2 Chronicles 25

aymara-1997

1Amasías reyix Judá marka apnaqañ qalltkäna ukkhax, jupax pä tunka phisqani maranïnwa, jupasti Jerusalén markanxa pä tunka llätunkani maraw marka apnaqäna. Taykapax Joadán sutinïnwa, jupasti Jerusalén markankirïnwa.

2Amasías reyin luratanakapax Tatit nayraqatan askïnwa, ukampis janiw suma chiqa chuymampi sarnaqkänti.

3Kunapachatix Amasías reyin marka apnaqañapax sum utt'askän ukkhaxa, awkiparu jiwayapkatayna uka jilïr irpirinakarux taqiniruw jiwarayäna.

4Ukampis janiw uka jilïrinakan wawanakaparux jiwaraykänti, Moisesan kamachipan qillqatanakarjamax Tatitux sänwa: “Awkinakax janiw wawanakapan jucha luratap laykux jiwañapatak juchañchatäkaniti, janirakiw wawanakas awkinakapan jucha luratap laykux jiwañapatak juchañchatäkaniti, jan ukasti sapa mayniw juchap laykux jiwani” sasa.

5Amasías reyix Judá, Benjamín uraqinkir taqi chachanakaruw tantachäna, jupanakarusti wila masitkama wakicht'äna soldadonakan jilïrinakapamp irpata. Ukatsti chachanak jakthapiyäna, pä tunka maranit amstaru, ukhamasti kimsa pataka waranqa chhijllat soldadonakaw utjäna, nuwasiñataki wakicht'atanaka, lanzanaka, jark'aqasiñanak apnaqirinaka.

6Ukhamarus Israel markatxa, patak waranqa soldadonak mink'äna, jupanakarusti kimsa waranqa kimsa patak kilo qullqinak churäna.

7Ukampisa Diosankir mä chachaw jupan ukar jutäna, juparusti sänwa: —Jach'a munañan rey, Israelan ejercitopax jan jumampi chika sarkpati, Tatitux janiw Israelampïkiti, Efraín uraqinkir taqi uka jaqinakampïkiti.

8Jumatix jupanakan yanapapampi nuwasir sarañatak ejercitomar ch'amañchañ munsta ukaxa, Diosax uñisiriman nayraqatapan aynacht'ayätam, Diosax yanapañatakisa, tukjañatakisa ch'amaniwa —sasa.

9Amasías reyisti Diosankir jaqirux jiskt'änwa: —Jichhasti, ¿Israelan ejercitopar kimsa waranqa kimsa patak kilo qullqi churkta ukax kunänisa? —sasa. Diosankir chachasti sänwa: —Tatitux ukatsa juk'amp jila jumar churätam —sasa.

10Ukatsti Amasías reyix, Efraín uraqit jupampi chikachasiñatak jutapkatayna uka soldado tamanakarux utanakapar sarxapxañapatakiw mayïna. Ukampis uka jaqinakax Judänkirinakatakix walpun phiñasipxäna, wali q'apisitaw utanakapar kutt'apxäna.

11Amasías reyisti wal ch'amañcht'asïna, ukatsti ejercitoparux Jayu Qhirwa sat chiqaru anakisinxa, tunka waranqa Edomita chachanakaruw jiwarayäna.

12Ukhamarus Judá uraqinkir jaqinakax yaqha tunka waranqa jaqinakampi katuranipxäna, jupanakarusti mä qarqa qullu pataruw apapxäna, ukawjatpach jupanakar jaquntanipxäna, ukatsti taqiniw jisk'a jisk'a tukusipxäna.

13Ukchañkamasti, kawkïr soldado tamanakarutix Amasías reyix utanakapar kuttaykäna ukanakasti, Judá uraqinkir markanakaruw mantantapxäna; Samariat qalltasin Bet-horón chiqakamax, kimsa waranqa jaqinakaruw jiwarayapxäna, ukatsti walja lunthatat yänak apasipxarakïna.

14Amasías reyix Edom chiqankir jaqinakar atipjas kutt'anxasinxa, jupax Seir chiqankir diosanak apasinïna, ukatxa jupan diosanakapat uñt'asïna, ukanakarusti inciensonak nakhayasaw yupaychäna.

15Tatitusti Amasías reyitakix q'apisïnwa, ukatsti mä profetaruw khithanïna jupar akham sañapataki: —¿Kunatarak uka markankir diosanakapar yupaychtasti?, uka diosanakax janiw markapar amparamat qhispiykiti —sasa.

16Profetax uka arunak arskäna ukkhaxa, reyix juparux saskakïnwa: —¿Khitirak jumarusti reyin amuyt'ayiripat uchtamsti? ¡Jan ukanak parlkamti! Jan ukax ¿jiwayatäñcha muntaxa? —sasa. Profetasti ukxarux janiw juk'amp arskxänti, ukampis sänwa: —Diosax uk luratamata, iwxa arunakaxar jan ist'atamatsa t'unjätamwa —sasa.

17Ukampis Judá uraqinkir Amasías reyix, yaqhanakan iwxa arunakaparuw jaysäna, ukatsti mayniruw khithäna Israelan reyipa Joacaz chachan Joás yuqapan ukaru, khititix Jehú chachan allchhipäki ukaru akham sañapataki: “Jutam, ukatsti ajanuy ajanu uñkatasiñäni” sasa.

18Ukatsti Israelan Joás reyipax, Judá markan Amasías reyiparux akham iwxäna: “Ch'aphisti Libanonkir cedro quqarux aka iwxa apayatayna: ‘Phuchhama yuqaxan warmipäñapatak churarapita’ sasa. Ukampis ch'uminkir mä animalaw ukanjam sarasin uka ch'aphir taksuwayäna.

19Jumax edomitanakar atipjatamat jach'a jach'a tuktaxa; ukasti juk'ampi jach'añchatäñ thaqhaytam. Jumax utamankaskam. ¿Kunatsa chijir puriñar munta, Judá markan aynacht'añapsa muntaxa?” sasa.

20Amasías reyisti janiw jupar ist'känti, Diosaw ukhamäñapatak wakt'ayäna, Joás reyin amparapar katuyañataki, jupan Edom chiqankir diosanakar alkatasitap layku.

21Ukatsti Israelan Joás reyipax, Amasías reyimpi jikintasiriw Judá uraqinkir Bet-semes sat chiqar sarantäna.

22Ukatsti Judá uraqinkirinakax israelitanakampi atipjataw uñjasipxäna, ukat sapa mayniw utanakaparkam jaltxapxäna.

23Israelan Joás reyipasti, Judänkir Amasías reyiparux Bet-semes chiqan katuntayäna, ukatsti Jerusalenaruw irpäna, uka markan uyu pirqapsti pataka kimsaqallq tunkan metro jist'jayäna, Efraín Punkut qalltasina Esquina sat Punkukama.

24Ukxarusti jupax taqpach qurinaka, qullqinaka, Diosan utapan utjkatayna, ukhamarak reyin utapan imatäkän taqi uka yänak katuntasïna, uka yänakasti Obed-edom chachan uñjatänwa. Ukat mä qawqha jaqinakar katurasinxa, Samaria markaruw kutt'xäna.

25Judá uraqinkir Joás chachan Amasías yuqapasti, tunka phisqani marampiw jakaskäna, Israelankir Joacaz chachan yuqapa Joás reyin jiwxatapatxa.

26Amasías reyin ukat ukxar sarnaqäwipasti, qalltat tukuykamax, Judá, Israel markankir reyinakapan qillqatapankiwa.

27Amasías reyin Tatitut saraqatap qhipatsti, Jerusalén markan jupatakiw sayt'añ amtapxäna, jupasti Laquis sat chiqaruw jaltxäna; ukampis uka markakam arktasinwa ukan jupar jiwayapxäna.

28Amayapxa mä caballot Jerusalenarux apanipxäna, ukatsti nayra awkinakapamp chika Davidan Markapan imt'xapxäna.

← Chapter 24 Chapter 26 →