2 Chronicles 31

aymara-1997

1Taqi ukanak tukuyatatsti, ukankapkäna uka israelitanakax, taqpachaniw Judá uraqinkir markanakar sarapxäna, ukatsti yupaychañ qalanak jisk'a jisk'a tukjapxäna, Astarté diosan lantinakapsa p'akthapipxänwa, qullu patanakan utjir yupaychañ utanaksa allthapipxarakïnwa, Judá, Benjamín, Efraín, Manasés uraqinakan taqi ukanak tukjañkama. Ukat israelitanakax markanakaparu, sapa maynis uraqinakaparkam kutt'xapxäna.

2Ukatsti Ezequiasax sacerdotenakaru, levitanakarux maykip lurapxañapatakiw jalanuqäna, sapa maynis luräwiparjam nakt'ata luqtäwinak luqtapxañapataki, sumankthapiñ wilañchanak luqtapxañapataki, Tatitur yuspagaras yupaychapxañapataki, Tatitun uta punkunakap uñjapxañapataki.

3Ukhamarakiw reyix jupan utjir yänakapat churäna, willjta tuqiru, jayp'u tuqir nakt'at wilañcha luqtañataki, sábado urunakan wilañchanakataki, machaq phaxsi uruyañ urutaki, jach'a uruyañ urunakataki, Tatitun kamachipan qillqatäki ukhamarjama.

4Jerusalenan jakirinakarusti sarakïnwa: Kuna churañanakatix jumanakar wakt'apktam ukanakxa, sacerdotenakaru, levitanakaru churapxam, jupanakan jakasiñapataki, ukhamat taqi chuymampi Tatitutak irnaqapxañapataki, Tatitun kamachip phuqhasa, sasa.

5Ukatsti kunapachatix reyin arunakapax taqinir yatiyatäxän ukkhaxa, israelitanakax taqi munasiñampiw sumäki uka achunakapat churapxäna: trigo, vino, aceite, misk'i, ukhamaraki pampan utjir kunayman achunakapata. Jupanakax taqi achunakapat sapa tunkat mayäki ukanak apapxarakïna, ukanakasti waljapuniw apthaptäna.

6Israelan jakir jaqinakasa, Judá uraqinkir yaqha markanakan jakir jaqinakasa, sapa tunkat mayäki uksti vacanakata, ovejanakata apanipxäna, ukhamarak kuntix Tatit Diosapatak yaqhachapkatayna taqi ukanaka. Taqi ukanaksti qut qutu uchapxäna.

7Kimsïr phaxsin uka yänak qutuchañ qalltapxäna, ukatsti paqallqüri phaxsin tukuyxapxarakïna.

8Ukatxa kunapachatix Ezequiasampi, jilïr irpirinakampix uka qutuchatanak uñjir sarapkän ukkhasti, Tatituruw jach'añchapxäna, ukhamarak Israel markaparusa.

9Ukatsti Ezequiasax sacerdotenakampiru, levitanakampiruw uka qutunakat jiskt'äna,

10ukxarusti Sadoc chachan utapankir Azarías jilïri sacerdotew jupar säna: “Markax Tatitun utapar yanapanak apaniñ qalltki ukkhat jichhakamax, waljaw nanakatak manq'añax utji, ukhamarusa taqi akanakaw jilt'aski; Tatituw markapar aski waxt'äwipampi phuqt'i uka layku” sasa.

11Ukhamïpan, Ezequiasax yänak imañ utanak Tatitun utapan lurayäna. Tukuyatäxipansti,

12ukaruw sapa tunkat maya churapkäna, ukhamarak Tatitur luqtat waxt'äwinaksa imapxäna. Taqi ukanak uñjañapatakisti, Conanías sat levitaruw jilïrit utt'ayapxäna, Simí jilaparusti jupa lanti uñjiritakiraki.

13Conanías levitana, ukhamarak Simei jilapana arsutanakapar phuqhasin uñjirinakasti, Ezequías reyina, Diosan utap uñjir Azarías jilïrin utt'ayatäpxarakïnwa, uka chachanakax akanakänwa: Jehiel, Azazías, Náhat, Asael, Jerimot, Jozabad, Eliel, Ismaquías, Máhat, Benaías jupanaka.

14Inti jalsu tuqinkir punku uñjiri, Imná chachan Coré sat levita yuqapax, Diosar luqtata waxt'äwinak uñjäna, apthapit yänak lakjäna.

15Coré chacharu sacerdotenakan markanakapan, masinakap taypin waxt'äwinak lakirañ yanapt'irinakax akanakänwa: Edén, Minjamín, Jesús, Semaías, Amarías, Secanías, jupanaka. Uksti jupanakax kunjämarutix lurañanakapax wakt'ki ukhamaruw lakirapxäna, jilïrinakarusa, sullkanakarusa,

16khitinakatix Tatitun utapar sapür lurañanakap phuqhañat jutapkäna ukanakaru, maykip lurañax wakt'ki, sapa maynisa lurañanakaparjama, kimsa maranit amstar qillqantat yuqall wawanakaru.

17Sacerdotenakax wila masi tamatkam qillqantatänwa, levitanakasti pä tunka maranita amstarux, lurañanakap wakt'käna ukhamar qillqantatarakïnwa.

18Sutinak qillqatansti jisk'a wawanaka, warminaka, yuqanaka, phuchhanaka, taqi jaqinakaw qillqantatäpxäna, lurañanak jupanakar churatätap laykux, taqiniw Diosar luqtatäpxänxa.

19Taqi markanakansti ajllit chachanakaw utjäna, Aarón chachat saraqir sacerdotenak taypin kunatix wakt'ki ukanak lakiñataki, ukhamarak qillqantatäpkäna uka levitanakaru, khitinakatix sacerdotenakan markanakapan uywa awatiñ uraqinakapan jakapkän ukanakar lakiñataki.

20Ezequiasax Judá markpachan uk luräna. Jupan luratanakapasti Tatit Diosap nayraqatan askïnwa, chiqaparakïnwa.

21Taqi kuntix jupax Diosan utapan luqtañataki amtkäna, jan ukax, kamachi arunak phuqhañanakatsa, Diosar taqi chuymampi thaqtasaw luräna, ukat jupan luräwipax askir saräna.

← Chapter 30 Chapter 32 →