1 Samuel 13

aymara-1997

1Saulux niya jilïr jaqïxänwa kunapachatix Israel marka apnaqañ qalltkän ukapachaxa; niya mä qawqha maranak apnaqkasasti,

2Saúl reyix israelita jaqinak taypit kimsa waranqa soldadonak ajllïna. Pä waranqa soldadonakasti jupamp chikaw Micmás, Betel qullunak tuqin qhiparäna, waranqa soldadonakasti Jonatanampi chikarakiw Guibeá chiqan Benjamín uraqin qhiparäna, ukat jilt'iri jaqinakarusti Saúl reyix utanakaparuw khithanukxäna.

3Ukatsti Jonatanax Guibeá chiqankir filisteo soldadonakarux q'al tukjäna, filisteonakasti taqi ukanak yatipxäna. Ukatsti Saúl reyix taqi Israel markpachan trompetanak phust'ayäna, ukhamat hebreonakan jank'akïpxañapataki.

4Israelitanakasti, Saúl reyin filisteo soldadonakar tukjatap yatipxäna, ukat filisteonakax israelitanakar wal uñisipxäna, ukhamasti soldadonakax Saúl reyimpiw Guilgal chiqan tantachasipxäna.

5Mä tuqitsti, filisteonakax israelitanakampi nuwasiñatakix tantachasipxarakïnwa. Jupanakansti kimsa tunk waranqa nuwasiñ carronaka, suxta waranqa caballería soldadonakaw utjäna, kayuk sarantir soldadonakas quta ch'allar uñtat jan jakt'kayarakïnwa. Ukatsti Micmás chiqar sarasax Bet-avén sat inti jalsu tuqiruw campamentop wakicht'asipxäna.

6Israelitanakasti jan walt'añan jikxatasipxäna, filisteonakan jupanakar nuwantatap laykusti putunakaru, uraqi p'ujrunakaru, qarqa taypinakaru, q'awanakaru, phujunakaruw imantasipxäna.

7Jupanakatsti waljaniw Jordán jawira makhatxapxäna, Gad, Galaad tuqinakaru; ukampis Saúl reyix Guilgal chiqaruw qhiparäna, soldadonakapasti wali axsarayasisaw jupar arkapxäna.

8Saúl reyix paqallqu uruw ukan suyt'äna, kunjämtix Samuelux siskatayna ukhamarjama; Samuelusti Guilgal chiqarux janiw purkataynati, ukat jaqinakax sarxañ qalltapxäna.

9Ukatsti Saúl reyix sänwa: —Uywanak apanipxam nakt'at waxt'äwinaka, sumankañ wilañchanak luqtañasataki —sasa. Ukat jupa kipkaw uka nakt'at wilañchanak luqtäna.

10Saúl reyix wilañcha luqta katuyañ tukuyaskän ukapachaw Samuelux purinïna. Saúl reyisti jupar aruntiriw mistuwayäna.

11Ukampis Samuelux sänwa: —¿Kunatsa uk lurta? —sasa. Saúl reyisti sarakïnwa: —Jaqinakar sarxir uñjta, jumasti janirakiw kuna urutix puriniñamäkän ukürux purinktati, filisteonakasti Micmás chiqan tantacht'atäpxänwa,

12filisteonakax Guilgal chiqan niyas nuwantkitaspa ukham amuyäyäta, nayasti janïraw Tatitur mayt'askäyätti; ukat ukham jan wali jikxatasisin naya pachpa nakt'at waxt'äwi luqtañar uchasta —sasa.

13Samuelusti juparux sarakïnwa: —¡Luqhir uñtataw lurtaxa! Tatitux kuntix sisktam uka arunakarutix jaysasamänxa, juman Israel markar apnaqañamax wiñayatakïsapänwa.

14Ukampis jichhax juman apnaqäwimax janiw jayatakïkaniti. Tatitux jupan chuymapar purt'kir yaqha chacha thaqhani, ukatsti markapan jilïripat utt'ayarakini, arunakapar juman jan jaysatam layku —sasa.

15Ukat ukspachaw Samuelux Guilgal chiqat thakhipanjam sarxäna. Chikat soldadonakasti Saúl reyimpiw nuwasiñatak sarapxäna, Guilgal chiqatsti Benjamín uraqinkir Guibeá chiqaruw puripxäna. Ukan Saúl reyix soldadonakapar jakthapïna, taqpachanix niya suxta patak chachanakänwa.

16Saúl reyix Jonatán yuqapampi, jupanakamp chika sarir tamanakampix Benjamín uraqin Guibeá chiqaruw qhiparapxäna, ukchañkamasti filisteonakax Micmás chiqaruw utjnuqtapxäna,

17filisteonakax campamentopat kimsa tamar t'aqjtataw mistunïna; maynïr tamax Sual uraqinkir Ofrá uksaruw saräna,

18maynïr tamasti Bet-horón siski uksarurakiw saräna, kimsïr tamasti Seboím qullut makhatki uksaruw sararakïna, ukasti wasara tuqir sarañankiwa.

19Israelitanak taypinsti janiw hierro liq'ir jaqix utjkänti, ukhamat filisteonakax amuyapxäna, hebreo jaqinakax janiw espadanakapa, lanzanakapsa lurasiñ yatipkaniti sasa.

20Israelita jaqinakasti filisteonakarukiw qhulliñ arman rejanakapsa, chuntanakapsa, hachanakapsa, piconakapsa ariptayañatak churapxirïna.

21Ukanak lurayasiñatakix walja qullqi churapxirïna.

22Ukhamasti, Saúl reyimpi, Jonatanampi chikäpkän ukanakasti uka nuwasiñ urux janiw maynis espadanïpkänti, janirakiw lanzanïpkänsa. Jan ukasti jupanak paninikiw uka nuwasiñ yänakanïna.

23Ukchañkamasti mä tama filisteo soldadonakax Micmás chiqar mantañawjaruw utjnuqtapxäna.

← Chapter 12 Chapter 14 →