2 Chronicles 26

aymara-1997

1Ukatsti Judá uraqinkiri jaqinakax taqiniw Oziasaru uñtasipxäna, ukatsti Amasías awkip lanti reyit utt'ayapxäna. Oziasax tunka suxtani maranikïnwa,

2jupaw awkipan jiwxatap qhipatxa, Elat marka wasitat sayt'ayäna, Judá markatakiw kutiqayxarakïna.

3Oziasax tunka suxtani maranïkän ukkhawa, marka apnaqañ qalltäna, jupax Jerusalén markan tunka payan maraw marka apnaqäna. Jupan taykapasti Jecolías satänwa, Jerusalén markankirïnwa.

4Ozías reyin luratanakapasti Tatitun nayraqatapanxa chiqapänwa, kamisatix Amasías awkipan luratapax chiqapäkäna ukhama.

5Zacarías profetan jakañapkamasti, Tatiturux thaqhapunïnwa; jupaw Oziasarux Diosar axsart'añ yatichäna. Jupax Tatitur thaqtkäna ukkhaxa, Tatitux juparux askiruw sartayäna.

6Ozías reyix filisteonakampi nuwasiñ qalltäna, ukatsti Gat, Jabnia, Asdod uka markanakan uyu pirqanakap tinkurayäna, ukatsti Asdod uraqin filisiteonak taypinxa, markanak lurayäna.

7Tatituw jupar yanapäna filisteonakampi, Gur-baal chiqankir árabe jaqinakampi, meunita jaqinakamp nuwasiñanakana.

8Amonita jaqinakax Ozías reyiruw qullqi churapxäna, jupan aytat kankañapax Egipto qurpakamaw purïna, jupan munañani kankañapax jilxatatap layku.

9Ozías reyix pukaranak Jerusalén markan lurayäna, Esquina Punkuna, Qhirwa tuqinkir Punkuna, uyu muyt'añana, ukanakarusti sum uyuchrantayäna.

10Ukhamarus wasaranxa pukaranak lurayäna, ukatsti walja uywanakanïtap laykux pampansa qullunsa walja phuch'unak alliyäna. Jupansti pampanakansa, qullunakansa, irnaqiri jaqinakapaw utjäna, jupanakasti uva yapunakapana, huertonakapan irnaqasipkäna, jupan yapu lurañar munirïtap layku.

11Ozías reyin ejercitopax wali ch'amani, walja soldadonïnwa, jupanakasti suma wakichataw tam tama nuwasir mistupxäna; Hananías sat jilïriw reyin qillqiripampiru, Jehiel chachampiru, Maaseías jilïrimpir soldadonak qillqantayäna.

12Uka qillqatarjamasti, wila masinakan taqi jilïrinakapax, khitinakatix nuwasiñatak jan axsarir chachanakäpkäna ukanakasti taqpachanix pä waranqa suxta patakanïnwa.

13Jupan sarayat ejercitox kimsa pataka paqallquni waranqa phisqa patakan nuwasir soldadonakanïnwa, uka ejercitox wali ch'amanïnwa, ukampiw reyix uñisirinakapamp nuwasiñan sayt'asïna.

14Ozías reyix taqpach ejercitotakix jark'aqasiñanaka, lanzanaka, casconaka, corasanaka, mich'inak antutt'añanaka, q'urawanaka, taqi ukanak wakichayäna.

15Ukxarusti jupax Jerusalén markanxa, wali suma amuyt'amp lurat nuwasiñ yänak lurayäna, pukaranakaru, pirqa amstanakar uchayañataki, ukawjat mich'inaka, jach'a qalanak antutt'aniñataki. Jupan aytat kankañapax jaya chiqanakan yatisïna, Diosaw juparux kunayman tuqit yanapt'askäna, ukhamat wali ch'aman reyir tuküna.

16Ukampis kunapachatix marka apnaqäwipan wali ch'amanïxäna ukkhaxa, jach'a jach'aw tukxäna, ukaw jupar aynacht'ayäna. Jupasti Tatit Diosaparux janiw sum arkkxänti, jach'a jach'a tukuñapampiw Tatitun utaparux altaran incienso nakt'ayañatak mantäna.

17Ukampis jupan qhipapat Azarías sacerdotex, jan axsariri kimsaqallq tunka Tatitun sacerdotenakapamp chikaw mantäna,

18ukat reyimpi jikintasisin, jupar sapxarakïna: “Ozías rey, Tatitur incienso luqtañax janiw juma reyir wakt'ktamti, jan ukasti, Aarón chachat saraqir sacerdotenakaruw wakt'i, jupanakaw ukanak lurañatakix ajllitäpxi. Qullan chiqawjat mistum, jumax Tatit nayraqatan jan wal lurtaxa, Diosax janiw uka luratamat jumar jach'ar aptkätamti” sasa.

19Ozías reyisti uk ist'asin walpun sacerdotenakatak q'apisïna, jupax amparapan incienso q'aphichañ ast'atäskänwa. Ukspachawa, Tatitun utapan incienso luqtañ altar jak'ana, sacerdotenakan nayraqatapan lepra usux parapar mistüna.

20Ukatsti kunapachatix Azarías jilïr sacerdotempi, mayni sacerdotenakampi jupar sum uñkatapkän ukkhaxa, parapan lepra usunïtap uñjapxäna, ukatsti mäkiw uka chiqat reyir irpsupxäna; jupa pachpaw jank'aki mistuña munarakïna, Tatitun jupar mutuyatap layku.

21Ozías reyix jiwañap urukamaw lepra usunïna, ukat yaqha utan jakañapax wakisïna, juparusti Tatitun utapar mantañapxa jark'apxänwa, ukat Jotam yuqapax marka apnaqañar uchasïna.

22Ozías reyin ukat ukxar sarnaqäwinakapasti, qalltat tukuykamax, Amós chachan Isaías profeta yuqapaw qillqäna.

23Ozías reyix jiwxäna ukkhasti, nayra awkinakapamp chikaw reyin uraqipankiri amayanak imäwiru imt'xapxäna, jupan lepra usunïtap uñjasina. Uka qhipatsti jupa lantix, Jotam yuqapaw marka apnaqxäna.

← Chapter 25 Chapter 27 →