuqiru jist'jayarakïna, Davidan Markapat inti jalanta tuqiru. Taqi kuntix Ezequiasax lurañatak amtkäna ukanakax, askiruw sararapïna.

31Kunapachatix Babilonia markankir jilïr irpirinakax khithanak khithankäna, markan kuna muspharkañatix luraskatayna ukanak yatxatiri ukkhaxa, Diosax Ezequiasar sapak jaytäna jupar yant'añataki, ukhamaraki chuymapan lup'ïwipa yatiñataki.

32Ezequiasan ukat ukxar sarnaqäwipasa, aski luräwinakapasa, Amós chachan Isaías yuqapa profetan jutiri urunakat arsut qillqatapankiwa, ukhamaraki Judá, Israel markanakankir reyinakapan qillqatapana.

33Ezequiasax jiwxäna ukkhasti, Davidan wila masipan amay imäwipa alay chiqaruw imt'xapxäna, ukatsti taqpach Judá uraqinkirinaka, Jerusalenankir jaqinakaw juparux jach'ar aptapxäna; jupa lantisti Manasés yuqapaw marka apnaqxäna.

← Chapter 31 Chapter 33 →